Mga Kurbata Sadto kag Karon

MGA milenyo na nga ang mga lalaki interesado sa pagpuni sang ila liog. Halimbawa, sang mga 1737 B.⁠C.⁠E., ginhatagan sang Paraon sang Egipto si Jose sing kulintas nga bulawan.​—⁠Genesis 41:⁠42.

Sa madamo nga bahin sang kalibutan karon, ang mga lalaki nagasuksok sang ginatawag naton nga mga kurbata. Suno sa lainlain nga mga tiliman-an, ang mga ginsundan sang moderno nga mga kurbata nagluntad sa Inglaterra kag Pransia sa naulihi nga bahin sang ika-16 nga siglo. Nagasuksok ang mga lalaki sing diyaket nga ginatawag nga doublet. Para dekorasyon nagasuksok sila sing matig-a nga kuwelyo (ruff) sa liog. Sa masami ang matig-a nga kuwelyo, nga mahimo magdamol sing pila ka sentimetro, isa ka daw-plato nga disk nga nagalibot sa liog. Human ini sa puti nga tela kag ginpatig-a agod mahuptan ang korte sini.

Sang ulihi, ginbuslan ang matig-a nga kuwelyo sang ginatawag nga nagaluyloy nga kuwelyo (falling collar). Puti ini nga kuwelyo nga nagatabon sa bilog nga abaga kag nagaluyloy sa naibabaw nga butkon. Ini nga mga kuwelyo ginatawag man nga Vandyke. Ang mga Puritan, lakip sa iban pa, nagsuksok sini.

Sang ika-17 nga siglo, ginsuksok ang malaba nasulod nga coat nga ginatawag nga tsaleko sa sulod sang kinaandan nga malaba nga amerikana. Ang liog sang nagasuksok ginahigtan sang tulad-panuwelo nga tela, ukon cravat. Ini nga tela ginabalighot sa liog sing indi lamang makaisa. Nagaluyloy ang punta sa atubangan sang kamisadentro. Ginapakita sang mga larawan nga ginpinta sang ulihi nga bahin sang ika-17 nga siglo nga popular gid sadto ang mga cravat.

Ang mga cravat human sa muslin, lawn, (mga sahi sang tela) kag lace pa gani. Malahalon ang mga human sa lace. Nagbayad kuno si James II sang Inglaterra sing 36 ka pound kag 10 ka shilling para sa isa sini sang ginkoronahan sia, isa ka daku gawa nga kantidad sadto nga tion. Dalagku ang iban nga mga cravat nga human sa lace. Ang larawan ni Charles II sa Westminster Abbey nagapakita nga 15 sentimetros ang kalaparon kag 86 sentimetros ang kalabaon sang iya cravat.

Madamo ang mga paagi sa paghigot sing cravat. Ginasampaw sang iban ang seda nga laso sa cravat agod indi magkiwi kag dayon ginalaso sing daku sa ubos sang sag-ang. Ini nga estilo ginatawag nga soli­taire. Ang laso pareho sa moderno nga bow tie. May yara kuno di-magkubos sa isa ka gatos ka paagi sang paghigot sing cravat. Si Beau Brummel, isa ka taga-In­gla­terra nga nag-impluwensia sang mga estilo sang pamayo sang mga lalaki, naghinguyang kuno sing bug-os nga aga sa paghigot sing husto sang isa ka cravat.

Sang dekada 1860, ang mga cravat nga may malaba nga mga punta nangin kaanggid sa moderno nga bersion sang ginasuksok sa liog kag gintawag nga kurbata. Gintawag man ini nga four-in-hand. Naghalin ini nga ngalan sa higot nga ginagamit sang mga kutsero sang apat-ka-kabayo nga mga kalesa. Nangin uso ang mga kamisadentro nga may kuwelyo. Ginahigot ang kurbata sa ubos sang sag-ang, kag ang malaba nga punta sini nagaluyloy sa kamisadentro. Diri sini nga nagsugod ang moderno nga kurbata. Ang isa pa ka sahi sang kurbata, ang bow tie, nangin popular sang dekada 1890.

Sa karon ginakabig sang madamo ang kurbata nga isa ka importante nga bahin sang panagway sang nagasuksok sini. Mahimo pa gani magkomento ang iban nga tawo tuhoy sa isa ka estranghero base sa sahi sang kurbata nga iya ginasuksok. Gani, maalamon nga magsuksok sing kurbata nga matinlo kag nahisanto ang desinyo kag kolor sa imo kamisadentro, delargo, kag amerikana.

 Ang paghigot nga ginpili dapat himuon sing mahipid. Ayhan ang labing kinaandan nga paghigot amo ang four-in-hand. (Tan-awa ang diagram sa pahina 14.) Mahipid ini kag simple kag nagakaigo sa pormal nga mga okasyon. Ang isa pa ka popular nga higot amo ang Windsor knot, nga medyo mas daku. Masami nga may yupok nga ginahimo sa ubos sang higot.

Madamo nga lalaki ang indi komportable nga may kurbata. Wala nila maluyagi nga may nagahugot sa ila tutunlan. Apang, natukiban sang iban nga nakaagi sini nga problema nga ang pagkadi-komportable bangod gali sa kadakuon sang kamisadentro. Kon amo ini ang imo problema, pat-ura nga indi tuman ka gamay ang kuwelyo sang imo kamisadentro. Kon hustuhan ang kadakuon sini, daw indi mo gani mamulalungan nga nagakurbata gali ikaw.

Sa madamo nga pungsod ang kurbata ginakabig nga importante nga bahin sang pormal nga panapot. Bangod sina, madamong Cristianong lalaki ang nagakurbata kon nagapakigbahin sa pormal nga mga bahin sang ila ministeryo. Huo, ang isa ka tela sa liog sang isa ka lalaki makadugang sing dignidad kag makahimo sa iya nga talahaon kon tulukon.

[Diagram sa pahina 14]

(Para sa kabug-usan sang teksto,tan-awa ang publikasyon)

Kon paano ihigot ang four-in-hand *

1 Magsugod nga ang malapad nga punta sang kurbata halos treinta sentimetros sa ubos sang makitid nga punta, kag ibalighot ini sa makitid nga punta, ginapalusot ini sa ubos.

2 Ibalighot liwat ang malapad nga punta, kag palutsa ini sa sulusingsing.

3 Ginahuptan nga halog ang higot paagi sa tudlo, butunga ang malapad nga punta sa sulusingsing sa atubangan.

4 Hugta ang higot sing hinayhinay, ginauyatan ang makitid nga punta kag ginabutong ang higot pakadto sa kuwelyo.

[Footnote]

[Mga laragway sa pahina 15]

Mga estilo sang kurbata halin sang ika-17 nga siglo tubtob sa karon