Dapat Bala Ako Magpuyo sa Iban nga Pungsod?
Pamangkot sang mga Pamatan-on . . .
Dapat Bala Ako Magpuyo sa Iban nga Pungsod?
“Luyag ko magpuyo sa iban nga lugar.”—Sam.
“Mausisaon lang ako. Luyag ko makita ang bag-o nga mga butang.”—Maren.
“Ginsilingan ako sang akon suod nga abyan nga ang pagpalayo sa puluy-an makapaayo sa akon.”—Andreas.
“Luyag ko magpasimpalad.”—Hagen.
NAGHANDUM ka bala nga magpuyo sa iban nga pungsod—bisan sing temporaryo lamang? Kada tuig, linibo ka pamatan-on ang nagahimo sina. Si Andreas nagsiling sang iya eksperiensia sa luwas: “Luyag ko ini liwaton.”
Ang pila ka pamatan-on nagsaylo sing temporaryo bangod luyag nila nga makaganar sing kuwarta ukon makatuon sang lenguahe sang iban nga pungsod. Halimbawa, bantog gid sa madamo nga pungsod ang au pair nga mga programa. Nagatugot ini sa lamharon nga mga dumuluong nga magtrabaho sa puluy-an sang isa ka pamilya bilang bayad sa pagdayon kag pagkaon, kag ginagamit nila ang ila bakante nga tion sa pagtuon sang lokal nga lenguahe. Nian yara ang mga pamatan-on nga nagakadto sa iban nga mga pungsod agod mag-eskwela. Ang iban nagasaylo agod mangita sing trabaho agod makapiyanpiyan sila sa ila mga pamilya sa pinansial. Kag ang iban naman nagasaylo bangod indi sila sigurado kon ano ang ila himuon pagkatapos nga makaeskwela kag luyag nila magpahuway sa iban nga pungsod.
Sing makawiwili, ang pila ka Cristianong mga pamatan-on nagsaylo sa mga pungsod diin kulang ang mga ebanghelisador, agod pasangkaron ang ila ministeryo. Ano man ang rason sa pagsaylo, ang pagpuyo sa iban nga pungsod mahimo mangin isa ka mapuslanon nga leksion sa pagkaindependiente sang isa ka hamtong. Makapasangkad ini sang imo panglantaw sa kultura. Mahimo pa gani ikaw mangin sampaton sa isa ka dumuluong nga hambal—isa ka butang nga makadugang sang imo mga kahigayunan nga makakita sing trabaho.
Walay sapayan sina, ang pagpuyo sa iban nga pungsod indi pirme isa ka makalilipay nga eksperiensia. Halimbawa, si Susanne naghinguyang sing isa ka tuig subong exchange student (estudyante nga nagatuon sa iban nga pungsod bilang baylo sa isa naman ka estudyante gikan sa sina nga pungsod nga nagtuon sa iya ginhalinan nga pungsod). Sia nagsiling: “Abi ko mangin maayo gid ini kutob sa ginsuguran tubtob sa katapusan. Indi gali.” Ang iban nga mga pamatan-on ginhingalitan pa gani ukon nakatigayon sing mabug-at nga problema. Busa, antes mag-empaki sang imo mga maleta, maalamon nga magpungko ka anay kag binagbinagon ang mga bentaha kag mga disbentaha.
Usisaa ang Imo mga Motibo
Ang pagbinagbinag sa mga bentaha kag mga disbentaha pat-od gid nga nagalakip sang pag-usisa sang imo mga motibo sa pagkadto sa iban nga pungsod. Isa ka butang ang maglakbay para sa espirituwal nga intereses ukon mag-atipan sa mga responsabilidad sa pamilya. Apang kaangay sang mga pamatan-on nga ginsambit sa umpisa, madamo ang luyag nga magsaylo bangod lamang sang ila Manugwali 11:9 nagapalig-on sa mga pamatan-on nga ‘magkalipay sa ila pagkapamatan-on.’ Apang, ang bersikulo 10 nagapaandam: “Kuhaa ang kaugot sa imo tagipusuon, kag isikway ang kalamidad gikan sa imo unod.”
luyag nga magpasimpalad, magtigayon sing daku pa nga kahilwayan, ukon maglingawlingaw. Indi gid man ini malain. Ti, angKon ang imo motibo sa pagsaylo sa iban nga pungsod amo nga agod likawan ang mga pagdumili sang ginikanan, mahimo nga ginaagda mo ang “kalamidad.” Nadumduman mo bala ang parabola ni Jesus tuhoy sa buhaha nga anak? May kaangtanan ini sa isa ka pamatan-on nga lalaki nga mahamkunon nga naglakbay sa luwas, sa tuyo nga makatigayon sing daku pa nga kahilwayan. Apang, sang ulihi, nagbunal ang kalamidad, kag nasalapuan niya ang iya kaugalingon nga ginagutom, nagaantos, kag nagabalatian sa espirituwal.—Lucas 15:11-16.
Nian yara yadtong luyag magsaylo bangod luyag nila likawan ang mga problema sa puluy-an. Apang, subong sang ginsulat ni Heike Berg sa iya nga libro nga What’s Up, “kon luyag mo nga maglakat bangod lamang nga indi ka malipayon . . . kag nagapati ka nga mangin mas maayo ang tanan sa iban nga duog—kalimti ini!” Ang matuod, mas maayo nga atubangon ang mga problema. Wala sing makuha nga maayo ang isa kon malagyo sia sa mga kahimtangan nga wala niya maluyagan.
Ang iban pa nga makatalagam nga mga motibo amo ang kakagod kag materyalismo. Bangod sang handum nga magmanggaranon, madamo nga pamatan-on ang nagpalambo sing tumalagsahon, indi realistiko nga mga ideya kon mangin ano ang kabuhi sa industriyalisado nga mga kadutaan. Ang pila naghunahuna nga ang tanan nga taga-Nakatundan manggaranon. Apang indi ini matuod. Pagkatapos makasaylo, nasapwan sang madamo nga pamatan-on ang ila kaugalingon sa isa ka dumuluong nga pungsod, nagahimakas nga makatibawas sa kaimulon. * Ang Biblia nagapaandam: “Ang gugma sa kuwarta amo ang gamot sang tanan makahalalit nga mga butang, kag paagi sa paghingamo sini nga gugma ang iban nagtalang gikan sa pagtuo kag nagsuntok sang ila mga kaugalingon sing madamong kasakitan.”—1 Timoteo 6:10.
Handa Ka Na Bala?
May isa pa ka rason nga dapat binagbinagon: Hamtong ka na gid bala sa pag-atubang sa mga kabudlayan, mga problema, kag mga kagamo nga mahimo magluntad sa luwas? Mahimo nga kinahanglan ka nga magkabuhi nga may kaupod sa kuwarto ukon magdayon sa isa ka pamilya kag magpasibu sa ila rutina. Busa kamusta ang imo kaangtanan sa imo pamilya? Ang imo bala mga ginikanan nagayamo nga wala ka sing patugsiling kag maiyaiyahon? Pislian ka bala sa pagkaon? Daw ano ikaw ka handa sa pagtulutimbang sa mga hilikuton sa puluy-an? Kon mabudlay na nga mga butang ini para sa imo, hunahunaa kon daw ano pa ini kabudlay para sa imo sa iban nga pungsod!
Kon ikaw isa ka Cristiano, mahuptan mo bala ang imo espirituwalidad? Ukon kinahanglan pa bala nga pahanumdumon ka pirme sang imo mga ginikanan nga indi pagkalimtan ang pagtuon sang Biblia, Cristianong mga miting, kag ang pagbantala nga hilikuton? Malig-on gid bala ikaw sa espirituwal agod mapamatukan ang mga pag-ipit kag mga pagsulay sa iban nga pungsod nga mahimo nga indi mo maatubang sa imo tumandok nga pungsod? Sa iya una nga adlaw sa eskwelahan sa iban nga pungsod, ang isa ka lamharon nga Cristiano, isa ka exchange student, ginsilingan kon diin sia mahimo nga makakuha sang ginadilian nga mga droga. Ginhagad sia sang ulihi nga magdate sang isa ka babayi nga iya kabutho. Sa iya dutang natawhan, ang isa ka babayi indi gid magpabutyag sang iya interes sing prangka. Ang isa ka lamharon nga Aprikano nga nagsaylo sa Europa nagsiling man: “Sa amon pungsod indi gid 1 Pedro 5:9.
ikaw makakita sing imoral nga mga laragway sing dayag. Apang diri makita mo ini bisan diin.” Ang pagsaylo sa iban nga pungsod mahimo magdul-ong sa espirituwal nga pagkalunod kon ang isa indi “malig-on sa pagtuo.”—Hibalua ang mga Katunayan!
Antes magsaylo, kinahanglan nga mahibaluan mo ang tanan nga katunayan. Indi magsandig sa sugidsugid lamang. Halimbawa, kon ginabinagbinag mo ang student-exchange nga programa, pila ang magasto sa sini? Mahimo makibot ikaw sa paghibalo nga sa masami nagadalahig ini sing linibo ka dolyar. Kinahanglan mo man nga mahibaluan kon bala ang ginatun-an mo sa luwas batunon sa imo pungsod. Subong man, magtipon sing madamo nga impormasyon tubtob sa masarangan mo tuhoy sa pungsod—mga kasuguan sini, mga kultura sini, kag mga kustombre sini. Ano nga mga gastos ang nalakip sa pagpuyo didto? Pila nga buhis ang kinahanglan mo nga bayaran? May mga katalagman bala sa panglawas nga dapat mo binagbinagon? Mahimo masapwan mo nga mabuligon ang pagpakigsugilanon sa mga tawo nga nakapuyo na didto.
Nian yara ang tuhoy sa dalayunan. Ang tagbalay nga mga ginikanan sang mga exchange student wala sa masami nagapaabot sang materyal nga balos. Bisan pa nga amo sina, ang pagdayon sa mga tawo nga wala nagatahod sang mga prinsipio sang Biblia mahimo magresulta sa daku nga mga kahuol kag mga kabalaka. Ang pagdayon sa mga abyan ukon mga himata mahimo nga isa nga mapilian. Apang maghalong nga indi mangin pabug-at sa ila—bisan pa nga ginapangabay ka nila nga magdayon. Mahimo ini maghalit ukon magguba pa gani sang imo kaangtanan sa ila.—Hulubaton 25:17.
Kon plano mo nga makaganar sing kuwarta samtang didto sa iban nga pungsod, indi pagkalimti ang imo Cristianong obligasyon nga tumanon ang sekular nga awtoridad. (Roma 13:1-7) Ginapahanugot bala sang kasuguan nga magtrabaho ikaw sa sina nga pungsod? Kon amo, sa idalom sang ano nga mga kasugtanan? Kon magtrabaho ikaw sing ilegal, mahimo nga ginabutang mo sa katalagman ang imo tindog subong bunayag nga Cristiano kag ginapabay-an ang imo kaugalingon nga wala sing sadsaran nga mga pangamlig, subong sang seguro sa aksidente. Bisan pa nga legal nga magtrabaho, kinahanglan nga magmainandamon kag magmaalamon ikaw. (Hulubaton 14:15) Ang bentahuso nga mga amo masami nga nagahingalit sa mga dumuluong.
Paghimo sing Desisyon
Maathag, nian, nga ang desisyon sa pagsaylo sa iban nga pungsod importante—kag indi dapat pagpasapayanan. Hambali ini upod sa imo mga ginikanan, kag binagbinaga sing maayo ang ginapaabot nga mga benepisyo kag ang posible nga mga katalagman. Indi pagtuguti nga daugon sang imo kalangkag ang imo paghantop. Mangin bunayag kon nagausisa sang imo mga motibo. Mamati sing maayo sa imo mga ginikanan. Ti, sila gihapon ang may salabton sa imo, bisan pa nga ginatos ka kilometro ang imo kalayuon. Mahimo nga kinahanglan mo ang ila pinansial nga suporta agod mabuhi.
Sa tapos mabinagbinag ang tanan nga mga butang, mahimo nga indi maalamon ang pagsaylo—ayhan sa karon. Mahimo ini nga makapasubo, apang madamo pa nga makalilipay nga mga butang ang sarang mo mahimo. Halimbawa, nabinagbinag mo na bala nga duawon ang makawiwili nga mga duog sa imo mismo pungsod? Ukon ngaa indi na karon sugdan ang pagtuon sang lenguahe sang iban nga pungsod? Sa ulihi, ayhan mabuksan ang kahigayunan nga makakadto ikaw sa iban nga pungsod.
Apang, ano abi kon nagdesisyon ka nga magsaylo? Ang artikulo sa ulihi magabinagbinag kon paano ikaw magmadinalag-on sa pagpuyo sa iban nga pungsod.
[Footnote]
^ par. 15 Tan-awa ang artikulo nga “Pag-isip sang Bili sa Pagsaylo sa Manggaranon nga Pungsod,” sa Abril 1, 1991, nga guwa sang Ang Lalantawan, nga ginbalhag sang Watchtower Bible and Tract Society of New York, Inc.
[Laragway sa pahina 29]
Ang pila ka pamatan-on nagsaylo agod pasangkaron ang hilikuton nga pagbantala sang Ginharian
[Laragway sa pahina 30]
Hambali upod sa imo mga ginikanan ang mga benepisyo kag mga katalagman sang pagsaylo