Ang Pagtamod sang Biblia

Ang Pagpamalandong nga Mapuslanon

“KABAY NGA ANG MGA PULONG SANG AKON BABA KAG PAGPAMALANDONG SANG AKON TAGIPUSUON MANGIN MAKALILIPAY SA IMO ATUBANGAN, O JEHOVA NGA AKON IGANG KAG AKON MANUNUBOS.”—SALMO 19:14.

ANO ang kahulugan sa imo sang “pagpamalandong”? Kon ginasunod mo ang mga panudlo sang pila ka Nasidlangan nga mga relihion, mahimo ikaw magpati nga isa ini ka butang nga nagadala sing daku pa nga katin-aw sang panghunahuna ukon pinasahi nga kasanagan. Ang pagpamalandong nga ginahimo sa Budhismo nagapalig-on sang pagpablangko sa tanan nga panghunahuna. Ang iban nga mga sahi sang pagpamalandong nagapalig-on kuno nga pun-on ang imo hunahuna sang “kabug-usan nga mga kamatuoran sang kaalam.”

Apang tuhay sa sini ang pagtamod sang Biblia tuhoy sa pagpamalandong. Sa anong paagi? Binagbinaga ang halimbawa sa Biblia sang isa ka tawo nga naghingalan kay Isaac, nga sa edad nga 40 madamo sing dapat pamalandungan. Ang Genesis 24:63 nagasiling: “Si Isaac nagdayandayan sa guwa sa pagpamalandong sa latagon sa kasisidmon.” Wala sing rason sa paghaumhaum nga ginpablangko ni Isaac ang iya hunahuna ukon nga naghunahuna lamang sia sang isa ka indi maathag ‘kabug-usan nga kamatuoran sang kaalam.’ Mahimo nga may espesipiko nga mga butang nga ginhunahuna si Isaac, subong sang iya palaabuton, pagkapatay sang iya iloy, ukon kon sin-o ang iya palangasaw-on. Mahimo nga ginhinguyang niya ang pila sang pribado nga tion sa kagab-ihon sa pagpamalandong sa sinang importante nga mga butang. Sa Biblia, ang pagpamalandong indi lamang pagdalamguhanon.

May Kapin Pa sa Pagpamalandong

Binagbinaga ang halimbawa sang salmista nga si David. Madamo sia sing daw indi malubad nga mga problema, kag nahibaluan gid niya nga subong di-himpit nga tawo, kinahanglan niya ang bulig sang Dios agod makabuhat sia sing matarong. Ano ang nagpalig-on kay David nga malampuwasan ang mabudlay nga mga kahimtangan? Subong sang ginrekord sa Salmo 19:14, si David nagsiling: “Kabay nga ang mga pulong sang akon baba kag pagpamalandong sang akon tagipusuon mangin makalilipay sa imo atubangan, O Jehova nga akon Igang kag akon Manunubos.” Ang Hebreo nga tinaga diri nga ginbadbad “pagpamalandong” naghalin sa pangunang tinaga nga literal nga nagakahulugan sing “paghambal sa kaugalingon.” Huo, ‘naghambal sa kaugalingon’ si David tuhoy kay Jehova, sa iya mga hilikuton, sa iya mga binuhatan, sa iya mga kasuguan, kag sa iya pagkamatarong.—Salmo 143:5.

Sing kaanggid, ginkabig anay sang una nga mga Cristiano nga bahin sang matuod nga pagsimba ang pagpain sing tion agod pamalandungan ang espirituwal nga mga butang. Si apostol Pablo naglaygay: “Bisan ano man nga butang nga matuod, bisan ano man nga butang nga serioso nga hunahunaon, bisan ano man nga butang nga matarong, bisan ano man nga butang nga putli, bisan ano man nga butang nga hiligugmaon, bisan ano man nga butang nga ginahambal nga maayo, bisan ano man nga halangdon kag bisan ano man nga dalayawon, padayon nga binagbinaga ini nga mga butang.” (Filipos 4:8) Sa pagkamatuod, agod makahunahuna sing makapalig-on, ining “mga butang” nga ginhambal ni Pablo dapat magsulod sa aton mga hunahuna sa pila ka kahimtangan. Paano?

Ang salmista nagahatag sing sabat. Ang Salmo 1:1, 2 nagasiling: “Malipayon ang tawo nga wala nagalakat sa laygay sang mga malauton . . . Ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.” Huo, ang salmista nagabasa sang kasuguan sang Dios sing tayuyon. Makapamalandong dayon sia sa mga butang nga natun-an niya tuhoy sa Manunuga.

Pagpamalandong Karon

Ang pagbasa sang Biblia importante, apang pagkatapos sang pagbasa, dapat naton pamalandungan, hunahunaon sing maayo, ukon “hambalon ang aton kaugalingon” tuhoy sa aton nabasahan. Subong nga ang pagtunaw kinahanglanon agod makabenepisyo kita sing bug-os gikan sa pagkaon nga aton ginakaon, ang pagpamalandong kinahanglanon agod mahangpan naton ang aton nabasa sa Biblia. Ang nagakaigo nga pagpamalandong wala lamang nagadula sang negatibo nga mga panghunahuna. Nagatugot man ini sa aton nga binagbinagon ang mga pasad-sa-Biblia nga mga solusyon sa aton mga problema. Ina nga pagpamalandong makabulig sa aton nga maatubang sing madinalag-on ang mga kahuol sa adlaw-adlaw nga pagkabuhi.—Mateo 6:25-32.

Ginbaton ni salmista David ang papel sang pagpamalandong sa pagpahamuot sa Dios. Sia nagsiling: “Ang baba sang matarong amo ang nagabungat sing kaalam sa mahinay nga tingog.” (Salmo 37:30) Huo, ang pagpamalandong isa ka nagapakilala nga tanda sang isa ka matutom nga sumilimba. Ang kabigon sang Dios nga matarong isa ka matuod nga pagpakamaayo, kag nagadala ini sing espirituwal nga mga benepisyo. Halimbawa, ang Biblia nagasiling nga “ang banas sang mga matarong kaangay sang masanag nga kapawa nga nagasanag kag nagasanag tubtob sa himpit nga adlaw.” (Hulubaton 4:18) Busa, ang matinumanon nga Cristiano nga “nagabungat sing kaalam sa mahinay nga tingog” makapaabot nga mag-uswag sa paghangop sa Biblia.

Nagalaygay man ang Biblia sa mga Cristiano nga pamalandungan ang ila Makasulatanhon nga mga responsabilidad. Si apostol Pablo nagsiling kay Timoteo: “Binagbinaga ining mga butang; ukuri ini, agod nga ang imo pag-uswag makit-an sang tanan nga tawo. Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:15, 16) Huo, kon ano ang aton ginasiling kag ginahimo may daku nga epekto ini sa iban.

Sing maathag, may madamo kita nga rason agod hunahunaon sing maayo kag maukod ang importante nga mga butang. Importante nga pamalandungan ang aton nagligad nga mga eksperiensia, nagabinagbinag sang karon nga mga butang, kag mahunahunaon nga nagabinagbinag sang aton palaabuton. Apang labaw sa tanan, ang aton pagpamalandong magahatag sa aton sing pinakadaku nga kasanagan kon ang aton mga panghunahuna nasentro sa kaalam sang aton Manunuga, si Jehova nga Dios.

[Laragway sa pahina 16]

“The Thinker,” ni Rodin