Maayo nga Pagsakay sa Eroplano!

“Ang mga pagbiya sa de-pasahero nga mga eroplano nagakatabo sing halos makaisa sa isa ka semana,” siling sang isa ka report sa USA Today. Bisan pa ang kalabanan sini magagmay lamang nga mga hitabo ukon sayop nga mga patunda, ang pagbiya mahimo nga mangin mas mahapos kon sundon mo ang masunod nga mga panugda:

● MAGPANAPOT SING NAGAKAIGO. Magsuksok sing panapton nga komportable kag makahulaghulag ka sing maayo. Kon mahimo, ang mga panapton dapat nagatabon sang daku nga bahin sang imo lawas. Ang indi pikit nga mga delargo kag malaba sing pako nga blusa ukon kamisadentro ginarekomendar. Magsuksok sing panapton nga himo sa natural nga tela, subong sang cotton, de-lana, maong, kag panit. Ang mga sintetiko, subong sang rayon, polyester, kag naylon (ilabi na ang medyas), mahimo matunaw kon mainitan, nga mahimo bangdan sang malubha nga pagkapaso sang lawas kag mga batiis.

● IHANDA ANG HUNAHUNA. Hunahunaa ang imo himuon engkaso may emerhensia. Kon makalingkod ka na, pangitaa ang pinakamalapit nga guluwaan pang-emerhensia, lunsay sa unahan sang imo raya kag sa likuran sini. Pamatii ang mga instruksion sa kaluwasan nga ginahatag sang flight attendant antes maglupad. Repasuha ang safety card nga nagahatag sing mga detalye tuhoy sa mga pamaagi sa pagbiya.

● INDI MAGSALASALA. Kon may emerhensia, magpabilin nga kalmado kag sunda ang mga instruksion gikan sa mga tripulante. Kon kinahanglanon ang pagbiya, magkadto sa pinakamalapit nga guluwaan pang-emerhensia, nagabilin sang imo mga dala.

● MAGBIYA SA EROPLANO SING MAHALUNGON. Maglukso nga una ang mga tiil sa dalus-usan sa baylo nga magpungko agod magpadalus-os. Ikursimano ang imo mga butkon sa imo dughan. Magkatinkatin, kag ubaha ang mga sapatos nga may mataliwis nga mga takon. Sa tion nga makapanaug ka na, magpalayo sa eroplano, kag magbantay sa pang-emerhensia nga mga salakyan.

Makabulig gid bala ang pagsunod sa sining panuytoy? Huo! “Indi tanan nga aksidente sa eroplano makamamatay,” siling sang pamantalaan sang Federal Aviation Administration nga Intercom. Nagsiling pa ini: “Mga 50 porsiento sang tanan nga kamatayon sa komersial nga mga eroplano ang natabo sa mga aksidente nga mahimo kuntani malampuwasan.”