Paglab-ot sa mga Tulumuron

INTERNASYONAL nga maayong kabubut-on, paghiliutod, paghidait—sin-o ang indi magdayaw sa sining dungganon nga mga tulumuron? Ang nagpabalik sang Olimpiada, nga si Baron Pierre de Coubertin, nagpati nga ang mga hampang magadula sang pungsudnon nga mga pagribalay paagi sa pagpauswag sing dakung pagtahod sa mga manugpaindis-indis walay sapayan sang rasa, relihion, ukon sekso. Nagpati sia nga “ang mas maayo nga kalibutan mahimo lamang mapaluntad sang mas maayo nga mga indibiduwal.” Apang mapaluntad gid bala sang mga isport ang bug-os kalibutan nga paghidait? Pasad sa nagligad nila nga rekord, makasabat kita sing indi.

Samtang ang mga isport may kaugalingon nga duog, ang edukasyon gikan sa Biblia amo ang kinahanglan agod mapauswag ang bug-os kalibutan nga paghidait. Sa pagkamatuod, ang mga prinsipio sang Biblia makapatubas sing “mas maayo nga mga indibiduwal,” subong sang ginsiling  ni Coubertin. Binagbinaga ang pila ka kasulatan nga nagapauswag sing paghidait sa tunga sang mga indibiduwal nga nagasunod sini, walay sapayan sang ila nasyonalidad.

“Sa sini ang tanan makahibalo nga kamo mga disipulo ko, kon maghigugmaanay kamo.”—Juan 13:35.

“Kon mahimo, sa masarangan ninyo, magpakighidait sa tanan nga tawo.”—Roma 12:18.

“Samtang may kahigayunan kita sa sini, magbuhat kita sing maayo sa tanan.”—Galacia 6:10.

“Wala nagahimo sing bisan ano bangod sang pagbinaisay ukon bangod sang pagkamaiyaiyahon, kundi sing mapainubuson nga ginakabig ang iban nga labaw sa inyo.”—Filipos 2:3.

“Ang paghanas nga lawasnon may diutay nga kapuslanan; apang ang diosnon nga debosyon mapuslanon sa tanan nga butang, kay nagasaad ini sing kabuhi karon kag sa palaabuton.”—1 Timoteo 4:8.

Natigayon gid bala ang mga tulumuron nga ginhatag sa sining mga kasulatan? Binagbinaga ang natabo sa Munich, Alemanya. Sang 1974, duha lamang ka tuig pagkatapos sang mga Hampang sa Olimpiada nga ginhiwat sa sadto nga siudad ginmusingan sing terorismo kag pagpatay, ang mga Saksi ni Jehova naghiwat sing internasyonal nga kombension sa Olympic Stadium. Sa tunga sang iban pa nga tumalambong amo ang mga grupo halin sa Gresya kag Turkey—mga pungsod nga nagaaway. Sa katunayan, sadto mismo nga tig-ilinit, gin-awayan sang Griego kag Turko nga mga tropa ang isla sang Cyprus. Naapektuhan bala sini ang mga Cristiano nga nagtambong sa sining kombension? Wala! Makatalandog gid para sa mga manugpanilag nga makita ang mga Griego kag mga Turko nga nagahaksanay kag nagatawganay nga utod!

Ang mga Saksi ni Jehova kilala sa bug-os nga kalibutan tungod sang pagtigayon sing mahidaiton nga mga kaangtanan nga nagalandas sang pungsudnon, etniko, kag tribo nga mga balagbag. Sa pagkamatuod, wala sila nagapangangkon nga natigayon nila sing himpit ang tulumuron sang bug-os kalibutan nga paghiusa kag kooperasyon. Kaangay sang bisan sin-o pa, dapat sila mangabudlay sing lakas agod sundon ang laygay sang Cristianong si apostol Pablo: ‘Ubaha ninyo ang daan nga personalidad lakip ang mga buhat sini, kag isuklob ninyo ang bag-ong personalidad.’ (Colosas 3:9, 10) Walay sapayan sina, nagapati gid sila nga ang pagsunod sa mga prinsipio sang Biblia makabulig sa mga tawo nga ‘pangitaon ang paghidait kag sakdagon ini.’—1 Pedro 3:11.

Sing makapasubo, ang Olimpiada—walay sapayan sang mataas nga mga tulumuron sini—nagpadayag sang pinakamalaw-ay nga mga kinaiya sa madamo. Sa kabaliskaran, ang gamhanan nga Pulong sang Dios nagapadayag sang pinakamaayo sa mga tawo, nga nagapauswag sang internasyonal nga maayong kabubut-on kag paghidait.

[Mga laragway sa pahina 8]

Ang Olimpiada nagapauswag sang paindis-indis

[Kapsion]

Aus dem Fundus der MÜNCHNER OLYMPIAPARK GMBH, München

[Mga laragway sa pahina 9]

Ang Biblia nagapauswag sing paghidait