Ang Pagtamod sang Biblia

Dapat Bala Impluwensiahan sang ‘Zodiac’ ang Imo Kabuhi?

“MADAMO NGA PAMATAN-ON KAG HAMTONG ANG NAGAPANGITA SING MGA TANDA SANG ILA KAPALARAN SA MGA BITUON.”—PAPA JUAN PAULO II.

SUNO sa isa ka surbe, 1 sa kada 4 ka Amerikano ang nagagamit sang astrolohiya kon nagadesisyon. Indi lamang sa sina nga bahin sang kalibutan ginahimo ang pagkonsulta sa mga tanda sang astrolohiya. Halos sa bug-os nga kalibutan, ang zodiac ginakonsulta para sa laygay sa mga butang may kaangtanan sa pinansial, mga plano sa paglakbay, mga pagbag-o sing karera, mga petsa sang kasal, kag mga estratehiya militar. Mahatag kuno sang isa ka tanda sang zodiac ang impormasyon tuhoy sa mga palangasaw-on ukon palamanhon kag masugid pa gani kon sin-o nga mga mag-asawa ang indi magasahuay. Halin sa Sidlangan pakadto sa Katundan, minilyon ang nabihag sa astrolohiya. Apang ano ang ginhalinan sang zodiac?

Impormasyon Tuhoy sa Ginhalinan

Ang lainlain nga mga porma sang zodiac sarang mausoy sa pinakadumaan nga nakilal-an nga mga sibilisasyon. Bisan ang Biblia nagasambit sang “mga konstelasyon sang zodiac.” (2 Hari 23:5) Maathag gid nga ang zodiac ginakonsulta anay sang mga Hindu subong man sang mga Intsik, sang mga Egiptohanon, sang mga Griego, kag sang iban pa nga mga tawo. Apang, ang pinakauna nga pagsambit sa mga tanda sang zodiac masalapuan sa dumaan nga Babilonia.

Gin-imbento sang mga Babilonianhon ang astrolohiya sa panikasog nga makatigayon sing impormasyon tuhoy sa palaabuton. Samtang ginapanilagan sing maayo ang mga lakat sang mga butang sa kalangitan, ang detalyado nga mga tsart kag mga table ginhimo. Gikan sini, ang mga nagakatabo sa tawo kag sa duta ginpakot. Sa madamo nga hitabo ang mga desisyon sa politika kag militar wala ginahimo kon indi anay makonsulta ang mga astrologo sa paghatag sang ila laygay. Gani, ang saserdotenhon nga klase nga nagapangangkon nga may pinasahi nga kaalam kag labaw-sa-kinaugali nga mga gahom nakatigayon sing daku nga awtoridad. Sa katunayan, ang tanan nga kilala nga templo sa Babilonia nasangkapan sing isa ka obserbatoryo sa kalangitan.

Sa modernong panahon ang mga tanda sang zodiac padayon nga may importante nga papel sa kabuhi sang madamo nga tawo. Bisan yadtong wala nagapangangkon nga nagapati sa horoskopyo mahimo magtan-aw sini sa pulupanag-on subong kalingawan lamang ukon bangod sang pagkamausisaon. May mga pakot ang mga astrologo nga nagmatuod. Apang nagakahulugan bala ini nga ang pagkonsulta sa mga bituon mapuslanon? Sa  pagkamatuod, ano anay ang pagtamod sang dumaan nga mga alagad sang Dios sa pagkawili sa astrolohiya?

Natago nga mga Katalagman

Indi kaangay sa mga Babilonianhon, ang matutom nga mga Judiyo wala magbuhat sing astrolohiya​—⁠kag tungod sa maayo gid nga rason. Ang Dios maathag nga nagpaandam sa ila: “Indi dapat masapwan sa imo . . . ang bisan sin-o nga nagagamit sing pagpamakot, ang nagahimo sing madyik ukon ang bisan sin-o nga nagapangita sing tanda ukon ang manugbabaylan, ukon ang isa nga manugtiwtiw ukon ang bisan sin-o nga nagakonsulta sa espiritista ukon sa manugpakot sang mga hitabo ukon ang bisan sin-o nga nagakonsulta sa mga patay. Kay ang tanan nga nagahimo sining mga butang kalangil-aran kay Jehova.” *—Deuteronomio 18:10-12.

Ang mga alagad sang Dios nagtindog sing mabakod batok sa astrolohiya. Halimbawa, ang matutom nga si Hari Josias ‘nagpahalin . . . sa mga nagahimo sing mahalaron nga aso kay Baal, sa adlaw kag sa bulan kag sa mga konstelasyon sang zodiac.’ Ang ginhimo ni Josias “matarong sa mga mata ni Jehova,” kag ginpakamaayo sia sang Dios tungod sini. (2 Hari 22:​2; 23:5) Apang ang iban mahimo mamangkot, ‘Indi bala nagmatuod ang pila sang mga pakot sang mga astrologo?’

Sing makawiwili, sa Cristianong Griegong Kasulatan, mabasa naton ang tuhoy sa isa ka bata nga babayi nga ‘nagdala anay sing madamo nga ganansia sa iya mga agalon paagi sa paghimo sining mga buhat sang pagpamakot.’ Maathag nga ang pila sang mga butang nga ginpakot sining bata nga babayi nagmatuod, kay ang iya mga agalon nakapanginpulos gikan sa iya mga gahom. Apang sin-o ang sa likod sang ikasarang sining bata nga babayi sa pagpakot sang palaabuton nga mga hitabo? Ang Biblia nagasiling nga yara sia sa idalom sang impluwensia sang “espiritu, isa ka demonyo sang pagpamakot.”​—⁠Binuhatan 16:16.

Ginapakita sang Biblia nga “ang bug-os nga kalibutan yara sa gahom sang isa nga malauton,” si Satanas nga Yawa. (1 Juan 5:19) Paagi sa pagmaniobra sang mga hitabo agod magmatuod ang pila ka pakot, minilyon ang nabihag ni Satanas kag sang mga demonyo.

Ang simple nga kamatuoran amo nga ang astrolohiya isa sang “mga padugi sang Yawa,” nga ginagamit niya agod kontrolon kag impluwensiahan ang mga tawo sa paghimo sang iya katuyuan. Sa amo, indi gid makapakibot nga ang Biblia nagalaygay sa mga Cristiano sa ‘pagtindog sing malig-on’ batok sa tuso nga mga padugi ni Satanas​—⁠nga nagalakip sang astrolohiya. (Efeso 6:11) Apang nagakahulugan bala ini nga ginpabay-an na lamang kita nga wala sing bisan ano man nga panuytoy tuhoy sa palaabuton?

Ang Biblia—Isa ka Masaligan nga Tuytoy

Nasapwan sang minilyon ang Biblia subong isa ka masaligan nga tuytoy sa paghimo sing mga desisyon. Subong sang ginsiling ni salmista David, “ang pahanumdom ni Jehova masaligan, nga nagapaalam sa isa nga indi eksperiensiado.” (Salmo 19:​7; 119:​105) Wala ini nagakahulugan nga ginhatag sing detalyado sang Biblia kon ano ang dapat himuon sang isa ka tawo sa tagsa ka kahimtangan. Apang ang Pulong sang Dios may mga prinsipio nga makabulig sa aton sa paghanas sang aton mga ikasarang sa pagpangatarungan. Ini, naman, magabulig sa aton sa paghantop sing husto kag sayop kag magabulig sa aton sa paghimo sing maalamon nga mga desisyon.​—⁠Hebreo 5:⁠14.

Sa amo, may nagakaigo gid nga rason nga ang matuod nga mga Cristiano wala nagakonsulta sa mga horoskopyo, bisan subong kalingawan lamang ukon bangod sa pagkamausisaon. Sa baylo, maalamon nga ginapamatian nila ang mga paandam sang Pulong sang Dios batok sa tanan nga impluwensia sang demonyo, pati na ang malalangon nga mga porma. Paagi sa pagtugot sa Biblia sa baylo sang zodiac nga mag-impluwensia sang imo kabuhi, maagom mo ang pagpakamaayo sang Dios sing dayon.​—⁠Salmo 37:29, 38.

[Footnote]

[Laragway sa pahina 18]

Nasidlangan nga zodiac

[Laragway sa pahina 18]

Nakatundan nga zodiac