Isa ka Tumalagsahon nga Pagtabang

Sang koresponsal sang Magmata! sa BENIN

“NABUHI lamang ang tatlo ka lalaki bangod gintabangan sila sang mga Saksi ni Jehova!” Amo ina ang balita nga naglapnag kaangay sang sunog sa bug-os nga siudad sang Calavi, sa pungsod sang Benin sa Katundan nga Aprika, sang Mierkoles, Abril 19, 2000. Sin-o ining tatlo ka lalaki, kag ngaa natabangan sila sang mga Saksi ni Jehova?

Sang mga alas 6:30 s.a., sanday Philippe Elegbe kag Roger Kounougbe nagahanda sa pagtrabaho sa duog nga ginahiwatan sang asambleya sang mga Saksi ni Jehova nga nahamtang malapit sa sanga talatapan sang Benin sang Watch Tower Society. Pagkagab-i sadto ginatos ang magatipon didto para sa tuigan nga Memoryal sang kamatayon ni Jesucristo.⁠ * Sa hinali, isa ka mabaskog kaayo nga gahod ang nagtublag sa mahim-ong nga kalinong sang aga. Sa gilayon, nahibaluan nanday Philippe kag Roger nga may natabo nga aksidente sa karsada.

Pila ka segundo sang ulihi nabatian nila ang singgit sang isa ka tawo: “Ang akon tatlo nga kabulig natabunan sang mga sako sang semento!” Nagdalagan sanday Philippe kag Roger padulong sa karsada. Nakita nila didto ang isa ka 20-tonelada nga trak nga nagtakilid. Madamo nga sako sang semento ang nagdalhay halin sa trak.

Si Josué Didolanvi, isa man ka trabahador sa duog nga ginahiwatan sang asambleya, nga didto na sa lugar sang aksidente, nagbutong sang isa ka tawo sa ulot sang uluhan nga bahin sang trak kag sang mga sinako sang semento. Ang drayber, nga nagkamang paguwa sa trak, nakayasan. Apang, nakatipon pa sia sing kusog sa pagsinggit: “May duha pa ka tawo sa idalom sang mga sako sang semento!” Ginkuha sang pila ka tumalan-aw ang mga sako, apang nag-untat sila sang ulihi bangod sang tuman gid nga kainit. Bag-o lang maghalin ang semento sa hurnuhan sang pabrika!

Padulong sa Pagtabang

Nangabudlay sing lakas sanday Philippe, Roger, kag Josué sa isa ka tumpok nga sako sang semento, ginpanguha ini sing isa-isa. Bangod sang init kag sang 50-kilos nga kabug-at sang mga sinako, nagpalanakit ang ila mga kamot. Ang malain pa, ang semento naglusot halin sa nabusdik nga mga sako, nga nagpalap-ok sang ila mga tudlo kag nagpapin-ot sang ila pagginhawa. “Napaso ang akon mga kamot, ilabi na ang akon mga tudlo,” siling sang ulihi ni Josué. “Apang pirme ko ginhunahuna nga basi matabangan pa ang bisan sin-o man nga natabunan didto.”

Sa tapos makuha ang 40 ka sako sang semento, nakita sang tatlo ang isa ka banig. Sa ila daku nga kakibot, nakita nila didto ang duha ka tawo—sa idalom mismo sang banig. Buhi sila! Sang natabo ang aksidente, ining mga tawo didto gali sa likod sang trak nga nagatulog sa banig nga nagatabon sa mga sinako sang semento. Sang nagbulidbulid sila halin sa trak, ang banig nagtupa sa ibabaw nila, nga nag-amlig sa ila gikan sa makapalaso nga kainit sang mga sinako sang semento nga nagtabon sa ila.

Sa tion kag sa tapos sang pagtabang, nagtipon ang isa ka daku nga kadam-an sang tumalan-aw. Ang tanan natingala gid nga nahimo nanday Philippe, Roger, kag Josué ang pagpanguha sang duha-ka-tonelada nga tumpok sang sinako sang mga semento sing tuman kadasig kag sa idalom sining di-maayo nga mga kahimtangan. Nagdayaw man sila nga ining tatlo ka tawo handa sa paghimo sing tubtob amo sina agod tabangan ang mga tawo nga indi gani nila kilala. Wala madugay nabalitaan sang tanan nga taga-Calavi ang tuhoy sa ila isganan nga hinimuan.

[Footnote]

[Laragway sa pahina 31]

Si Roger nga nagauyat sang banig pagkatapos sang pagtabang