Sang ang Bukid Nagbuylog sa Dagat

SANG KORESPONSAL SANG MAGMATA! SA VENEZUELA

SA ULOT sang Caracas, ang kapital nga siudad sang Venezuela, kag sang dagat yara nahamtang ang 2000-metros nga bukid nga ginatawag El Ávila. Sa aminhan nga bahin amo ang makitid kag madamo sing pumuluyo nga pangpang. Ang daku nga erport sang Venezuela yara didto, kag agod makakadto sa Caracas halin sa erport, kinahanglan maglakbay ang mga turista paagi sa isa ka tanel nga nagalapos sa bukid.

Pagkatapos sang mabunok nga mga pag-ulan sang nagligad nga Disiembre, ang nahumog nga El Ávila indi na makasalupsop sing tubig. Ang mga banglid sini daw natiphag samtang ang linibo ka metros kubikos sang tubig naghuganas gikan sa bukid. Subong sang ginsiling sang isa ka tawo, daw subong bala nga ang bukid nagbuylog sa dagat. Ang mga kabalayan​—⁠halin sa hayubhayob pakadto sa mga villa​—⁠ginlamon sang nagahuganas nga tubig, lutak, mga bato, kag mga kahoy. Naanod ang mga katre, mga refrigerator, mga telebisyon, kag bisan mga tawo. Ang isa ka tigulang nga lalaki nagsiling nga pagdumdom niya katapusan na sang kalibutan.

Sang ulihi, naghulaw ang ulan, kag ang baha nagkulpa. Suno sa isa ka pagbanabana, mga 50,000 ka tawo ang mahimo nga napatay, kag 400,000 ang nadulaan sing puluy-an. Bangod sang nagakaigo nga mga rason, gintawag ini nga “ang pinakamalubha nga kinaugali nga kalamidad sa kasaysayan sang Venezuela.”

Haluson Nakapalagyo

Sang Disiembre 15, si Juan Carlos Lorenzo kag ang iya amay nakibon sa tunga sang duha ka nagabaha nga suba. Ginbiyaan nila ang ila salakyan kag nagbuylog sa 35 ka tawo sa sulod sang isa ka  tinukod. Apang, wala magdugay nagsugod sa paglambas ang tubig kag nagtaas ini sing hinali. Ang tanan nakasaka sa atop. Samtang, ang dalagku nga mga bato kag mga puno sang kahoy nagbunggo sa tinukod. Wala magdugay, ang mga dingding sa nahauna kag ikaduha nga panalgan nawasdak, amo nga mga haligi kag atop na lamang ang nabilin. Ang mahuyang nga tinukod nagatay-ug samtang nagpadayon ang pagbunggo.

Nag-abot ang isa ka helikopter, apang indi ini makahugpa sa mahuyang nga  tinukod. Sang nagpalayo ini, nagaluha nga nagpamilinbilin si Juan Carlos kag ang iya amay sa isa kag isa, nagalaum nga mapatay na sila. Nian duha ka helikopter ang nag-abot. Sing isaisa, ang tanan nga yara sa atop gin-alsa palayo sa katalagman samtang ang mga piloto eksperto nga nagalibotlibot sa ibabaw. Sang makahalin gid lang ang mga helikopter, napukan dayon ang tinukod sa nagabalingaso nga tubig. Iguigo gid lang sila nga nakapalagyo!

Gin-ibakwit ang mga tawo sing linibo​—⁠sa magagmay nga mga eroplano, sa dalan, kag sa mga sakayan sang soldado nga gindesinyo sa pagdungka sa mga baybayon. Ang malaba nga linya sang mga tawo​—⁠ang iban nagatibong sang ila kabataan⁠—​gintuytuyan paagi sa mga lubid sa balod pakadto sa mga sakayan. Samtang nasalbar sang iban ang pila ka personal nga pagkabutang, madamo ang nagbiya nga ang ginasuksok lamang nila nga panapton ang dala.

Mga Panikasog sa Pagbulig

Sa sanga talatapan sang mga Saksi ni Jehova sa Venezuela, ang mga panikasog sa pagbulig nagsugod sa gilayon nga nabalitaan ang tuhoy sa kalamidad. Apang, ang mga karsada natampukan ukon naanod. Pagligad sang pila ka adlaw, isa ka linya sang daku nga haywey ang ginbuksan para gamiton sa emerhensia, kag ang mga salakyan sang mga Saksi nga may dala nga mga suplay nga bulong kag hanas nga mga tawo ginpaagi. Ang isa ka opisyal nagsiling sang ulihi: “Nahibaluan gid sang panguluhan nga ang mga Saksi ni Jehova nalakip sa mga nauna nga nag-abot agod magbulig kag kuhaon ang mga tawo palayo sa duog.”

Nag-organisar ang mga Saksi sang mga tikang agod pangitaon ang mga nagakinahanglan sing bulig. Ginhimo ang mga kahimusan sa transportasyon agod madala ang mga nag-ibakwit pakadto sa Caracas, diin madamo ang nag-abot nga wala sing dala. Gintukod sa siudad ang mga duog sa pagkolekta agod ang pagkaon, panapton, kag medisina sarang mapanagtag sa mga tawo nga nagakinahanglan. Apang indi lamang pagkaon kag panapton ang kinahanglan sang kalabanan sa ila. Kinahanglan gid nila ang duog nga mapuy-an. Ang ila Cristianong mga kauturan malipayon nga nagsapupo sa ila.

Bisan madugay na nga natapos ang kalamidad, ang mga tawo may mga abyan kag mga himata nga nagadayon gihapon upod sa ila. Sanday Joel kag Elsa, mga Saksi sa Puerto Cabello, nagapuyo sa isa ka diutay nga apartment. Isa ka bulan pagkatapos sang bagyo, 16 gihapon ka tawo ang nagadayon sa ila. Madamo ang nadulaan indi lamang sang ila mga puluy-an kundi sang ila man mga trabaho. Ang ila ginatrabahuan nadula.

Sing makapasubo, ang masako anay nga palaliguan kag mga banwa malapit sa pantalan haluson nga indi na makilala. Ang pila ka salakyan nagalitib sa lutak, samtang ang iban naman nagatapik sa mga dingding, nagasambod sa mga poste, ukon nagadasok sa mga ganhaan ukon mga bintana. Ang isa ka anib sang nagtig-a nga lutak​—⁠tubtob sa tatlo ka metro ang kadamulon sa pila ka duog​—⁠gintunaan sang pagtaas kaayo sang mga kalye amo nga samtang nagalakat ang isa ka tawo sa sini, tupong lang sa iya ang mataas nga panalgan ukon bisan ang mga atop sang mga tinukod nga iya maagyan!

Ang iban sa Venezuela nagkomento nga ang kalamidad nagtudlo sa ila sing isa ka mapuslanon nga leksion​—⁠indi sila magsalig sa materyal nga mga butang. (Lucas 12:29-31) Nahangpan sang pila ang laygay ni Jesucristo: “Mag-untat kamo sa pagtipon para sa inyo kaugalingon sing mga bahandi sa duta, diin ginaut-ot sang sapatsapat kag sang tuktok, kag diin ginakuha kag ginakawat sang mga kawatan. Sa baylo, magtipon kamo para sa inyo kaugalingon sing mga bahandi sa langit, diin indi maut-ot sang sapatsapat kag sang tuktok, kag indi makawat sang mga kawatan. Kay kon diin ang imo bahandi, didto man ang imo tagipusuon.”​—⁠Mateo 6:19-21.

[Mapa/Mga laragway sa pahina 20, 21]

(Para sa kabug-usan sang teksto, tan-awa ang publikasyon)

VENEZUELA

Caracas

Duog sang kalamidad

COLOMBIA

[Laragway sa pahina 21]

Si Rubén Serrano, upod sang nabilin sang iya balay

 [Mga laragway sa pahina 22]

1.Ginatipon sang mga boluntaryo ang mga bulig sa Caracas

2, 3. Ginapala sang Kongregasyon sang Maiquetía ang nagbagtik nga lutak nga pito ka pie kataas gikan sa ila Kingdom Hall

4. Ining mga Saksi nadulaan sang ila mga balay kag nian nagboluntaryo sa pagtukod sing bag-o para sa ila kaugalingon kag sa iban

5. Isa sang malapit na mahuman nga mga balay sa San Sebastián de los Reyes