Ang Pagtamod sang Biblia

Mahatag Bala sang Siensia ang Kabuhi nga Walay Katapusan?

SANG nagligad nga mga tinuig, ina nga pamangkot daw indi mapatihan. Apang, karon, ginabinagbinag sing serioso sang pila ka tawo ang posibilidad. Sa karon, nadoble na sang mga sientipiko ang kalawigon sang kabuhi sang mga langaw kag mga ulod paagi sa paggamit sing mga pamaagi nga ginapatihan sang iban nga mahimo maaplikar sa mga tawo.

Ginapakita sang pagpanalawsaw nga ang normal nga selula sang tawo nagakapatay, nga nagatunga sing pila lamang ka beses. Pagkatapos sina nagauntat ini sa pagtunga. Isa ini ka proseso nga ginpaanggid sa isa ka duna nga relo nga nagakontrol kon san-o magtigulang kag mapatay ang mga tawo. Ginatinguhaan karon sang mga sientipiko nga ipasibu liwat ini nga relo.

Ang isa ka bantog nga teoriya nagasiling nga ang solusyon sa pagtigulang nasandig sa punta sang tagsa ka nahot sang DNA, isa ka bahin nga ginatawag telomere. Ang mga telomere ginpaanggid sa takop nga plastik sa punta sang higot sang sapatos, nga gindesinyo agod indi mabadbad ang mga higot. Natalupangdan sang mga sientipiko nga kada magtunga ang mga selula, ang mga telomere nagalip-ot kaangay sang nagasiga nga pabilo. Sa ulihi, daw nagalip-ot ang mga telomere tubtob sa punto nga ang mga selula nagauntat sa pagtunga. Apang, bangod sang isa ka enzyme, ang mga telomere wala nagalip-ot. Sa amo, suno sa teoriya, makahatag ini sa mga selula sing posibilidad nga magpadayon sa pagtunga sing walay latid. Ang isa ka opisyal sang isa ka kompanya nga nagapakigbahin sa sini nga hilikuton nagsiling: “Amo ini ang nahauna nga tion nga mahanduraw naton ang pagkadi-mamalatyon sang tawo.” Apang indi tanan nga sientipiko ang nagaugyon.

Kon Paano Nag-abot ang Kamatayon

Sa pagkamatuod, ang mga tawo nga nagatuo sa Biblia milenyo na nga nagapati sa posibilidad nga ang mga tawo magakabuhi sing walay katapusan. Wala sila nagasalig sa tawhanon nga mga sientipiko kundi sa Lantip nga Sientipiko, nga nagtuga sang tanan nga buhi nga butang, si Jehova nga Dios.​—⁠Salmo 104:​24, 25.

Ginapakita sang Biblia nga ang kamatayon sang tawo indi bahin sang katuyuan sang Manunuga. Gintuga ang unang mag-asawa sa larawan sang Dios kag ginbutang sa isa ka paraiso nga hardin. Himpit sila, nga wala sing depekto sa hunahuna ukon lawas. Bangod amo sina, may paglaum sila nga magkabuhi sing dayon sa duta. Amo sina ang luyag sang Dios para sa ila. Ginsugo niya sila nga magpanganak kag amat-amat nga pasangkaron ang Paraiso sa bug-os nga duta.​—⁠Genesis 1:​27, 28; 2:​8, 9, 15.

 Subong sang ginpakita sa Genesis kapitulo 3, si Adan, nga nakahibalo nga kamatayon ang silot, hungod nga nagrebelde batok sa Dios. Dugang pa, paagi sa paglakat sa dalanon sang pagkadi-matinumanon, gindala niya ang sala kag kamatayon sa iya wala pa matawo nga kaanakan. Ginpaathag ini ni apostol Pablo sa sining paagi: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Sa iban nga hambal, bangod nagpakasala si Adan, ang iya lawas indi na himpit. Amat-amat sia nga nagtigulang kag napatay. Napanubli sang iya kaanakan ina nga depekto.

Busa ang tawhanon nga kamatayon resulta sang pagrebelde ni Adan kag sang nagsunod nga paghukom sang Dios. Indi magmadinalag-on ang tawo sa pagbaliskad sina nga paghukom. Bisan pa nga ang siensia nakahimo sing madamo nga pag-uswag sa medisina, ang inspirado nga mga pulong ni Moises, nga ginsulat sang nagligad nga 3,500 ka tuig, matuod gihapon: “Ang mga adlaw sang amon mga tuig kapituan ka tuig; kag kon bangod sang pinasahi nga kabaskog ini kawaluan ka tuig, apang ang ila kabakod yara sa mabudlay kag makahalalit nga mga butang; kay maabtik ini nga nagalipas, kag sa malayo kita nagalupad.”​—⁠Salmo 90:⁠10.

Ang Aman ni Jehova Para sa Kabuhi nga Walay Katapusan

Sing makalilipay, may paglaum! Bisan pa nga sa karon ang tanan nga tawo nagakapatay sa ulihi, indi katuyuan ni Jehova nga magapadayon sing walay latid ini nga kahimtangan. Samtang takus nga mapatay sanday Adan kag Eva, nahibaluan sang Dios nga madamo sa ila wala pa matawo nga kabataan ang magahulag sing mainapresyahon sa iya mahigugmaon nga panuytoy. Para sa sina nga katawhan naghimo sia sing aman para sa dayon nga kabuhi sa duta. Ang salmista nagsulat: “Ang mga matarong magapanag-iya sang duta, kag magapuyo sila sing dayon sa sini.” (Salmo 37:29) Apang paano ini matuman?

Indi ini matabo subong resulta sang paghibalo sang mga tawo sang mga tanhaga sang DNA. Sa baylo, ang kabuhi nga walay katapusan isa ka dulot nga ihatag ni Jehova sa mga nagapakita sing pagtuo sa iya. Bangod nakahibalo nga kinahanglan nga luwason ang kaanakan nanday Adan kag Eva, gin-aman niya ang isa ka paagi agod makatigayon sila sing kabuhi nga walay katapusan​—⁠ang halad gawad ni Jesucristo. Ginpatuhuyan ni Jesus ini nga aman sang sia nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”​—⁠Juan 3:⁠16.

Kaangay ni Adan, si Jesus isa ka himpit nga tawo. Apang indi kaangay ni Adan, si Jesus himpit nga nagtuman sa Dios. Sa amo nahalad ni Jesus ang iya himpit tawhanon nga kabuhi subong bayad sa sala ni Adan. Paagi sa sining mahigugmaon nga buhat, nga nagbalanse sang timbangan sang hustisya, sarang na mahilway ang kaanakan ni Adan gikan sa katagudilian sang kamatayon. Sa ulihi, ang tanan nga nagapakita sing pagtuo kay Jesus magabaton sang dulot sang Dios nga kabuhi nga walay katapusan.​—⁠Roma 5:​18, 19; 1 Timoteo 2:​5, 6.

Kon nalandas sang mga tawo ang pagkadi-himpit kag natigayon ang kabuhi nga walay katapusan para sa ila kaugalingon, indi na kuntani kinahanglan ang gawad. Ang Biblia nagahatag sining maalamon nga laygay: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan. Ang iya espiritu nagaguwa, nagabalik sia sa iya duta; sa amo nga adlaw nagakawala ang iya mga hunahuna. Malipayon ang tawo nga may Dios ni Jacob para sa iya bulig, nga ang paglaum yara kay Jehova nga iya Dios, ang Manughimo sang langit kag duta, sang dagat, kag sang tanan nga yara sa ila, ang Isa nga nagahupot sang pagkamatuod tubtob sa walay latid nga tion.”​—⁠Salmo 146:3-6.

Ang kabuhi nga walay katapusan matigayon, indi gikan sa sientipiko nga pagpanalawsaw, kundi gikan kay Jehova. Kon ano man ang tuyo nga himuon sang Dios, masarangan kag himuon niya ini. “Sa Dios wala sing pahayag nga mangin imposible.”​—⁠Lucas 1:⁠37.

[Ginkuhaan sang laragway sa pahina 18]

© Charles Orrico/SuperStock, Inc.