Ang Pagtamod sang Biblia

Ang Imo Ginapili nga Pagpabulong—Importante Bala?

ANG masakit, balatian, kag kahalitan kinaandan gid sa katawhan. Kon nagaatubang sining mga kaaway sang kapagros, madamo ang nagapangita sing kaumpawan paagi sa pagpabulong. Ginakilala ni Jesucristo ang mahimo nga benepisyo sining mga panikasog, nagabaton nga ‘ang mga mapagros wala nagakinahanglan sing manugbulong, kundi ang mga nagabalatian.’​—⁠Lucas 5:⁠31.

Ang manunulat sang Biblia nga nagsulat sining mga pulong, si Lucas, isa mismo ka manugbulong. (Colosas 4:14) Ayhan sang naglakbay sila nga magkaupod, nakabenepisyo si apostol Pablo bangod sa pagkasampaton ni Lucas sa medisina. Apang ang Kasulatan bala nagahatag sing mga panuytoy sa kon ano nga sahi sang pagbulong ang dapat batunon sang mga Cristiano? Importante bala ang ginapili mo nga pagpabulong?

Makasulatanhon nga mga Panuytoy

Ang Biblia makatuytoy sa isa ka tawo sa paghimo sing maalamon nga mga desisyon may kaangtanan sa pagpabulong. Halimbawa, ginapaathag sang Deuteronomio 18:​10-​12 nga ang mga buhat subong sang pagpamakot kag madyik “makangilil-ad” kay Jehova. Ang “pagbuhat sing espiritismo,” nga batok sini nagpaandam si Pablo, nagalakip sining ginadumilian nga mga buhat. (Galacia 5:​19-21) Busa, ginalikawan sang matuod nga mga Cristiano ang bisan ano nga pamaagi sang pagsayasat ukon pagbulong nga maathag nga may kaangtanan sa espiritismo.

Ginapakita man sang Biblia ang mataas nga pagpabalor sang Manunuga sa pagkabalaan sang kabuhi kag dugo. (Genesis 9:​3, 4) Determinado nga sundon ang sugo nga ‘maglihi sa dugo,’ ang mga Saksi ni Jehova nagapangindi sa mga pamaagi sa pagbulong nga nagalapas sang sugo sang Biblia nga maglihi sa dugo. (Binuhatan 15:​28, 29) Wala ini nagakahulugan nga ginasikway nila ang tanan nga pagbulong. Sa baylo, ginatinguhaan nila nga makita ang labing maayo nga pag-atipan nga posible para sa ila kaugalingon kag sa ila kabataan. Apang nagapangabay sila sa nagaatipan-sang-kapagros nga mga propesyonal nga magbulong  sing nahisuno sa ila relihioso nga mga pagpati.

Binagbinaga ang Imo mga Tikang

Si Hari Solomon nagpaandam nga “ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” (Hulubaton 14:15) Bisan pa kon ang desisyon sa paagi sang pagbulong wala nagasupak sing talangkod sa mga prinsipio sang Biblia, dapat ‘binagbinagon [sang isa] ang iya mga tikang.’ Indi tanan nga porma sang pagbulong mabuligon. Sang nagsiling si Jesus nga ang ‘mga nagamasakit nagakinahanglan sing manugbulong,’ wala niya gin-aprobahan ang tanan nga pagbulong nga matigayon sang iya adlaw. Nahibal-an niya nga ang pila ka porma sang buhat sa medisina maayo kag ang iban indi.⁠ *

Sa karon man, ang iban nga pagbulong mahimo nga wala pulos, malimbungon pa gani. Ang kakulang sing maayo nga paghantop makapadayag sa isa sa di-kinahanglanon nga mga katalagman. Dapat man batunon nga ang isa ka pagbulong nga mabuligon sa isa ka tawo mahimo nga indi epektibo​—⁠makatalagam pa gani​—⁠sa iban. Kon kinahanglan magdesisyon tuhoy sa pagpabulong, dapat binagbinagon sing maayo sang maalamon nga tawo ang iya mga pililian sa baylo nga ‘tuuhan ang tagsa ka pulong,’ bisan kon nagabaton sing laygay gikan sa maayo-sing-tinutuyo nga mga abyan. Dapat niya ipakita ang “kaligdong sa hunahuna” paagi sa pagpangita sing masaligan nga impormasyon agod mangin yara sa kahimtangan nga makahimo sing may ihibalo nga pagpili.​—⁠Tito 2:⁠12.

Mangin Realistiko kag Makatarunganon

Nagakaigo nga magkabalaka ang isa sa iya kapagros. Ang paghatag sing balanse nga atension sa pisikal nga kaayuhan nagapakita sing apresasyon sa dulot nga kabuhi kag sa Dios nga Tuburan sini. (Salmo 36:9) Walay sapayan nga nagatinguha nga makatigayon sing nagakaigo nga pagpabulong, dapat mangin balanse ang mga Cristiano sa mga butang may kaangtanan sa kapagros. Halimbawa, kon ang maayo sing panglawas nga tawo nangin mahunahunaon sing sobra sa kapagros kag maayo nga panglawason, mahimo ini tunaan nga malimtan niya ang “mas importante nga mga butang.”​—⁠Filipos 1:​10; 2:​3, 4.

Ang isa ka malubha nga balatianon nga babayi sang panahon ni Jesus “naghinguyang sang tanan niya” sa pagpangayo sing bulig sang mga manugbulong agod bulngon ang iya malubha nga balatian. Ano ang resulta? Sa baylo nga mag-ayo, naglain tapat ang iya kahimtangan, nga mahimo gintunaan sang iya daku nga kalugaw-an. (Marcos 5:​25, 26) Ginhimo niya ang tanan nga masarangan niya agod matigayon ang kaumpawan, apang wala sing nagmadinalag-on. Ginapadaku sang iya eksperiensia ang mga limitasyon sang siensia sa medisina sadtong panahon niya. Bisan karon, walay sapayan sang moderno nga pagpanalawsaw sa medisina kag teknolohiya, nasapwan sang madamo nga tawo ang ila kaugalingon sa amo nga kahimtangan. Gani importante nga matigayon ang realistiko nga pagtamod sa kon ano ang mahimo sang siensia sa medisina. Ang himpit nga panglawas indi matigayon sa karon. Nahisayran sang mga Cristiano nga ang tion sang Dios sa ‘pag-ayo sa mga pungsod’ sa palaabuton pa. (Bugna 22:​1, 2) Gani, dapat naton palambuon ang isa ka balanse nga pagtamod sa pagpabulong.​—⁠Filipos 4:⁠5.

Maathag nga ang mga ginapili naton importante. Bangod sina, kon kinahanglan magdesisyon tuhoy sa pagpabulong, ang aton ginapili dapat magpabanaag sang aton handum nga maayo nga panglawas kag sang aton handum nga mahuptan ang isa ka maayo nga kaangtanan sa Dios. Samtang ginahimo naton ini, padayon kita nga makalaum sing masinaligon sa katumanan sang saad ni Jehova nga sa makalilipay nga bag-ong kalibutan nga magaabot, “wala sing pumuluyo nga magasiling: ‘Nagamasakit ako.’”​—⁠Isaias 33:⁠24.

[Nota]

[Retrato sa pahina 26]

“The Doctor,” 1891, ni Sir Luke Fildes

[Credit Line]

Tate Gallery, London/Art Resource, NY