Kauna ang Imo Utan!

SUNO SA MANUNULAT SANG MAGMATA! SA BRAZIL

“Mapait ini.” “Kalain gid sang sabor sini.” “Wala pa ako makakaon sini.”

AMO ini ang pila lamang sang mga rason kon ngaa ang madamo wala nagakaon sing utan. Kamusta ka naman? Nagakaon ka bala sing utan adlaw-adlaw? Ang Magmata! naghimo sing mga interbyu agod hibaluon kon ngaa ang iban nga mga tawo nanamitan sing utan kag kon ngaa ang iban naman wala.

Ang mga tawo nga nagakaon sing utan nagsiling nga gintudluan sila sang ila mga ginikanan sang pagkaimportante sang pagkaon sing mga utanon kag prutas. Sa kabaliskaran, madamo sang indi maluyagon sing utan ang wala naanad sa pagkaon sini sang bata pa. Sa baylo, ginpasulabi pa nila ang indi masustansia nga pagkaon (junk food). Apang, bisan sila nagaugyon nga ang utan importante sa paghupot sing maayo nga panglawas.

Mga ginikanan, tudlui ang inyo mga kabataan sa pagkaon sing utan! Paano? Ang Facts for Life, nga ginbalhag sang United Nations Children’s Fund, nagsiling nga sa di-magkubos makaisa sa isa ka adlaw matapos pasusuhon ukon patition-sa-bibiron, ang mga lapsag nga mga anom ka bulan ang edad dapat pakaunon sing mga utan nga ginlaga, ginpanitan, kag nian gindunot. Kon mas nanarisari ang pagkaon, mas maayo ini para sa bata. Si Dr. Vagner Lapate, isa ka espesyalista sa bata sa Brazil, nagsiling nga samtang ang gatas amo ang panguna nga kalan-on sa nahauna nga duha ka tuig, ang paghatag sing iban pa nga mga pagkaon “nagapalig-on sa bata nga matilawan ang bag-o nga mga sabor.”

Sa libro nga Medicina—Mitos y Verdades (Medisina​—⁠Mga Mito kag Kamatuoran), si Carla Leonel nagapanugda nga ang diutay nga kadamuon sang duga sang kahil, gindunot kag ginsamo nga mga prutas (subong sang saging, mansanas, kag kapayas), cereal, kag ang sabaw sang utan mahimo ipakaon sa bata sing mas maaga pa sangsa ginpanugda sa ibabaw. Siempre pa, sanglit lainlain ang opinyon tuhoy sa sini, mas maayo nga konsultahon mo ang imo pediatrisyan.