Paggamit sing Maayo sa Isa ka Epektibo nga Video

SANG 12 anyos pa lang si Tillie, ginhimuslan niya ang kahigayunan nga makapanaksi sa eskwelahan. Ginatun-an sadto sa ila klase ang Bug-os Kalibutan nga Inaway II, kag nag-utwas ang tema tuhoy sa Holocaust. Ginsilingan ni Tillie ang iya maestra nga indi lamang mga Judiyo kundi pati man mga Saksi ni Jehova ang ginpaantos kag ginpatay sa sining makasiligni nga tion. Nagsugot ang maestra nga dalhon ni Tillie sa klase ang video nga Purple Triangles. Antes ipasalida ang video, nagsiling ang maestra sa klase: “Bangod madamo kaayo nga Judiyo ang ginpatay sa tion sang Holocaust, wala na matalupangdi ang madamong iban pa nga ginhingabot. Ang mga Saksi ni Jehova nalakip sa sini nga mga grupo.”

Nagdayaw gid ang maestra sa video amo nga ginpahulam niya ini sa isa pa ka maestra agod gamiton sa iya klase. Nadumduman ni Tillie nga ang magulang nga lalaki sang iya maestro sang ikap-at nga grado sia ginpatay man sang mga Nazi sa tion sang Holocaust. Gindala niya ang video sa amo nga maestro, kag gintan-aw ini sang maestro sadto mismo nga gab-i.

Sa kabug-usan, kapin sa 60 ka tawo ang nakatan-aw sang Purple Triangles, kag napukaw ang daku nga interes. Natabo ini tanan bangod sang kaisog sang isa ka bata nga babayi nga maghambal tuhoy sa iya relihion.​—⁠Salmo 8:⁠2.