Isa ka Kolektor nga Luyag Magpadungog sa Manunuga

SANG napatay ang isa ka Amerikano nga eskultor kag kolektor sang alibangbang nga si Herman Strecker sang nagligad nga siglo, ginbilin niya ang pinakadamo sadto kag pinakaimportante nga koleksion sang mga alibangbang kag mga sugbasugba sa Amerika. Ang kalabanan sang iya koleksion, nga mga 50,000 ka espesyi, yara karon sa Field Museum sa Chicago, Illinois, E.⁠U.⁠A. Ang isa ka espesyi sang higante nga silk moth gikan sa Bagatnan nga Amerika nangin talalupangdon sa koleksion bangod sang ngalan sini. Sa iya libro nga Lepidoptera, ginpaathag ni G. Strecker nga wala niya ginhingadlan ini nga espesyi sunod sa pila ka indibiduwal nga mahimo naghatag sa iya sang isa ka sinalusalo ukon nagpautang sang kuwarta.⁠ * Sa baylo, ginhingadlan niya ini sunod sa Manunuga. Sa sining paagi, ining “labing dalayawon” nga espesyi magapatuhoy sang panghunahuna sang mga tawo nga makakita sini sa Dios. Gani, bangod luyag ni G. Strecker nga padunggan ang Manunuga, ining silk moth may sientipiko nga ngalan karon nga Copiopteryx jehovah.

Apang, ang pila sang mga kadungan ni G. Strecker nagpamatok sa paggamit niya sang ngalan sang Dios, subong sang ginsulat sang isa ka kritiko, “ginapatalupangod sang ngalan sa serioso kag mahunahunaon nga mga tawo ang tanan nga butang nga sagrado.” Tuhoy sina, si G. Strecker nagsabat: “Kon amo sina ang matabo, nian malipayon gid ako sa akon ginpili, kay para sa akon ang bisan ano man nga butang nga makapahunahuna sa aton sa Manunuga . . . maayo gid; kag ano pa bala ang maayo sangsa pamalandungan ang sagrado nga mga butang,​​—⁠ang mga ebidensia sang pagkahalangdon kag gahom sang Supremo nga Persona?” Gani, ang kolektor nga si Strecker naghinakop: “Indi ako makapati nga may makatarunganon nga magapamatok sa paggamit ko sa ngalan sang Manunuga sa isa sang Iya labing makawiwili nga binuhatan.”

Ang debosyon ni Strecker kag ang iya pagtahod sa Manunuga talalupangdon gid. Ang mga Cristiano karon nagahalong sa paggamit sa mahimayaon nga ngalan ni Jehova sa dungganon nga mga paagi.

[Nota]

[Retrato sa pahina 31]

Si Herman Strecker

[Credit Line]

Si Herman Strecker: Gikan sa libro nga The Passing Scene, Vol. 8/The Historical Society of Berks County

[Retrato sa pahina 31]

(Aktuwal nga kadakuon)