Ang Seguro nga Ginakinahanglan sang Tanan

NAGAPUYO ka man sa duog diin ang seguro kinaandan lamang ukon diin wala ini nagaluntad, may isa ka sahi sang seguro nga mahimo kag dapat tigayunon sang tanan. Sanglit ang “seguro” mahimo magpatuhoy sa “isa ka paagi sang paggarantiya sa pangamlig ukon kaluwasan,” paano mo matigayon ini nga sahi sang seguro?

Matigayon mo ini paagi sa paghimo sing praktikal nga mga tikang agod buhinan ang mga katalagman nga sa sini nadayag ka. Ang Biblia nagasiling nga apektado ang tanan sang “tion kag wala ginapaabot nga hitabo.” (Manugwali 9:11) Apang, paagi sa indi paghimo sing di-kinahanglanon nga mga pagpasimpalad, ang posibilidad nga mag-antos sing kasamaran ukon kadulaan mabuhinan.

Hunahunaa ang Palaabuton

Ang pagpakita sing praktikal nga kaalam isa ka pangamlig. Sa panahon nga daw may kabuganaan sa pangabuhi, mahimo makasupot para sa tingulan​—⁠sa panahon sang kinahanglanon. Sang una nga panahon ginpakilala ni Jose, nga isa ka mahinadlukon-sa-Dios nga tawo, ang iya kaugalingon subong “isa ka tawo nga mainandamon kag maalamon” paagi sa pagtipon sing pagkaon para sa bug-os nga pungsod sang Egipto sa tion sang kabuganaan. Sang nakaeksperiensia sing tiggulutom ang pungsod, naamanan ni Jose indi lamang ang mga Egiptohanon kundi ang iya man pamilya bangod sang ginhimo niya.​—⁠Genesis 41:​33-36.

Ang paghaganhagan sa aton ginakonsumo mangin isa man ka pangamlig. Makasupot kita sing kuwarta kag mabuhinan ang kahuol paagi sa indi pirme paghingamo sang pinakaulihi nga gadyet, moda, ukon kalingawan​—⁠isa ka dalanon nga may diutay ukon wala gid sing madugang sa aton matuod nga kalig-unan. Sa katunayan, subong sang ginsambit na, kon ang isa ka tawo may mas madamo nga materyal nga pagkabutang, mas daku ang posibilidad nga makawatan ukon madulaan.​—⁠Lucas 12:⁠15.

Mangin Mahunahunaon sa Kaluwasan

Mabuhinan naton sing daku ang katalagman sa kabuhi paagi sa pagkamangin mahunahunaon sa kaluwasan. Pila ka masubo nga mga aksidente sa salakyan ang nalikawan kuntani kon ang tanan nagmaneho sing mahalungon kag sa hilway-sa-peligro nga kadasigon? Hunahunaa, man, kon daw ano kadamo nga kabuhi ang mahimo kuntani naluwas kon wala sing isa nga nagmaneho samtang kapoy kaayo ukon nakainom sing alkohol. May  yara man iban pa nga mga katalagman sa pagmaneho nga mahimo naton malikawan.

Halimbawa, sa pila ka pungsod ginadumili sang kasuguan ang paggamit sing cellular telephone samtang nagamaneho. Ginpakita sang isa ka pagtuon nga ini nga paggamit nagadugang sa katalagman nga maaksidente sing apat ka pilo. Amo man sini ka daku ang katalagman nga maaksidente samtang nagamaneho nga may 0.1 porsiento nga nibel sang alkohol sa dugo, ang punto nga sa sini sa madamo nga duog ang isa ka tawo ginakabig sang kasuguan nga hubog kaayo agod magmaneho.

Ang pirme nga paggamit sing mga seat belt nagabuhin man sang katalagman nga mapatay ang mga tsuper kag mga pasahero. Apang indi gid paghunahunaa nga ang pagtigayon sing mga kagamitan sa kaluwasan subong sang seat belt kag air bag ukon ang pagtigayon sing seguro nagakahulugan nga indi na peligruso nga magpasimpalad. Ginapakita sang panalawsaw nga ini nga panghunahuna nagadul-ong sa dugang pa nga mga aksidente.

Ang mangin mahunahunaon sa kaluwasan isa man ka maayo nga seguro sa puluy-an kag sa ulubrahan. Nagapuyo ka bala kag nagatrabaho sa mga lugar nga hilway sa mga katalagman? Manghulonghulong. May butang bala sa alagyan nga mahimo masandaran sang mga tawo? Ang matalom nga mga butang ukon mainit nga mga kasangkapan​—⁠kalan, heater, plantsa​—⁠nahamtang bala diin mahimo mapilas ukon mapaso ang mga tawo? May nasupot bala nga papel ukon iban pa nga mga butang nga mahimo masunog? Mangin alisto ilabi na sa mga katalagman sa mga kabataan. Halimbawa, ang alkoholiko bala nga mga ilimnon kag tanan nga makahililo nga mga produkto sa pagpaninlo indi malab-ot sang magagmay nga mga kabataan?

Amligi ang Imo Panglawas

Paagi sa pagkamahunahunaon sa panglawas sa makatarunganon nga paagi, mabuhinan mo ang imo katalagman nga magmasakit. May kaangtanan sini, ang ihibalo mahimo mangin isa ka sahi sang seguro. Mangin alisto sa mga butang nga makatalagam sa imo panglawas, kag maghulag gilayon kon may problema sa panglawas. Sing mas importante pa, tun-i kon paano amligan ang imo panglawas kag ang iya sang imo pamilya. Dumduma ang karaan nga hulubaton: “Ang isa ka onsa nga pangtapna takus sa isa ka libra nga bulong.”

Ang Magmata! madugay na nga nagaaman sing impormasyon nga nagapalig-on sa mga tawo sa pagkabuhi nahisuno sa mga prinsipio sang Biblia kag sa amo nalikawan ang mga ugali kag mga estilo sang pagkabuhi nga makahalalit sa panglawas. Halimbawa, lakip sa madamong butang nga ginbinagbinag sang Magmata! amo ang pagkaimportante sang katinlo, nagakaigo nga pagkaon, bastante nga tulog, kag tayuyon nga pag-ehersisyo subong man ang kinahanglanon nga kontrolon ang kahuol kag ang lakat sang kabuhi.

Isa ka Importante Gid nga Sahi sang Seguro

Sa sining di-himpit nga kalibutan, ang seguro mahimo mangin isa gid ka praktikal nga kagamitan, apang wala sing polisa sa seguro ang bug-os nga makaamlig sa aton ukon bug-os nga makabalik sang mga nadula sa aton. Apang, matigayon  man nila ukon indi ang seguro, may mga tawo nga nagasalig nga indi sila pagpabay-an. Ngaa? Bangod kon mahanabo ang mga kalamidad, ang matuod nga mga sumilimba ni Jesucristo​—⁠ang mga nagaalagad sa iya Amay, si Jehova nga Dios​—⁠nagahimo sang ila masarangan agod mapakanay ang mga lulan sang isa kag isa.​—⁠Salmo 83:​18; Santiago 2:​15-17; 1 Juan 3:​16-18.

Dugang pa, si Jehova mismo nagasaad nga indi gid niya pagpabayaan ang iya matutom nga mga alagad. Ang salmista sa Biblia nagsulat: “Kon magbiya sa akon ang akon amay kag akon iloy, nian si Jehova magasapopo sa akon.” (Salmo 27:10) Subong Tuburan sang kabuhi, mabanhaw ni Jehova ang mga tawo nga mapatay, kag suno sa Biblia, ginhatagan niya ang iya Anak, nga si Jesucristo, sing gahom sa pagbanhaw sa minatay. (Salmo 36:​9; Juan 6:​40, 44) Apang, ginapakita sang Pulong sang Dios nga indi tanan banhawon. (Juan 17:12) Paano, nian, naton mapat-od nga dumdumon kita sang Dios sa pagkabanhaw?

Sa iya bantog nga Sermon sa Bukid, si Jesus nagpamulong, kon sa aton pa, tuhoy sa labing masaligan nga sahi sang seguro. Sia nagsiling: “Mag-untat kamo sa pagtipon para sa inyo kaugalingon sing mga bahandi sa duta, diin ginaut-ot sang sapatsapat kag sang tuktok, kag diin ginakuha kag ginakawat sang mga kawatan. Sa baylo, magtipon kamo para sa inyo kaugalingon sing mga bahandi sa langit, diin indi maut-ot sang sapatsapat kag sang tuktok, kag indi makuha kag makawat sang mga kawatan. Kay kon diin ang imo bahandi, didto man ang imo tagipusuon.”​—⁠Mateo 6:​19-21.

Sa masami ang mga tawo nagasupot sing kuwarta sa paglaum nga magapasalig gid ini sa ila sing isa ka mas masulhay nga pagkabuhi kon magtigulang na sila. Apang, ginpakilala ni Jesus ang isa ka mas malig-on nga sahi sang seguro. Ang balor sini indi mabanta, kag indi gid ini mapaslawan! Sia nagpaathag: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—⁠Juan 17:⁠3.

Paagi sa pagkuha sing sibu nga ihibalo tuhoy sa Dios kag sa iya Anak kag sa pag-aplikar sang aton natun-an sa aton kabuhi, makatukod kita sing maayo nga rekord sa Dios. (Hebreo 6:10) Ginpadaku nanday apostol Pedro kag Juan, nga nagpasad sang ila pagtuo sa panudlo sang ila Agalon, nga si Jesucristo, nga ang karon nga sistema sang paggahom sang tawo laglagon. Apang, si Juan nagpaathag: “Sia nga nagahimo sang kabubut-on sang Dios nagapabilin sing dayon.”​—⁠1 Juan 2:​17; Mateo 24:​3, 14; 2 Pedro 3:​7, 13.

Makasalig kita nga kon nagaalagad kita sa Dios kag napatay, banhawon man niya kita ukon kon magkabuhi kita tubtob sa tion nga tapuson niya ining sistema sang mga butang, amligan niya kita nga buhi pasulod sa iya matarong nga bag-ong kalibutan. Sa pagkamatuod, ang saad sang Dios amo ang ‘pagpahid sa tagsa ka luha sa [aton] mga mata’ kag sa paghimo sang ‘tanan nga butang nga bag-o.’ (Bugna 21:​4, 5) Ang pag-alagad sa Dios kag pagsalig sa iya mga saad amo gid ang pinakamaayo nga seguro sa tanan. Kag matigayon ini sang tanan.

[Mga retrato sa pahina 8, 9]

Ang mangin mahunahunaon sa kaluwasan kag panglawas isa ka sahi sang seguro

[Retrato sa pahina 10]

Ang pagtuon tuhoy sa Dios kag paghimo sang iya kabubut-on amo ang pinakamaayo nga seguro para sa palaabuton