Ang Pagtamod sang Biblia

Dapat Bala Kita Magtambong sa Cristianong mga Miting?

“NAGASIMBA anay ako, apang karon wala na.” “Para sa akon, masimba mo ang Dios bisan diin, indi lamang sa simbahan.” “Nagatuo ako sa Dios kag sa Biblia, apang wala ako nagapati nga kinahanglan pa magkadto sa simbahan.” Nakabati ka na bala sing kaanggid nga mga ekspresyon? Nangin kinaandan na nga isiling ini sang mga tawo karon, ilabi na sa mga pungsod sa Nakatundan. Ang mga tawo nga nagasimba anay wala na nagapati nga kinahanglan pa ini. Ano ang ginasiling sang Biblia tuhoy sa pagkadto sa simbahan?

Ang mga tinaga nga “church” kag “churches” (simbahan) mabasa sing 110 ka beses sa King James Version. Ang iban nga mga badbad nagagamit man sini nga mga tinaga. Ang Griegong tinaga nga ginbadbad nga “simbahan” literal nga nagakahulugan sing “panawagan,” ukon, sa iban nga hambal, pagtinipon sang mga tawo. Halimbawa, ang Binuhatan 7:​38, sa King James Version, nagasugid tuhoy kay Moises nga yara “sa simbahan sa kahanayakan,” buot silingon, sa tunga sang nagtipon nga pungsod sang Israel. Sa isa pa ka halimbawa ginsambit sang Kasulatan nga “natabo ang isa ka mapintas nga paghingabot sa simbahan,” nga nagapatuhoy sa komunidad sang mga Cristiano sa Jerusalem. (Binuhatan 8:⁠1, The Jerusalem Bible) Sa isa sang iya mga sulat, gintamyaw ni Pablo “ang simbahan sa balay [ni Filemon],” ang lokal nga kongregasyon nga nagatipon didto.​—⁠Filemon 2, Revised Standard Version.

Maathag nga ang tinaga nga “simbahan” suno sa paggamit sa Biblia nagapatuhoy, indi sa isa ka duog sang pagsimba, kundi sa isa ka grupo sang mga sumilimba. Nagabaton sini, si Clemente sang Alexandria, nga isa ka relihioso nga manunudlo sang ikaduha nga siglo, nagsulat: “Indi ang duog, kundi ang kongregasyon sang mga pinili, ang ginatawag ko nga Simbahan.” Walay sapayan sini, dapat bala magkadto ang mga Cristiano sa isa ka espesipiko nga lokasyon ukon tinukod agod kahamut-an sang Dios ang ila pagsimba?

 Ang Pagsimba sa Pungsod sang Israel

Ginapatuman sang Kasuguan ni Moises ang pagkadto sang tanan nga Judiyong lalaki sa isa ka espesipiko nga lokasyon para sa tatlo ka tuigan nga kapiestahan. Nagtambong man ang madamo nga babayi kag kabataan. (Deuteronomio 16:​16; Lucas 2:​41-​44) Sa pila ka okasyon ang mga saserdote kag mga Levinhon nagtudlo sa nagtipon nga mga grupo, nga nagbasa gikan sa Kasuguan sang Dios. ‘Ginpaathag nila ini, kag ginhatagan ini sing kahulugan, kag ginpahangop nila ang ginabasa.’ (Nehemias 8:⁠8) Para sa mga tuig sang Inugpahuway, ang sugo sang Dios nagasiling: “Tipuna ang katawhan, ang mga lalaki kag ang mga babayi kag ang magagmay nga mga bata kag ang imo dumuluong nga pumuluyo nga yara sa sulod sang imo mga gawang, agod mamati sila kag agod magtuon sila, kay dapat sila magkahadlok kay Jehova nga inyo Dios kag mahalungon nga tumanon ang tanan nga pulong sa sining kasuguan.”​—⁠Deuteronomio 31:⁠12.

Sa templo lamang sa Jerusalem makahalad sa Dios kag makabaton sing instruksion halin sa mga saserdote ang isa ka tawo. (Deuteronomio 12:​5-7; 2 Cronica 7:12) Sang ulihi, gintukod sa Israel ang iban pa nga mga balay sang pagsimba​—⁠ang mga sinagoga. Mga duog ini para sa pagbasa sa Kasulatan kag sa pagpangamuyo. Apang, ang templo sa Jerusalem amo ang panguna nga duog sa pagsimba. Gin-ilustrar ini sang ginreport sang manunulat sa Biblia nga si Lucas. Ginsambit niya ang isa ka tigulang nga babayi nga si Ana, nga “wala gid nagapalya sa templo, nga nagahimo sing sagrado nga pag-alagad adlaw kag gab-i nga may mga pagpuasa kag mga pangamuyo.” (Lucas 2:​36, 37) Ang matuod nga pagsimba upod sa iban pa nga mga sumilimba ang pinakaimportante sa kabuhi ni Ana. Amo man sini ang ginhimo sang iban pa nga mga Judiyo nga nagakahadlok sa Dios.

Ang Matuod nga Pagsimba sang Napatay si Jesus

Sang napatay si Jesus ang iya mga sumulunod wala na napaidalom sa Mosaikong Kasuguan, kag wala na sila ginsugo sa pagsimba sa templo. (Galacia 3:​23-25) Apang, padayon sila nga nagatipon sing tingob sa pagpangamuyo kag pagtuon sa Pulong sang Dios. Wala sila sing madamo-sing-puni nga mga tinukod, naggamit sa baylo sing pribado nga mga puluy-an kag publiko nga mga duog. (Binuhatan 2:​1, 2; 12:​12; 19:⁠9; Roma 16:​4, 5) Bangod wala sing mga ritwal kag seremonya, simple gid lang ang Cristianong mga miting sang unang siglo.

Sa tunga sang malain nga kahimtangan sa moral sa Emperyo sang Roma, ang mga prinsipio sang Biblia nga gintudlo sa sadto nga mga miting natalupangdan gid nga tuhay. Ang masiling lamang sang iban nga mga di-tumuluo nga nagtambong sa nahauna nga tion amo: “Ang Dios yara gid sa tunga ninyo.” (1 Corinto 14:​24, 25) Huo, ang Dios yara gid sa tunga nila. “Busa, sa pagkamatuod, ang mga kongregasyon [“mga simbahan,” RS, JB] padayon nga naglig-on sa pagtuo kag nagdugang sa kadamuon adlaw-adlaw.”​—⁠Binuhatan 16:⁠5.

Ginkahamut-an ayhan sang Dios ang Cristiano sadto kon nagsimba sila sa pagano nga mga templo ukon sing isahanon lamang? Ang Biblia naghatag sing maathag nga sugo tuhoy sini: Ang ginkahamut-an nga mga sumilimba dapat mangin bahin sang lamang matuod nga simbahan, ukon kongregasyon, ang “isa ka lawas” sang matuod nga mga sumilimba. Sila amo ang mga disipulo ni Jesus, nga kilala subong mga Cristiano.​—⁠Efeso 4:​4, 5; Binuhatan 11:⁠26.

Kamusta Naman Karon?

Sa baylo nga palig-unon kita nga magsimba sa isa ka simbahan, ginapalig-on kita sang Biblia nga magsimba upod sang simbahan, “ang kongregasyon sang buhi nga Dios,” ang mga tawo nga ‘nagasimba sa espiritu kag kamatuoran.’ (1 Timoteo 3:​15; Juan 4:24) Ang relihioso nga mga miting nga ginakahamut-an sang Dios dapat magtudlo sa mga tawo “sa balaan nga paggawi kag sa mga buhat sang diosnon nga debosyon.” (2 Pedro 3:11) Dapat sini buligan ang mga tumalambong nga mangin hamtong nga mga Cristiano, nga ‘makakilala sa husto kag sayop.’​—⁠Hebreo 5:⁠14.

Ginatinguhaan sang mga Saksi ni Jehova nga sundon ang halimbawa sang unang-siglo nga mga Cristiano. Kapin sa 91,400 ka kongregasyon sa bug-os nga kalibutan ang nagatipon sing regular agod magtuon sing Biblia kag magpalig-unay sa isa kag isa, ginahimo ini sa mga Kingdom Hall, sa pribado nga mga puluy-an, kag sa iban pa nga lugar. Nahisuno ini sa mga pulong ni apostol Pablo: “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon sing tingob.”​—⁠Hebreo 10:​24, 25.