Paghimaya sa Paghidait sa Baylo sang Inaway

PANUGIRON NI DOROTHY HORLE

Natawo ako sa isa ka Italyanong Katoliko nga pamilya sa Wilmington, Delaware, E.⁠U.⁠A., sang 1919. Ang akon mga ginikanan wala gid nagasimba, apang ginpasimba nila kami sang akon magulang kag manghod nga babayi. Nagdayaw gid ako sa kadakuon sang mga simbahan kag sa matahom nga arkitektura, mga istatwa, kag seremonya sini.

SAMTANG nagaligad ang mga tinuig, nadulaan ako sing interes sa Katolisismo. Wala gid ginhatagan sing importansia sang simbahan ang Biblia, nga ginatahod kag regular nga ginabasa sang akon amay. Nahilasan ako sa mga pahibalo sa simbahan nga nagalawag sang mga nag-amot kag mga kantidad nga ila gin-amot. Madamo man sang hinuringhuring tuhoy sa balingag nga mga pari. Sa edad nga 15, nag-untat ako sa pagka-Katoliko. Naghatag ini sa akon sing kapin nga tion agod padayon nga maghanas sa taliambong.

Ang Isa ka Karera sa Taliambong

Sang 1940, sang 21 anyos ako, napamana ko si William Horle, isa ka pamatan-on nga lalaki nga mahuyugon magdrowing sang bisan ano nga butang may kaangtanan sa militar​​—⁠mga eroplano, mga soldado, mga pusil, kag mga barko. Nalipay si Bill (hayo ni William) nga isa ako ka pintor, kag ginbaklan niya ako sang una nga set sang oil paints. Ginsugdan ko nga tun-an ang mga pamaagi sang mga beterano.

Pagligad sang duha ka tuig namon nga pag-asawahay, nangin kalingawan ni Bill ang paghimo sing magagmay nga mga butang may kaangtanan sa militar nga nagagamit sing tingga. Hampanganan nga mga soldado? Indi gid! Handum niya nga makahimo sang matuodtuod nga mga buhat sang taliambong. Ang iban nga mga artist nagahimo paagi sa plastik, kahoy, ukon semento, apang ang tingga bagay gid nga gamiton bangod sang eksperiensia ni Bill bilang isa ka makinista.

Nagadesinyo sia sing isa ka dibuho, nagahimo sang hurmahan, kag nagaporma sang dibuho sa tingga. Sang ulihi, nangin lantip gid sia sa pagtabid sang ginmolde nga mga bahin, pagsolda, pagbal-ag, kag pagpahining sini. Nagsaylo sia sang ulihi halin sa plaster-of-Paris nga mga molde pakadto sa iya sang mga dentista. Bangod sini, nahimo niya ang mapino gid nga mga detalye.

Pagkatapos mahuman ang tagsa ka pidaso sang solido nga metal, ako na ang nagahuman sini. Paagi sa makakalapoy nga pagpanalawsaw, nakakita kami sang larawan sang ginagamit anay nga mga uniporme sang militar​​—⁠pati na ang mga butones, sinalapid nga materyal, tsapa sang ranggo, kag mga duag.

Paagi sa bulig sang lente, ginabutangan ko sing tinimpla nga oil kag mga pintura agod magpilit sa metal. Nagahimo ini sang amon mga figurine nga daw buhi. Gikan sa amon diutay nga bodega sa silong sa Philadelphia, Pennsylvania, naghimo kami sang Amerikano nga mga Indian, mga soldado sa Inaway Sibil, mga U.⁠S. Marine, mga manugkabayo ni Napoleon, Egiptohanon nga mga Mamluk, Algerianhon nga mga Zouave, kag iban pa.

Nakabaton si Bill sing isa ka imbitasyon gikan sa U.⁠S. Marine Corps sa paghimo sing isa ka representasyon sang una nga nakasakay-sa-kabayo nga tropa sang mga marino nga ginpadala sa Peking (karon Beijing), Tsina, antes sang 1939. Walay  untat nga gin-obra namon ini, kag sang 1954 ginpresentar namon ini sa Smithsonian Institution sa Washington, D.C. Pila ka tuig sang ulihi, nagpangabay si Presidente Lyndon Johnson nga sayluhon ini sa White House. Siempre pa, nagpasugot kami.

Wala namon ginabaligya ang amon mga figurine, apang ginatos ang ginpanghatag ni Bill. Dalayawon kami nga ginasambit sa madamo nga libro tuhoy sa modelo nga mga soldado. Ang amon figurine gin-eksibit sa World’s Fair sang 1965 sa Flushing Meadow, sa Queens, New York. Ang mga museo nagpangabay sang amon mga modelo. Gingamit ni Bruce Catton, isa ka istoryador sang U.⁠S. Civil War, ang madamo sang amon diorama kag mga figurine sa mga ilustrasyon sa iya mga libro.

Nagtuhaw ang mga Pamangkot Tuhoy sa Kabuhi

Apang, sang mag-40 anyos na ako, nagsugod sa pagbalhin ang mga butang. Nagsugod ako sa pagpamangkot tuhoy sa Dios. Sa Adlaw sang Krismas, lima ka kabataan nga Katoliko ang napatay sa sunog sa isa ka balay samtang ang ila mga ginikanan didto sa simbahan. Nagpalibog ako, ‘Paano ina ginpahanugutan sang Dios nga matabo sa iya kaadlawan?’ Nakita ko ang isa ka libro nga nag-asoy sang kapintas sang Judiyong Holocaust. Ini kag iban pa nga makakulugmat nga mga hitabo sa kalibutan nagpahulag sa akon sa pagpamangkot, ‘Diin ang Dios? Wala niya ginahimo ang dapat kuntani nga ginahimo niya!’

Gikan sa maaga nga halimbawa sang akon amay, nagapati ako nga ang sabat yara gid sa Biblia. Gani nagkadto ako sa balay sang Katoliko nga pari malapit sa amon puluy-an sa Philadelphia kag naghimo sing kahimusan nga makigkita sa pari agod binagbinagon ang Biblia. Madugay ako nga naghulat, apang wala sia magpakita. Kada semana sa sulod sang apat ka semana, nagkadto ako sa puluy-an sang pari apang wala gid ako makapakighambal sa pari.

Isa ka gab-i, sa daku nga kasubo, nagtangla ako sa langit kag nangamuyo: “Wala ako makahibalo kon sin-o ka. Wala ako makahibalo kon ano nga relihion ang ginapakig-updan mo, apang nakahibalo ako nga yara ka dira. Palihug magpakilala ka sa akon!” Wala magdugay pagkatapos sadto, ang mga Saksi ni Jehova nagduaw sa akon ganhaan.

Sa pulupanag-on, nakita ko na ang mga Saksi nga nagaparada sang ila mga salakyan, nagaguwa, kag nagakadto sa lainlain nga ganhaan. Bisan pa wala ako sing nahibaluan tuhoy sa ila ukon kon ngaa nagaduaw sila, nagapalibog gid ako sang tuyo nila.

Sadto nga adlaw sang 1961 sang nagduaw ang mga Saksi, napung-awan gid ako bangod wala sing pasingadtuan ang akon pagpangita sa Dios. Samtang nagalampaso sa atubangan nga ganhaan sang akon balay, isa ka may edad na nga babayi nga si Marge Brion ang nagsaka sa balkonahe kag nagtamyaw sa akon. Wala gid ako magbalikid agod sapakon sia. Apang samtang nagahambal sia tuhoy sa duta nga pagahimuon nga isa ka matahom nga paraiso, ginpamatian ko ang tagsa ka tinaga nga iya ginsiling. Sang ulihi namangkot sia, “Nagapamati ka bala sa akon?”

Akon ginsulit ang tanan nga ginsiling niya, lakip ang bersikulo sa Biblia nga ginbalikwat niya gikan sa Isaias 55:⁠11. Nian nagbalikid ako, ginsipit sia sa braso, kag nagsiling, “Magdayon ka!” Ginhatag  niya sa akon ang akon una nga Biblia kag bulig sa pagtuon sa Biblia nga Gikan sa Paraiso nga Nadula Tubtob sa Paraiso nga Naangkon-uli. Gintanyagan man niya ako sing isa ka regular nga pagbinagbinag sa Biblia​​—⁠ang pagtuon mismo nga akon ginlauman nga ihatag kuntani sang Katoliko nga Simbahan sa akon.

Paagi sa duha ka sesyon sa isa ka semana, madasig ang akon pag-uswag sa akon pagtuon sa Biblia. Sa malip-ot nga tion, nangin maathag nga nasapwan ko ang kamatuoran. Ang paghibalo sang ngalan sang Dios, si Jehova, isa ka makatalandog-balatyagon nga eksperiensia para sa akon. (Salmo 83:18) Handurawa lamang​​—⁠ini ang Dios nga ginakalangkagan ko nga makilala kutob pa sa pagkabata! Akon man natun-an nga ang iya Anak, si Jesucristo, indi isa ka makatalanhaga nga bahin sang trinidad nga dios. (Juan 14:28) Wala madugay, nagtambong ako sa Cristianong mga miting sang mga Saksi ni Jehova kag naghandum gid nga mangin isa ka bug-os tion nga manugbantala sang mensahe sang Biblia.

Paghimo sing Importante nga mga Desisyon

Yara karon ang pinakadaku nga pagtilaw sa atubangan ko. Dapat ko bala bungkagon ang artistiko nga pagbuligay nanday William kag Dorothy Horle? Paano ko maalagad ang Dios sang paghidait kag ang iya Anak, ang Prinsipe sang Paghidait, samtang ginahimaya ang inaway sa taliambong? (Isaias 9:⁠6) Wala bala nagsaad si Jehova nga ‘ginapatunong niya ang mga inaway tubtob sa ukbong sang duta’? (Salmo 46:⁠9) Gani ngaa padayunon ang isa ka butang nga pagatapuson sang Dios? Kag wala bala nagtagna si Isaias sa katawhan sang Dios nga ‘salsalon nila ang ila mga espada nga mga punta sang arado’ kag indi na sila magtuon sing inaway? (Isaias 2:⁠4) Ginhunahuna ko kag nangamuyo gid sing malawig kag sing hanuot. “Indi ko na ini mapinta!” amo ang akon desisyon. Sang Abril 25, 1964, ginsimbuluhan ko ang akon dedikasyon kay Jehova nga Dios paagi sa pagpabawtismo sa tubig.

Masami ginahambal ni Bill nga nasubuan gid sia nga sa pila ka adlaw magabulagay kami sa kamatayon. Sang nagsugod ako sa pagtuon sa Biblia, ginasugiran ko sia: “Bill, mahimo gali kita magkabuhi sing dayon sa bag-ong kalibutan sang Dios!” (Isaias 25:⁠8; Bugna 21:​4, 5) Abi gani niya nagbuangit ako. Sang ginpaathag ko kon ngaa indi na ako makapinta sing militar nga mga figurine nga may matinlo nga konsiensia, naakig gid sia kag namahog nga bayaan ako. Sang ulihi ginbayaan gid niya ako.

Si Bill naghimo sing militar nga mga figurine sing isahanon sa madamo nga tinuig. Apang wala sia nagsaylo sa malayo kag masinakdagon sia pirme sa akon kag sa amon anak nga lalaki, si Craig, nga nabun-ag sang 1942. Sang 1988, nagbalik si Bill, kag nag-updanay kami sing napulo ka tuig tubtob napatay sia.

Samtang, sang 1966, nalab-ot ko ang akon tulumuron nga mangin isa ka payunir. Kutob sadto, wala na gid ako nagbalikid. Pribilehiyo ko nga tun-an sa Biblia ang akon magulang nga babayi. Ginbaton niya ang mga panudlo sini, kag nagpabilin sia nga aktibo nga Saksi tubtob karon. Ang akon amay nagpamati sa mensahe sang Biblia kag sa sulod sang duha ka semana nagsugod sia sa pagtambong sa mga miting sa Kingdom Hall. Sa edad nga 75 anyos, nagpabawtismo sia, kag padayon sia nga nangin matutom sa Dios tubtob nga napatay sia sa edad nga 81 anyos. Ang akon iloy nagbaton man kay Jehova subong iya Dios, bisan pa nga napatay sia antes sia nagdedikar. Mga 94 anyos sia.

Sa sulod sang mga tinuig, ginpakamaayo ako sing daku ni Jehova, ang Dios sang paghidait. Mga 81 anyos na karon, payunir gihapon ako, bisan pa nabudlayan na ako sa paglakat. Nabatyagan ko ang ginbatyag ni apostol Pablo, nga nagsulat: “Nagapasalamat ako kay Cristo Jesus nga aton Ginuo, nga naghatag sing kusog sa akon, bangod ginkabig niya ako nga matutom paagi sa pagtangdo sa akon sa ministeryo.” (1 Timoteo 1:12) Daw ano gid ini ka makalilipay nga ministeryo! Madamo sang akon natun-an sa Biblia ang nagsakripisyo man agod maalagad ang aton maluluy-on nga Dios.

Nasubuan gid ako nga ang akon bug-os nga pamilya wala magbaton sang kamatuoran sang Biblia. Basi pa lang nga sa pila ka adlaw madamo pa sa ila ang magabaton. Apang sa akon bahin nangin matuod ang mga pinamulong ni Jesus nga ang iya mga disipulo mahimo “makabaton sing isa ka gatos ka pilo karon sa sining panag-on sang tion, sing mga balay kag mga utod nga lalaki kag mga utod nga babayi kag mga iloy kag mga anak.” (Marcos 10:30) Sa pagkamatuod, ginpakamaayo gid ako ni Jehova. Daw ano nga kadungganan kag kalipay nga ibaylo ang kabantugan kag inaway para sa Dios kag paghidait!

[Retrato sa pahina 22]

Kaupod ni Heneral L. C. Shepherd, Jr., sang 1954

[Credit Line]

Defense Dept. photo (Marine Corps)

[Retrato sa pahina 23]

(Aktuwal nga kadakuon)

[Retrato sa pahina 24]

Sa edad nga 81 anyos, nagapayunir ako sa kapin sa 30 ka tuig