Pamangkot sang mga Pamatan-on . . .

Paano Ako Mangin Suod sa Akon mga Lolo kag mga Lola?

“Palaistorya ang akon duha ka lolo. Nabuligan ako sang ila mga istorya nga mahangpan ang akon balatyagon.”​—⁠Joshua.

MAY panahon sadto nga kinaandan sa pila ka kaliwatan sang mga katapo sang pamilya nga magkabuhi sing suod​​—⁠sa masami sa isa lamang ka puluy-an. Ang suod nga pagpakig-angot sa mga lolo kag mga lola kinaandan anay.

Sa karon, ang mga pamatan-on kag ang ila mga lolo kag mga lola mahimo nga nagahilayuay. Dugang pa, nagadamo nga pamilya ang ginawasak sang diborsio. Ang The Toronto Star nagreport nga “ang mga lolo kag mga lola mahimo nga mga biktima man sang diborsio kag ginadumilian sa pagpakigkita sa ila pinalangga nga mga apo.” Sa iban nga mga kaso, ang problema amo nga madamo nga pamatan-on ang may negatibo nga pagtamod sa mga tigulang, kay ginatamod nila sila nga manol, kag may tuhay gid nga pagtamod, mga prinsipio, kag mga interes. Ano ang resulta? Madamo nga lamharon ang indi suod sa ila mga lolo kag mga lola.

Makapasubo ini. Subong sang ginpakita sang una nga artikulo sini nga serye, ang suod nga kaangtanan sang isa sa iya mga lolo kag mga lola​​—⁠ilabi na kon mahinadlukon sila sa Dios​​—⁠maayo, mapuslanon, kag makalilipay.⁠ * Ang isa ka tin-edyer nga babayi nga si Rebekah nagsiling tuhoy sa iya lolo kag lola: “Pirme kami nagakinadlaw.” Ang isa ka pamatan-on nga si Peter nagsiling man: “Wala ako nahadlok nga isugid sa ila ang akon ginabatyag ukon kon ano ang akon mga plano. Kon kaisa mas komportable pa ako sa ila sangsa akon mga ginikanan. Sa banta ko makahambal ako sa akon lolo kag lola tuhoy sa bisan ano nga butang.”

Kamusta ka naman? Ayhan suod ka anay sa imo mga lolo kag mga lola sang gamay ka pa. Apang karon nga tin-edyer ka na, mahimo nga wala ka sing ginhimo agod mapalambo ang inyo kaangtanan. Kon amo sini, ang prinsipio sang laygay sa Biblia sa 2 Corinto 6:11-13 nga, “magpasangkad” sa imo pagpalangga sa ila mahimo maaplikar. Ang pamangkot amo, Paano?

Paghimo Sang Una nga Tikang

Ang ‘pagpasangkad’ nagapahangop nga ikaw ang mag-una sa paghimo sing tikang. Ti, ang Biblia nagasiling: “Indi pagpunggi ang maayo gikan sa ila nga nagakadapat sa sini, kon ini yara sa gahom sang imo kamot nga himuon ini.” (Hulubaton 3:27) Sang bata pa ikaw, mahimo nga wala ikaw sing tuman nga “gahom” sa paghimo sing bisan ano nga butang tuhoy sa imo kaangtanan sa imo mga lolo kag mga lola. Apang karon nga daku ka na, ayhan isa na ka lamharon nga adulto, masapwan  mo nga may pila ka tikang nga mahimo mo sing nagakaigo.

Halimbawa, kon ang imo lolo kag lola nagapuyo malapit lang sa inyo, ayhan ugalion mo nga duawon sila pirme. Makatalaka bala? Siguro, kon maghipos ka lang. Busa makighambal sa ila! Ano ang inyo mahambalan? Makabulig ang prinsipio sa Biblia sa Filipos 2:4. Nagasiling ini sa aton nga ‘ituon ang mata, indi sa personal nga interes sa aton kaugalingon lamang nga mga butang, kundi sa personal man nga interes sang iban.’ Buot silingon, magpakita sing interes sa imo lolo kag lola. Pahambala sila sa mga butang nga ila ginaulikdan. Ano ang ila ginabatyag? Ano ang ila ginahimo? Mahimo nga nalipay sila sa paghambal tuhoy sa ila nagligad. Busa pamangkuta sila kon ano anay ang pagkabuhi sang bata pa sila. Ukon kamusta ang imo tatay ukon nanay sang bata pa sila? Kon mga Cristiano ang imo mga lolo kag mga lola, pamangkuta sila kon ano ang nagganyat sa ila sa kamatuoran sang Biblia.

Ang mga lolo kag mga lola masami nga may bugana nga impormasyon tuhoy sa nagligad sang pamilya, kag ayhan luyag gid nila nga sugiran ka sang makawiwili nga mga istorya. Sa pagkamatuod, ayhan luyag mo pa gani nga himuon ini nga makalilingaw. Tilawi nga interbyuhon ang imo mga lolo kag mga lola, ayhan ginasulat ini ukon ginateyp ini ukon ginakuhaan sing video. Kon indi ka sigurado kon ano ang imo ipamangkot, magpabulig sa imo mga ginikanan agod makahimo sing nagakaigo nga mga pamangkot. Ayhan mahibaluan mo ang madamo nga butang nga makabulig sa imo nga mahangpan sing mas maayo ang imo mga lolo kag mga lola, ang imo mga ginikanan, kag ang imo kaugalingon pa gani. “Palaistorya ang akon duha ka lolo,” siling ni Joshua. “Nabuligan ako sang ila mga istorya nga mahangpan ang akon balatyagon.”

Apang, indi pagkalimti nga ang imo mga lolo kag mga lola interesado man sa imo kabuhi kag sa imo mga ginahimo. Kon sugiran mo sila sang imo ginahimo, ginaagda mo sila nga mangin bahin sang imo kabuhi. Makabulig gid ini agod magsuod pa kamo sa isa kag isa. Ang isa ka pamatan-on sa Pransia nga si Igor nagsiling: “Maluyagon kami sang akon lola mangape sa isa ka palamahawan kag maghambalanay tuhoy sa amon ginhimo.”

Ano ang Aton Himuon Kon Kaupod Sila?

Kon nagahambalanay na kamo, ayhan mahimo ninyo himuon ang pila ka butang sing magkaupod. Paagi sa diutay nga pagpamensar, mahimo matukiban mo ang nagkalainlain nga hilikuton nga mahimo ninyo. Ang lamharon nga si Dara naghinumdom: “Gintudluan ako sang akon mga lola sa pagluto, pagde-lata, pag-bake, pagpananom, kag pagpanghardin.” Nagaupod si Amy sa iya mga lolo kag mga lola sa mga sinalusalo sang pamilya kag sa mga bakasyon. Depende sa ila edad, ang iban nga mga lolo kag mga lola tuman ka aktibo. Si Aaron maluyag maghampang sing golf upod sa iya lola. Si Joshua nagapamunit upod sa iya lolo sa iloy kag nagahimo sing mga proyekto sa palibot sang balay upod sa iya lolo sa amay.

Kon ang imo mga lolo kag mga lola mga sumilimba ni Jehova, makalilipay ilabi na ang magpakigbahin sa mga buluhaton sang pagsimba kay Jehova upod sa ila, subong sang pagpakighambal sa iban tuhoy sa Biblia. Si Igor naglakbay upod sa iya lola padulong sa isa ka internasyonal nga pagtilipon sang mga Saksi ni Jehova sa Poland. “Isa yadto ka indi malipatan nga eksperiensia nga naambitan namon, kag nagakalipay kami gihapon nga hambalan ini,” siling niya. Matuod, indi tanan nga lolo kag lola makalakatlakat pa. Sa gihapon, mapuslanon gid nga maghinguyang sing tion upod sa ila.

Isa ka Espirituwal nga Palanublion

Sang panahon sang Biblia ang isa ka babayi nga si Loida nagtungod sing importante nga papel sa pagbulig sa iya apo nga si Timoteo agod mangin isa ka talalupangdon nga alagad sang Dios. (2 Timoteo 1:5) Sing indi makapakibot, madamo nga Cristianong lolo kag lola ang nakahimo man sina karon. Tuhoy sa iya mga lolo kag mga lola, si Joshua nagsiling: “Mas madugay na sila nga nagaalagad kay Jehova sangsa kabuhi ko, gani ginatahod ko sila sing tudok, indi lamang subong lolo kag lola kundi subong mga nagatipig sang ila integridad.” Si Amy nagsiling: “Ang akon mga lolo kag mga lola pirme nagasiling nga napalig-on gid sila kag nagakalipay nga makita ako nga nagaalagad sing matutom kay Jehova. Apang, ang ila maayo nga huwaran kag kakugi kay Jehova subong mga payunir [bug-os tion nga mga ebanghelisador] nagpalig-on sa akon nga magpadayon sa akon pagpayunir.”

Ginapatuhuyan ni Chris ang iya lola subong “ang tawo nga nagpahulag gid sa iya nga magtuon kag mag-uswag.” Nagdugang sia: “Indi ko gid  malipatan ang ginsiling niya nga ‘dapat naton himuon ang aton bug-os nga masarangan para kay Jehova.’ ” Ang lolo kag lola ni Pedro nakabulig man sing daku sa iya espirituwal nga pag-uswag. Sia nagsiling: “Ang ila eksperiensia nakabulig sa akon sing daku. Pirme ako ginapaupod sang akon lolo kag lola sa pagbantala, kag ginaapresyar ko gid ini.” Huo, mabuligan ikaw sa pag-alagad sa Dios sing dugang pa kon mangin suod ikaw sa imo mahinadlukon-sa-Dios nga mga lolo kag mga lola.

Mga Lolo kag mga Lola nga Nagapuyo sa Malayo nga Duog

Ano naman kon ang imo mga lolo kag mga lola nagapuyo sa malayo nga duog? Duawa sila pirme kon mahimo. Sa ulot sang mga pagduaw, himua ang imo masarangan nga may komunikasyon ka sa ila. Tatlo ka beses lamang kada tuig nga nagaduaw si Hornan sa iya lolo kag lola, apang nagsiling sia: “Ginatawgan ko sila kada Domingo.” Si Dara, nga nagapuyo man malayo sa iya mga lolo kag mga lola, nagsiling: “Interesado sila sa akon kabuhi, kag nagatawganay kami ukon nagabalusay sing E-mail halos kada semana.” Ang E-mail kag pagtawag sa telepono nagakaigo, apang indi pagpakadiutaya ang mahimo sang dumaan na nga pagpadala sing sulat nga sinulat sang imo mismo mga kamot. Madamo nga pamatan-on ang nakibot sa paghibalo nga gintago gali sang ila mga lolo kag mga lola ang tanan nga sulat nga ginpadala nila halin sang bata pa sila. Ang mga sulat mahimo basahon kag basahon liwat​​—⁠kag pakabahandion. Gani pat-ura nga magsulat ikaw!

Ang mga lolo kag mga lola masami nga may pinasahi gid nga gugma sa ila mga apo. (Hulubaton 17:6) May yara madamo nga paagi agod mahimo kag mahuptan ang suod nga kaangtanan sa imo mga lolo kag mga lola, nagapuyo man sila sa malapit ukon sa malayo. Panikasugi gid ini.

[Nota]