Ang Ambahanon sa Paghigugma sang Sirumsirom

SA KALABAON nga mga duha ka pulgada, ang sirumsirom daw indi gid talalupangdon. Apang, ang ambahanon sini nga sirumsirom nagabihag sang igtalupangod sang minilyon ka tawo sa bug-os nga kalibutan. Paano nagaamba ining diutay nga tinuga, kag para sa ano nga katuyuan?

Sing makawiwili, sa tunga sang halos 2,400 ka espesyi sang sirumsirom, ang mga lalaki lamang ang nagaamba, ukon nagahuni. Sa baylo nga himuon ini halin sa ila tutunlan, ang lalaki nga mga sirumsirom nagahimo sing lanton paagi sa ila mga pakpak. Ang isa ka ensiklopedia nagapaathag nga ang lalaki nga mga sirumsirom nagahuni paagi sa pagsag-id sang unahan nga pakpak sa isa ka raya sang mga 50 tubtob 250 ka daw ngipon nga nagasiwil nga mga bahin sa pihak nga unahan nga pakpak. Ang kadamuon sang mga huni nagadepende sa kadamuon sang daw ngipon nga mga bahin nga masag-id kada segundo. Ang bagring nagaguob sa hangin paagi sa kilala nga ambahanon sang sirumsirom.

Apang pat-od gid nga ang lalaki nga sirumsirom wala nagaamba agod lamang lingawon ang iya tagpalamati nga mga tawo! Indi, sa pagkamatuod! Ang tuyo gid nga pabation sini nga musikero amo ang posible nga mangin tiayon. Ang libro nga Exploring the Secrets of Nature nagapaathag: “Sa pagpangita niya sing tiayon, ang lalaki nga sirumsirom, nga isa ka lantip nga komunikador, nagaamba sing tatlo ka ambahanon: ang isa agod ipahibalo nga yara sia, ang isa agod mangaluyag kag ang isa pa agod tabugon ang wala maluyagi nga mga karibal.” Ang iban nga mga sirumsirom padayon nga nagaamba agod ipahibalo nga yara sila tubtob magpakita sing interes ang babayi nga sirumsirom. Nagapamati sa ambahanon paagi sa “mga dulunggan” sa iya unahan nga mga tiil, ang babayi indi kontento sa nagahilayuay nga pagpangaluyag. Samtang ang babayi nagahinampot sa lugar nga ginhalinan sang huni, ang lalaki nga sirumsirom magasugod sa pag-amba sing isa ka dalayon nga paghuni, ang ambahanon sang pagpangaluyag. Paagi sa sini nga harana, ang babayi maganyat sa nagapangaluyag sa iya, kag ang duha ka sirumsirom nagahirupay.

Sa Sidlangan nga Asia, ginahimo sang pila ka tawo ang lalaki nga mga sirumsirom nga hinuptanan bangod nalingaw sila sa ila ambahanon. Luyag naman sang iban nga pamatian ini nga lanton sa kinaugali nga puluy-an sang sirumsirom. Sa ano man nga kahimtangan, ang ambahanon sang magamay nga sirumsirom nagaganyat sa nagapamati nga mga tawo sa bug-os nga kalibutan kag nagahatag sing pagdayaw sa Desinyador sini.