Pamangkot sang mga Pamatan-on . . .

Pamatian Bala sang Dios ang Akon mga Pangamuyo?

“Ginapangamuyo ko ang tanan nga butang bangod abyan ko si Jehova, kag nahibaluan ko nga buligan niya ako kon may problema ako.”​—⁠Andrea.

NAPAT-OD sang pamatan-on nga si Andrea nga ginapamatian sang Dios ang iya mga pangamuyo. Apang indi tanan nga pamatan-on ang may subong sina nga pagsalig. Para sa iban, tuman sila kalayo sa Dios agod magpalapit sa iya. Nagapalibog pa gani sila kon bala nagaulikid gid sa ila ang Dios amo nga may pulos ang ila pangamuyo.

Ano ang sekreto sang pangamuyo? Sa simple nga hambal, amo ini ang matuod nga pagpakig-abyan sa Dios. Ang salmista nangamuyo: “Ang mga nakakilala sa imo ngalan magasalig sa imo.” (Salmo 9:10) Kamusta naman ikaw? Kilala mo gid bala ang Dios amo nga makapangamuyo ka sa iya kag makasalig nga mamati sia? Antes mo padayunon ang pagbasa, tilawi palihug nga sabton ang mga pamangkot sa kahon nga natig-uluhan “Daw Ano Mo ka Kilala ang Dios?” Pila ang imo masabat?

DAW ANO MO KA KILALA ANG DIOS? Ang mga sabat sa pahina 27

1. Ano ang ngalan sang Dios, kag ano ang kahulugan sini?

2. Ano ang apat ka panguna nga kinaiya sang Dios nga ginapakita sang Biblia?

3. Ano ang labing daku nga pagpakita sang Dios sing gugma sa katawhan?

4. Paano kita makapakig-abyan sa Dios?

5. Ano dapat ang aton panimuot kon nagapangamuyo kita?

Masabat mo na bala ang pila sang mga pamangkot, bisan antes mo basahon ang nabilin nga bahin sang artikulo? Kon amo mas kapin na ang imo nahibaluan tuhoy sa Dios sangsa kalabanan nga tawo. Apang, mahimo ginapakita sang imo mga sabat nga kinahanglan mo magkuha sing dugang pa nga ihibalo tuhoy sa iya kag kilalahon pa gid sia sing maayo. (Juan 17:⁠3) Ginadumdom ina nga tulumuron, binagbinaga ang pila lamang sang mga butang nga ginatudlo sang Biblia sa aton tuhoy sa “Nagapamati sang pangamuyo.”​—⁠Salmo 65:2.

Ang Dios Isa ka Matuod nga Persona

Una, ginabuligan kita sang Biblia nga mahangpan nga ang Dios indi lamang isa ka puwersa. Isa sia ka persona nga may ngalan, nga Jehova. (Salmo 83:18) Sa Hebreo ina nga ngalan nagakahulugan sing “Sia Nagapahanabo nga Mangin Amo.” Mahimo sia mangin bisan ano nga luyag niya agod matuman ang iya katuyuan. Indi ina mahimo sang isa lamang ka hugpong sang enerhiya! Gani kon mangamuyo ka, mapat-od mo nga wala ka nagasugilanon sa isa ka di-mahangpan nga  puwersa lamang ukon nagahambal ka lang sa hangin. Nagasugilanon ka sa isa ka persona, sa isa nga makapamati kag makasabat sang imo mga pangamuyo.​—⁠Efeso 3:20.

Sa amo, nakasiling ang pamatan-on nga si Diana: “Nahibaluan ko nga diin man ako, pamatian ako ni Jehova.” Agod matigayon ina nga pagsalig, dapat mangin matuod ang Dios sa imo! “Sia nga nagapalapit sa Dios dapat magpati nga amo sia,” siling sang Biblia.​—⁠Hebreo 11:6.

Isa ka Tuburan sang Kaalam kag Gahom

Mabuligan gid kita sang Dios bangod makahalawhaw ang iya gahom. Wala sing limite ina nga gahom, subong ginapamatud-an sang kadakuon kag kasibod sang uniberso. Ang Biblia nagasiling nga nahibaluan ni Jehova ang ngalan sang tagsa ka bituon​—⁠bisan pa di-maisip nga binilyon ini! Kapin pa sa sina, ginahalinan sia sang tanan nga enerhiya nga yara sa sadto nga mga bituon. (Isaias 40:​25, 26) Indi bala ina makatilingala? Kag bisan pa makahayanghag na ini nga mga kamatuoran, ang Biblia nagasiling nga “kamalingking lamang ini sang iya gahom”!​—⁠Job 26:​14, Today’s English Version.

Binagbinaga man ang wala sing latid nga kaalam ni Jehova. Ang Biblia nagasiling nga “kadalom gid sang [iya] mga panghunahuna.” (Salmo 92:⁠5) Ginhimo niya ang katawhan, kag gani nahangpan niya kita sing mas maayo sangsa aton paghangop sa aton kaugalingon. (Salmo 100:⁠3) Bangod nagaluntad sia “kutob sa tion nga walay latid tubtob sa tion nga walay latid,” wala sing latid ang iya eksperiensia. (Salmo 90:​1, 2) Wala sing butang nga indi niya mahangpan.​—⁠Isaias 40:​13, 14.

Paano ginagamit ni Jehova inang tanan nga gahom kag kaalam? Ang 2 Cronica 16:⁠9 nagasiling: “Tuhoy kay Jehova, ang iya mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.” Wala gid ikaw sing problema nga indi malubad sang Dios ukon indi ka niya mabuligan sa paglandas sini. Ang pamatan-on nga si Kayla naghinumdom: “Sining karon lang, sang nag-atubang kami sang akon pamilya sing kabudlayan, nangamuyo ako kay Jehova, kag nabatyagan ko nga ginbuligan niya kami nga mabatas kag malampuwasan ang mga kahimtangan, mga problema, kag mga balatyagon nga indi kuntani maagwanta.” Kon nagapakighambal ka sa Dios, nagapalapit ka sa tuburan sang kaalam. Wala na sing mas maayo pa sa sina!

Dios sang Katarungan kag Gugma

Apang paano mo mahibaluan nga luyag sang Dios nga buligan ka? Bangod namat-od si Jehova nga ipakilala ang iya kaugalingon, indi paagi sa iya daku nga gahom ukon sa iya daku nga kaalam ukon sa iya malig-on nga katarungan. Sa baylo, kilala gid si Jehova bangod sang kinaiya niya nga gugma. “Ang Dios gugma,” siling sang 1 Juan 4:⁠8. Kag bangod sinang daku nga gugma makasalig kita nga sabton niya ang aton mga pangamuyo. Ang labing daku nga pagpakita niya sang gugma amo ang paghatag niya sang iya Anak subong halad nga gawad agod mahimo naton matigayon ang kabuhi nga walay katapusan.​—⁠Juan 3:​16; 1 Juan 4:​9, 10.

Bangod ang Dios gugma, indi ka gid dapat mahadlok nga indi niya ikaw pagsapakon ukon pakig-angutan niya ikaw sing di-makatarunganon. “Ang tanan niya nga dalanon katarungan,” siling sang Deuteronomio 32:⁠4. Ang gugma sang Dios sa imo nagapasalig sa imo nga mamati gid sia. Bangod sini may pagsalig kita nga isugid sa iya ang aton pinakamadalom  nga mga panghunahuna kag balatyagon.​—⁠Filipos 4:​6, 7.

Pagpakig-abyan sa Dios

Ang matuod, ginaagda kita ni Jehova nga magpakighambal sa iya. Indi niya luyag nga indi naton sia makilala. Sa kabaliskaran, sa bug-os tawhanon nga maragtas ginaagda ni Jehova ang mga tawo nga mangin iya mga abyan. Lakip sa mga nagpakig-abyan sa Dios, nga nangin kalahamut-an sa iya tagipusuon, amo ang mga lalaki kag babayi, pamatan-on kag tigulang sang una. Lakip sa ila ang mga tawo kasubong nanday Abraham, Hari David, kag Maria, nga iloy ni Jesus.​—⁠Isaias 41:⁠8; Lucas 1:​26-​38; Binuhatan 13:22.

Mahimo ka man mangin isa sang mga abyan ni Jehova. Siempre pa, ini nga pagpakig-abyan wala nagakahulugan nga tamdon mo ang Dios subong genie nga sugilanunon mo lang kon may yara ka sing pangayuon ukon problema. Ang aton mga pangamuyo indi dapat nasentro sa aton lamang mga kinahanglanon. Kon luyag naton mangin abyan sang Dios, dapat kita mangin interesado sa iya kabubut-on​—⁠indi lamang sa aton kaugalingon⁠​—⁠​kag dapat gid naton himuon ang kabubut-on sang Dios. (Mateo 7:21) Gani, gintudluan ni Jesus ang iya mga disipulo nga isentro ang ila mga pangamuyo sa mga butang nga importante sa Dios. Sia nagsiling: “Mangamuyo kamo, nian, sa sining paagi: ‘Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, subong man sa duta.’ ” (Mateo 6:​9, 10) Ang aton mga pangamuyo dapat man puno sing pagdayaw kag pagpasalamat sa Dios!​—⁠Salmo 56:12; 150:6.

Apang, indi kita dapat maghunahuna nga indi bagay ipangamuyo ang aton mga kinahanglanon kag mga ginakabalak-an. “Bisan pa ginatinguhaan ko nga mangin tampad sa iya,” siling ni Steve, “kon kaisa nagabatyag ako nga indi ko dapat samukon ang Dios tuhoy sa kinaandan nga mga butang.” Kon subong sina ang imo ginabatyag, dumduma ang gintudlo ni Jesus sa iya mga disipulo: “Ang lima ka maya ginabaligya sa duha ka sensilyo nga may diutay nga balor, indi bala? Apang wala sing isa sa ila nga malipatan sa atubangan sang Dios. . . . Dili kamo mahadlok; mahal pa kamo sa madamo nga maya.” (Lucas 12:​6, 7) Indi bala makapasalig ina?

Kon amo, mahapos mahangpan nga kon labi mo nga nakilala si Jehova, labi ka nga mapahulag nga palapitan sia sa pangamuyo kag labi ka nga magasalig nga makabulig kag magabulig si Jehova sa imo. Gani, ano dapat ang imo panimuot kon nagapangamuyo sa Dios? Dapat ka mangin matinahuron, mapainubuson, kag di-makagod. Sa banta mo mamati ayhan sa imo ang isa ka mataas nga opisyal sa duta kon magpangabay ka sa matinaastaason ukon di-matinahuron nga paagi? Gani indi ka dapat makibot nga ginapaabot man ni Jehova nga tahuron mo sia kag ang iya mga talaksan antes niya pamatian ang imo mga pangamuyo.​—⁠Hulubaton 15:29.

Natun-an sang linibo ka nagakahadlok sa Dios nga mga pamatan-on nga ipautwas sa Dios ang yara sa ila tagipusuon. (Salmo 62:⁠8) “Sang ginsabat ni Jehova ang akon mga pangamuyo,” siling ni Brett, “ginpalig-on ako sini nga abyan ko sia gihapon.” Kamusta naman ikaw? Paano mo matigayon ang kaanggid nga pagpakig-abyan sa Dios? Duha ka Cristianong pamatan-on ang nagkomento sang masunod:

Rachel: “Agod mangin suod kay Jehova, kinahanglan ko ang mas madalom nga pagtuon sa iya Pulong, kag ginatinguhaan ko nga mapalambo ang kahidlaw sa sini nga pagtuon.”​—⁠1 Pedro 2:2.

Jenny: “Nabatyagan ko nga kon labi ka nga nagapakigbahin sa pag-alagad sa iya, labi ka nga nagasuod kay Jehova.”​—⁠Santiago 4:8.

Napaligban mo na bala kon daw ano ka mapuslanon ang pagpangamuyo? Ang isa ka Cristianong pamatan-on nagsiling: “Mas magasuod ako sa Dios kon sugilanunon niya ako ukon padalhan ako sing mensahe.” Bangod indi naton mabatian ang sabat ni Jehova kon nagapangamuyo kita, paano gid makabulig sa aton ang pangamuyo? Binagbinagon ini sa palaabuton nga guwa.

[Kahon sa pahina 27]

Mga sabat sa mga pamangkot sa pahina 25

1. Jehova. Nagakahulugan ini sing “Sia Nagapahanabo nga Mangin Amo.”

2. Gugma, gahom, katarungan, kag kaalam.

3. Ginpadala niya ang iya bugtong nga Anak, si Jesus, agod mapatay para sa aton.

4. Paagi sa indi lamang pagkabalaka sa aton mga kinahanglanon kundi mangin interesado sa kabubut-on sang Dios kag himuon ini.

5. Dapat kita mangin mapainubuson, matinahuron, kag di-makagod.

[Mga retrato sa pahina 26]

Ang pagtuon sa Biblia kag ang pagtuon gikan sa mga tinuga magabulig sa imo nga makilala pa ang Dios