Ang Pagtamod sang Biblia

Sala Bala ang Maglalaw?

“LUWAS SINA, MGA KAUTURAN, INDI NAMON LUYAG NGA WALA KAMO SING NAHIBALUAN NAHANUNGOD SA MGA NAGAKATULOG SA KAMATAYON; AGOD NGA INDI KAMO MAGKASUBO SUBONG SANG IBAN NGA WALAY PAGLAUM.”​—⁠1 TESALONICA 4:13.

MAY paglaum ang mga patay suno sa Biblia. Ang mga pagbanhaw nga ginhimo ni Jesus, subong man ang iya mga panudlo, nagatudlo sang tion nga buhion liwat ang mga patay. (Mateo 22:23-​33; Marcos 5:​35, 36, 41, 42; Lucas 7:​12-​16) Ano ang epekto sini nga paglaum sa aton? Ang mga pulong ni apostol Pablo nga ginbalikwat sa ibabaw nagapakita nga makalugpay ini nga paglaum kon mapatay ang isa ka hinigugma.

Kon napatyan ka sang isa ka hinigugma, walay duhaduha nga nagbatyag ka sing kasakit bangod sina nga trahedya. Si Theresa, nga ang iya bana napatay sa edad nga 42 anyos wala madugay pagkatapos maoperahan sa tagipusuon, nagsiling: “Nalisang gid ako! Ang una ko nga ginbatyag amo ang daku gid nga kahadlok. Nian nabatyagan ko ang daku kaayo nga kasakit nga nagalala samtang nagaligad ang panahon. Pirme gid ako nagahibi.” Ini bala nga mga reaksion nagapakita sang kakulang sing pagtuo sa saad ni Jehova nga banhawon ang mga patay? Ang mga pulong bala ni Pablo nagakahulugan nga sala ang maglalaw?

Mga Halimbawa sang Paglalaw sa Biblia

Makita naton ang sabat sa sina nga mga pamangkot paagi sa pagbinagbinag sang mga halimbawa sang paglalaw sa Biblia. Sa madamo nga kasaysayan ang kamatayon sang malapit nga katapo sang pamilya ginaupdan sang paglalaw. (Genesis 27:41; 50:​7-​10; Salmo 35:14) Ang mga balatyagon may kahilabtanan sa sini nga paglalaw masami nga grabe gid.

Binagbinaga kon paano ang pila ka tawo nga may pagtuo sa Dios naglalaw sa kamatayon sang isa ka hinigugma. Halimbawa, may mabakod nga pagtuo si Abraham nga sarang mabanhaw sang Dios ang mga patay. (Hebreo 11:19) Bisan nagatuo sa sini, sang napatay ang iya asawa, ‘nag-abot sia sa paghaya kay Sara kag sa paghibi sa iya.’ (Genesis 23:​1, 2) Sang nagbinutig ang mga anak ni Jacob kag ginsugiran sia nga napatay ang iya hinigugma nga anak nga si Jose, “ginkusnit ni Jacob ang iya mga panapton kag . . . padayon nga naghibi tungod sa iya.” (Genesis 37:​34, 35) Ti, pagligad sang madamong tinuig nagpasubo gihapon kay Jacob ang paghunahuna sa kamatayon sang iya pinalangga nga anak! (Genesis 42:36-​38) Hayag man nga nagkalisod sing daku si Hari David sang mapatay ang iya duha ka anak nga sanday Amnon kag Absalom. Bisan pa naghatag sila sing kalisdanan kay David kag sa iya pamilya, mga anak niya sila gihapon, kag nagpasubo gid sa iya ang ila kamatayon.​​—⁠2 Samuel 13:28-​39; 18:33.

Kon kaisa, ang bug-os nga pungsod sang Israel  naglalaw, subong ginhimo nila sang napatay si Moises. Ang Deuteronomio 34:⁠8 nagasugid sa aton nga ginhayaan sia sang mga Israelinhon sa sulod sang 30 ka adlaw.

Sa katapusan, yara ang halimbawa ni Jesucristo. Napatay ang suod niya nga abyan nga si Lazaro. Kag sang nakita ni Jesus nga nagahibi ang mga utod ni Lazaro, nga sanday Marta kag Maria, kag ang ila mga abyan, ‘natandog sia sing tudok sa espiritu kag nalisang.’ Bisan pa nahibaluan niya nga sa indi madugay banhawon niya ang iya abyan, “naghibi” sia gihapon. Ginhigugma ni Jesus ang iya pinalangga nga mga abyan nga sanday Marta kag Maria. Gani natandog gid sia sang nakita niya ang ila kalisod sang napatay ang ila utod.​—⁠Juan 11:33-36.

Sanday Abraham, Jacob, David, kag Jesus may daku nga pagtuo kay Jehova kag sa iya mga saad, apang nagkalisod sila. Ang ila bala paglalaw isa ka tanda sang espirituwal nga kaluyahon? Ang ila bala kalisod nagpakita sang kakulang sing pagtuo sa pagkabanhaw? Indi gid! Ang paglalaw isa ka normal nga reaksion sa pagkapatay sang isa ka hinigugma.

Kon Ngaa Nagalalaw Kita

Indi gid tuyo sang Dios nga mapatay ang mga tawo. Ang orihinal nga katuyuan ni Jehova, subong sang ginpabutyag kay Adan kag kay Eva, amo nga ang duta mangin isa ka matahom nga paraiso nga mapuno sang mahigugmaon kag malipayon nga pamilya. Maabot lamang ang kamatayon kon pilion sang unang mag-asawa nga indi pagtumanon si Jehova. (Genesis 1:​28; 2:17) Sing makapasubo, wala gid magtuman si Adan kag si Eva, kag bangod sang indi pagtuman, “ang kamatayon naglapnag sa tanan nga tawo.” (Roma 5:12; 6:23) Busa ang kamatayon isa ka mapintas nga kaaway nga wala pagtuyua.​—⁠1 Corinto 15:26.

Kon amo, makatarunganon gid lang nga ang di-kinaugali nga pagkapatay sang isa nga suod tunaan sing daku nga kasakit sa napatyan. Nagatuga ini sang daku gid nga kadulaan sa ila kabuhi. Si Theresa, ang balo nga ginsambit kaina, nagsiling tuhoy sa iya bana: “Napat-od ko nga makita ko sia liwat sa pagkabanhaw, apang nahidlaw gid ako sa iya subong. Amo ina ang nagapalisod gid sa akon.” Ang kamatayon sang isa ka ginikanan mahimo magpahanumdom sa aton sang aton pagkamamalatyon. Ang kamatayon sang isa ka pamatan-on ilabi na nga nagapasakit sa aton bangod isa ini ka trahedya sang kabuhi nga wala pa mabug-os.​—⁠Isaias 38:10.

Huo, indi kinaugali ang kamatayon. Dapat paabuton ang kasakit nga tuga sini, kag wala ginatamod ni Jehova ang paglalaw subong kakulang sang pagtuo sa pagkabanhaw. Subong sang makita sa mga halimbawa nanday Abraham, Jacob, David, Jesus, kag sang pungsod sang Israel, ang hayag nga pagpabutyag sang kasakit sa aton tagipusuon indi pamatuod nga maluya kita sa espirituwal.⁠ *

Apang, samtang nagakalisod kita subong mga Cristiano bangod sang kamatayon, wala kita nagakasubo “subong sang iban nga walay paglaum.” (1 Tesalonica 4:13) Wala kita nagakalisod sing sobra bangod wala kita nagapalibog sang kahimtangan sang mga patay. Nahibaluan naton nga wala sila sing kasakit ukon kalisdanan kundi yara sa kahimtangan kaangay sang mahamuok kag malinong nga katulugon. (Manugwali 9:⁠5; Marcos 5:39; Juan 11:11-14) Nagasalig man kita sing bug-os nga si Jesus, “ang pagkabanhaw kag ang kabuhi,” magatuman sang iya saad nga ibalik “ang tanan nga yara sa handumanan nga lulubngan.”​—⁠Juan 5:​28, 29; 11:​24, 25.

Gani, kon nagakalisod ka karon, magtigayon sing lugpay gikan sa ihibalo nga nahangpan ni Jehova ang imo kasakit. Kabay nga mapahaganhagan sini nga ihibalo kag sang imo paglaum sa pagkabanhaw ang imo kalisod kag mabuligan ka nga malandas ang imo kadulaan.

[Nota]