Pamangkot sang mga Pamatan-on . . .

Paano Makabulig sa Akon ang Pangamuyo?

“Ang pangamuyo amo ang nagbulig sa akon nga makabalik sa husto nga banas.”​—⁠Brad.⁠ *

MADAMO nga pamatan-on ang nagapangamuyo​—⁠ayhan sing labi pa sa ginahunahuna mo. Ginpakita sang Gallup Youth Survey sa mga 13 tubtob 17 anyos sa Estados Unidos nga 56 porsiento sa ila ang nagapangamuyo antes magkaon. Ginpakita sang surbe sa lamharon nga mga adulto nga 62 porsiento sa ila ang nagapangamuyo kada adlaw.

Walay sapayan sina, para sa madamo nga pamatan-on ang pangamuyo isa ka walay kahulugan lamang nga rituwal ukon isa ka rutina lamang. Pila lamang ka pamatan-on ang may yara ginatawag sang Biblia nga “sibu nga ihibalo sang Dios.” (Colosas 1:​9, 10) Subong resulta, ang Dios indi importante sa ila kabuhi. Ginpamangkot sang isa ka surbe ang mga tin-edyer kon nakapangayo gid man sila sa Dios sing bulig sa paghimo sing isa ka importante nga desisyon. Ang isa ka dalagita nagsabat: “Pirme ako nagapangamuyo sa Dios nga tuytuyan niya ako sa pagpili sang husto nga mga banas sa kabuhi.” Apang, ginbaton niya: “Wala ako sing madumduman nga isa ka partikular nga desisyon karon.” Indi katingalahan, nian, nga madamo nga pamatan-on ang kulang sing pagsalig nga ang pangamuyo may gahom ukon nga ini makabulig sa ila!

Walay sapayan sina, kaangay ni Brad, nga ginsambit sa umpisa, linibo ka pamatan-on ang personal nga nakaeksperiensia sang gahom sang pangamuyo. Mahimo mo man ini maeksperiensiahan! Ginpakita sang nagligad nga artikulo kon ngaa makasalig kita nga pamatian sang Dios ang aton mga pangamuyo.⁠ * Ang pamangkot karon amo, Paano makabulig sa imo ang pangamuyo? Una, usisaon naton kon paano ginasabat sang Dios ang aton mga pangamuyo.

Kon Paano Ginasabat sang Dios ang mga Pangamuyo

Sang panahon sang Biblia ang pila ka lalaki sang pagtuo may yara direkta​—⁠milagruso pa gani​—⁠nga mga sabat sa ila mga pangamuyo. Halimbawa, sang mahibal-an ni Hari Ezequias nga malubha ang iya balatian kag ilisipon na lang ang iya kabuhi, nakitluoy sia sa Dios nga luwason sia. Ang Dios nagsabat: “Ginpamatian ko ang imo pangamuyo. Nakita ko ang imo mga luha. Yari karon ayuhon ko ikaw.” (2 Hari 20:1-6) Ang iban pa nga mahinadlukon-sa-Dios nga mga lalaki kag mga babayi nakaeksperiensia man sang pagpasilabot sang Dios.​—⁠1 Samuel 1:1-20; Daniel 10:2-12; Binuhatan 4:24-31; 10:1-7.

Apang, ang pagpasilabot sang Dios indi kinaandan,  bisan sang panahon sang Biblia. Masami nga ginasabat sang Dios ang mga pangamuyo sang iya mga alagad, indi paagi sa milagruso nga pagpasilabot, kundi paagi sa pagbulig sa ila nga ‘mapun-an sang sibu nga ihibalo sang iya kabubut-on nga may bug-os nga kaalam kag espirituwal nga paghangop.’ (Colosas 1:​9, 10) Huo, nagbulig ang Dios paagi sa pagpabakod sa iya katawhan sa espirituwal kag moral​—⁠nagahatag sa ila sang kaalam kag ihibalo agod makadesisyon sila sing maalamon. Sang ang mga Cristiano yara sa mabudlay nga kahimtangan, wala ginkuha sang Dios ang pagtilaw. Sa baylo, ginhatagan niya sila sing “gahom nga labaw sa kinaandan” agod mabatas nila ini!​—⁠2 Corinto 4:⁠7; 2 Timoteo 4:17.

Amo man sa karon, ang sabat sa imo pangamuyo mahimo nga indi tumalagsahon. Apang subong sang ginhimo niya sang una, mahimo ihatag sang Dios ang iya balaan nga espiritu kag pabakuron ka nga masarangan ang ano man nga kahimtangan nga ginaatubang mo. (Galacia 5:​22, 23) Sa pag-ilustrar, usisaon naton ang apat ka espesipiko nga paagi nga makabulig sa imo ang pangamuyo.

Makabulig sa Paghimo sing mga Desisyon

Si Karen nagapakig-date sa isa ka pamatan-on nga daw may mataas nga tulumuron sa espirituwal. “Pirme niya ako ginasugiran nga luyag niya mangin isa ka gulang sa kongregasyon,” siling niya. Daw maayo ini pamatian. Apang “pirme man sia nagahambal tuhoy sa negosyo nga ginbuksan niya kag sang tanan nga butang nga mabakal niya para sa akon. Nagduhaduha ako sa iya sinseridad.” Ginpangamuyo ini ni Karen. “Nakitluoy ako kay Jehova nga pamuklaton ang akon mga mata kag ipakita sa akon ang dapat ko mahibaluan tuhoy sa iya.”

Kon kaisa ang buhat mismo nga pagpangamuyo mapuslanon, kay makabulig ini sa imo sa pagdulog kag sa paghunahuna sing maayo sang mga butang gikan sa pagtamod ni Jehova. Apang kinahanglan man ni Karen ang praktikal nga laygay. Makabaton bala sia sing milagruso nga sabat? Ti, binagbinaga ang rekord sang Biblia tuhoy kay Hari David. Sang nabalitaan niya nga ginalaygayan sang iya ginasaligan nga abyan nga si Ahitofel ang iya maluibon nga anak nga si Absalom, si David nagpangamuyo: “Palihug, himua nga kabuangan ang laygay ni Ahitofel, O Jehova!” (2 Samuel 15:31) Apang nagpanghikot man si David nahisanto sa iya pangamuyo. Gintulinan niya ang iya abyan nga si Husai sini nga misyon: “Nian paslawon mo ang laygay ni Ahitofel para sa akon.” (2 Samuel 15:34) Sa kaanggid nga paagi, si Karen nagpanghikot nahisanto sa iya pangamuyo paagi sa pagpakighambal sa isa ka hamtong nga Cristianong gulang nga nakakilala sa iya nobyo. Ginpamatud-an niya ang ginakahadlukan ni Karen: Ang iya nobyo halos wala nakahimo sing espirituwal nga pag-uswag.

Si Karen nagsiling: “Yadto nga kahimtangan nagpamuklat sang akon mata sa gahom sang pangamuyo.” Sing makapasubo, ang iya anay nobyo naghingamo sing manggad kag nag-untat sa pag-alagad sa Dios. “Kon napamana ko sia,” siling ni Karen, “mahimo nga nagaisahanon lamang ako sa pagkadto sa Cristianong mga miting.” Bangod sang pagpangamuyo, si Karen nakadesisyon sing maalamon.

Makabulig sa Pagpugong sang Imo mga Balatyagon

“Ginapaguwa sang hangag ang tanan niya nga espiritu,” siling sang Biblia sa Hulubaton 29:​11, “apang sia nga maalamon nagahupot sini nga kalmado tubtob sa katapusan.” Ang problema amo nga madamo nga tawo karon ang ginahul-an gid sa balatyagon kag sa masami nagakadulaan sing pagpugong​—⁠kon kaisa may yara malaglagon nga mga resulta. Ang pamatan-on nga si Brian naghinumdom: “May problema ako sa akon kaupod sa trabaho. Isa ka adlaw naggabot sia sing kutsilyo.” Ano ang ginhimo mo kon ikaw yadto? Si Brian nangamuyo. Sia nagsiling: “Ginbuligan ako ni Jehova nga magpabilin nga kalmado, kag ginsugilanon ko ang akon kaupod sa trabaho. Ginbuy-an niya ang kutsilyo kag naglakat.” Bangod ginpunggan ni Brian ang iya balatyagon, wala sia maakig, kag mahimo nga bangod sini naluwas ang iya kabuhi.

Sa masami, mahimo nga wala ka ginatayaan sang kutsilyo. Apang may madamo nga sitwasyon sa imo kabuhi nga kinahanglan mo nga punggan ang imo balatyagon. Ang pangamuyo makabulig sa imo nga magpabilin nga kalmado.

Makabulig Kon Nagakabalaka

Nadumduman ni Barbara nga “naagihan niya ang mabudlay nga tion” sang nagligad nga pila ka tuig. Sia nagsiling: “Ang akon trabaho, pamilya, mga abyan​—⁠ang tanan daw indi maayo. Indi ko mahibaluan ang dapat himuon.” Si Barbara gilayon nga nangamuyo sing bulig. Apang may problema. “Indi ko mahibaluan kon ano ang pangayuon kay Jehova,” siling niya. “Sang ulihi, nangayo ako sing kalinungan sa hunahuna. Ginpangabay ko kada gab-i nga buligan niya ako nga indi magkabalaka sa tanan nga butang.”

Paano sia nabuligan sini nga pangamuyo? Sia  nagsiling: “Mga pila ka adlaw sang ulihi, narealisar ko nga bisan pa nga yara gihapon ang akon mga problema, wala na ako nagapalibog ukon nagakabalaka sa sini.” Ang Biblia nagasaad: “Ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna paagi kay Cristo Jesus.”​—⁠Filipos 4:​6, 7.

Makabulig nga Magsuod sa Dios

Binagbinaga ang eksperiensia sang pamatan-on nga si Paul. “Bag-o lang ako magsaylo upod sa pila ka himata,” siling niya. Isa ka gab-i nagbatyag ako sing daku nga kapung-aw. Bag-o lang ako makatapos sa hayskul, kag nahidlaw ako sa akon tanan nga abyan. Naghibi ako sadto nga gab-i sang nadumduman ko ang malipayon nga mga tion sang amon pag-updanay.” Ano ang himuon ni Paul? Sa nahauna nga tion, nangamuyo sia sing hugot. Sia nagsiling: “Ginpabutyag ko ang akon balatyagon kag nangayo kay Jehova sing kusog kag kalinong sang hunahuna.”

Ano ang resulta? Si Paul naghinumdom: “Pagkaaga, nagbugtaw ako nga daw mas nahaw-asan sangsa bug-os ko nga kabuhi. Natigayon ko ang “paghidait sang Dios nga nagalabaw sa tanan nga panghunahuna” pagkatapos sang kalisang.” Karon nga kalmado na ang iya balatyagon, indi na tanto ka emosyonal si Paul sa mga butang. Kag narealisar niya sang ulihi nga ang ‘makalilipay anay nga mga adlaw’ indi gid man gali makalilipay. (Manugwali 7:10) Sa katunayan, ang “mga abyan” nga ginkahidlawan gid niya indi gali maayo gid nga impluwensia sa iya.

Labaw sa tanan, naeksperiensiahan mismo ni Paul ang pag-ulikid ni Jehova. Nabatyagan niya ang kamatuoran sang ginasiling sang Santiago 4:8: “Magpalapit kamo sa Dios, kag magapalapit sia sa inyo.” Para kay Paul amo ini ang pinakaimportante nga tion sang pagbag-o. Napahulag sia nga unahon si Jehova sangsa tanan nga butang sa iya kabuhi kag idedikar ang iya kabuhi sa iya.

Makighambal sa Dios!

Ining positibo nga mga eksperiensia nagapasalig nga ang pangamuyo makabulig sa imo. Siempre pa, matabo lamang ini kon serioso ka nga kilalahon ang Dios, ginapalambo ang pagpakig-abyan sa iya. Sing makapasubo, madamo nga pamatan-on ang wala nagahimo sini. Si Carissa ginpadaku sa isa ka Cristianong puluy-an. Apang ginbaton niya: “Sa banta ko sining nagligad lamang nga pila ka tuig nga nahangpan ko sing bug-os ang pagkatumalagsahon sang aton pinasahi nga kaangtanan kay Jehova.” Si Brad, nga ginsambit sa umpisa, ginpadaku nga isa ka Cristiano apang nagtalikod sa matuod nga pagsimba sa madamo nga tinuig. “Sang nakamarasmas lamang ako kon ano ang akon nawasi,” siling niya, “nga nagdangop ako kay Jehova. Karon nahibaluan ko kon daw ano kasubo kag walay pulos ang kabuhi kon wala ina nga kaangtanan.”

Apang, indi maghulat nga mag-abot ang problema antes ka magpalapit sa Dios. Makighambal na sa iya karon​—⁠sing tayuyon! (Lucas 11:9-13) “Sa atubangan niya iula ang inyo tagipusuon.” (Salmo 62:8) Masapwan mo sa gilayon nga makabulig gid sa imo ang pangamuyo!

[Mga nota]

 [Kahon/Mga retrato sa pahina 15]

Ang Pangamuyo Makabulig sa Imo

● Sa paghimo sing mas maayo nga mga desisyon

● Sa pagpabilin nga kalmado sa tion sang kahuol

● Sa pagpangita sing kaumpawan gikan sa kabalaka

● Sa pagpalapit sa Dios