Ang Pagtamod sang Biblia

Sin-o ang Anticristo?

“NABATIAN NINYO NGA MAGAABOT ANG ANTICRISTO.”​—⁠1 JUAN 2:18.

KON ginpaandaman ka nga may nakita nga isa ka makatalagam nga kriminal nga nagapadulong sa inyo lugar, ano ang imo himuon? Mahimo nga mangita ka gid sing husto nga mga detalye tuhoy sa iya hitsura kag mga pahito. Mahimo magapangandam ka.

Amo man ang kahimtangan karon. Ginpaandaman kita sang mga pulong ni apostol Juan: “Ang tagsa ka inspirado nga hambal nga wala nagatu-ad kay Jesus wala maghalin sa Dios. Dugang pa, amo ini ang inspirado nga hambal sang anticristo nga nabatian ninyo nga nagapakari, kag karon yari na ini sa kalibutan.” (1 Juan 4:3) May amo bala sini nga anticristo, isa ka kaaway sang Dios kag manugdaya sang mga tawo, nga nagapahog karon sa kaayuhan sang tanan nga katawhan?

Gingamit ni Juan ang termino nga “anticristo” sing lima ka beses sa iya duha ka sulat. Nagapatuhoy ini sa indibiduwal nga nagapamatok sa ginatudlo sang Biblia tuhoy kay Jesucristo kag nagalakip sa mga impostor nga nagapakunokuno nga si Cristo ukon ginpadala niya. Ang Biblia nagahatag sing masaligan nga impormasyon tuhoy sa anticristo. Apang subong sang nagakatabo kon kaisa sa mga kriminal, ang wala sing basihan nga mga report may kaangtanan sining makatalanhaga nga indibiduwal ginhatagan sing mas daku nga igtalupangod sa baylo sang kamatuoran.

Isa ka Halimbawa sang Sayop nga Pagkakilala

Sugod sang panahon ni apostol Juan, ang mga tawo nagpangangkon nga ang ginsiling ni Juan tuhoy sa anticristo nagapakilala sa isa ka espesipiko nga indibiduwal. Ang mga tawo nagpanugyan sing lainlain nga mga kandidato. Sang nagligad nga mga siglo madamo ang naghunahuna nga si Emperador Nero sang Roma amo ang anticristo. Sang ulihi, ang daku nga dumot kag kakugmat nga ginpautwas ni Adolf Hitler, nagkumbinsi sa madamo nga sia ang anticristo. Ang termino gin-aplikar pa gani sa Aleman nga pilosopo nga si Friedrich Nietzsche. Apang nagapati ang iban nga ang anticristo magaabot pa lang kag magapakita sia subong isa ka tuso, mapintas nga politiko nga nagahandum nga gamhan ang kalibutan. Nagapati sila nga ang sapat nga mapintas sang Bugna kapitulo 13 espesipiko nga nagapatuhoy sa anticristo nga ginsambit ni Juan. Nagasiling sila nga ang tanda sini nga 666 magapakilala sa sining palaabuton nga tagsakdag sang kalautan.

Ang mga nagasakdag sini nga mga ideya nagasigahom nga isa lamang ka anticristo ang gintudlo ni Juan. Apang ano ang ginapakita sang iya mga pulong? Binagbinaga ang 1 Juan 2:18: “Subong sang nabatian ninyo nga magaabot ang anticristo, bisan karon may nagatuhaw nga madamo nga anticristo.” Huo, “madamo nga anticristo,” indi isa lamang, ang balasulon sa makatulublag sa espirituwal nga kahimtangan sadto  anay sang unang siglo. Karon may yara, indi isa lamang, kundi madamo nga anticristo nga nagahuman sa anticristo nga klase. Sa kabilugan, nagtuga sila sing espirituwal nga kalaglagan sa katawhan. (2 Timoteo 3:1-5, 13) Sin-o ang mga anticristo?

Usisaon naton ang sapat nga mapintas sa Bugna kapitulo 13 subong posibilidad. Si apostol Juan nagsulat: “Ang sapat nga mapintas nga akon nakita kaangay sang leopardo, apang ang iya mga tiil subong sang iya sang oso, kag ang iya baba subong sang baba sang leon.” (Bugna 13:2) Ano ang kahulugan sini nga mga kinaiya?

Nakita sang mga iskolar sang Biblia ang kaangtanan sa ulot sang Bugna kapitulo 13 kag Daniel kapitulo 7. Ang Dios naghatag kay Daniel sing palanan-awon tuhoy sa malaragwayon nga mga sapat, lakip ang leopardo, oso, kag leon. (Daniel 7:2-6) Ano nga kahulugan ang ginhatag sang manalagna sang Dios sa sini? Sia nagsulat nga ining mga sapat nga mapintas nagalaragway sa mga hari, ukon mga panguluhan, sa duta. (Daniel 7:17) Gani makatarunganon kita nga makahinakop nga ang sapat nga mapintas sang Bugna nagarepresentar sa tawhanon nga mga panguluhan. Sanglit ining mga panguluhan nagapamatok sa Ginharian sang Dios, bahin sila sang anticristo.

Sin-o Pa ang Bahin sang Anticristo?

Sang si Cristo, nga Anak sang Dios, yari sa duta, madamo sia sing kaaway. Bisan pa indi na sia karon malab-ot sa pisikal, may modernong-adlaw nga mga kaaway sia. Talupangda kon sin-o ang mga nalakip sa sini.

Si apostol Juan nagsiling: “Sin-o bala ang butigon kon indi ang isa nga nagapanghiwala nga si Jesus amo ang Cristo? Ini amo ang anticristo, ang isa nga nagapanghiwala sa Amay kag sa Anak.” (1 Juan 2:22) Ginapatiko sang mga apostata kag mga lider sang butig nga pagsimba ang maathag nga mga panudlo ni Jesus nga mangin magumon nga relihioso nga daya. Ginasikway nila ang kamatuoran sang Biblia kag nagapalapnag sing mga kabutigan sa ngalan sang Dios kag ni Cristo. Ginapanghiwala nila ang matuod nga kaangtanan sang Amay kag sang Anak paagi sa ila doktrina sang Trinidad. Gani, bahin man sila sang anticristo.

Ginpaandaman ni Jesus ang iya mga disipulo sa Lucas 21:12: “Dakpon kamo sang mga tawo kag hingabuton kamo, nga nagatugyan sa inyo sa mga sinagoga kag mga bilangguan . . . bangod sa akon ngalan.” Halin pa sang unang siglo, ang matuod nga mga Cristiano nagbatas sing mapintas nga paghingabot. (2 Timoteo 3:12) Ang mga nagasugyot sini nga buhat nagapamatok kay Cristo. Bahin man sila sang anticristo.

“Sia nga indi dampig sa akon batok sa akon, kag sia nga wala nagatipon upod sa akon nagaalaplaag.” (Lucas 11:23) Ginapahayag diri ni Jesus nga ang tanan nga nagapamatok sa iya kag sa mga katuyuan sang Dios nga ginasakdag niya yara sa kategoriya sang anticristo. Ano nga katapusan ang nagahulat sa ila?

Ano ang Nagahulat sa mga Anticristo?

“Laglagon [sang Dios] ang mga nagapamulong sing kabutigan. Ang tawo nga nagapatulo sing dugo kag nagalimbong ginakangil-aran ni Jehova,” siling sang Salmo 5:6. Naaplikar bala ini sa mga anticristo? Huo. Si apostol Juan nagsulat: “Madamong madaya ang naglakat sa kalibutan, mga tawo nga wala nagapahayag nga si Jesucristo nagaabot sa unod. Amo ini ang madaya kag anticristo.” (2 Juan 7) Bangod sang ila mga daya kag paglimbong, laglagon sang Labing Gamhanan nga Dios ang mga anticristo.

Samtang ang pagpatuman sini nga pamatbat nagahilapit, indi dapat pagtugutan sang matuod nga mga Cristiano ang kontra-Cristiano nga daya kag pag-ipit, ilabi na gikan sa mga apostata, nga magpaluya sang ila pagtuo. Ang paandam ni Juan hilingagawon: “Andami ang inyo kaugalingon, nga indi ninyo madula ang mga butang nga ginpangabudlayan namon, kundi maagom ninyo ang bug-os nga padya.”​—⁠2 Juan 8.

 [Picture Credit Line sa pahina 22]

Si Nero sa pahina 2 kag 20: Sa maayong kabubut-on sang mga Bisita sang Ashmolean Museum, Oxford