Ang Pagtamod sang Biblia

Ang Paggamit sang Dios sing Puwersa​​—⁠Makatarunganon Bala Ini?

ANG makamamatay nga paggamit sing puwersa pirme nagakatabo sa maragtas sang tawo. Suno sa isa ka pagbulubanta, mahimo nga 170,000,000 ka tawo ang ginpatay sang ika-20 nga siglo sang ila mismo politikal nga mga rehimen. Subong sang sibu gid nga ginapakita sang Biblia, ang mga tawo nagagahom gihapon sa iban nga tawo sa ila kasamaran.​​—⁠Manugwali 8:9.

Bangod sang pag-abuso sang tawo sa masingki nga puwersa, mahimo ginaduhaduhaan sang iban ang paggamit sang Dios sing puwersa sa paglaglag sa iya mga kaaway. Indi bala nga sa idalom sang direkta nga mando sang Dios, ginsalakay kag ginpatay sang mga Judiyo ang Canaanhon nga mga pumuluyo sang Ginsaad nga Duta? (Deuteronomio 20:​16, 17) Kag indi bala nga ang Dios mismo nagasiling nga dugmukon niya kag laglagon ang tanan nga nagapakigsumpong nga mga pagginahom? (Daniel 2:44) Nagpalibog ang pila ka sinsero nga mga indibiduwal kon bala ang paggamit sang Dios sing puwersa makatarunganon pirme.

Pag-abuso sa Puwersa

Importante mahangpan nga ang ikasarang sa paggamit sing puwersa isa ka importante nga elemento sang panguluhan. Ang pagdumalahan nga indi makapatuman sang iya mga mando wala sing gahom. Halimbawa, walay sapayan sang ginareport nga mga pag-abuso sang mga pulis, pila bala ka tawo ang mangindi sa proteksion nga ginaaman sang pulisiya? Kag sin-o nga tawo nga may mahim-ong nga panghunahuna ang magapamatok nga kinahanglanon ang isa ka nagapanghikot nga sistema sang katarungan?

Si Mohandas Gandhi, nga nakilala sa iya pagkangil-ad sa kasingki, nagsiling anay: “Pananglit may isa ka tawo nga naghuramentado nga may dala nga espada, kag ginapamatay ang bisan sin-o nga masumalang niya, kag wala sing isa nga mangahas sa pagdakop sa iya nga buhi. Ang bisan sin-o nga makapatay sa sining nagbuang nga tawo pasalamatan gid sang komunidad kag kabigon nga isa ka mabinuligon nga tawo.” Huo, bisan gani si Gandhi nagaugyon nga dapat gamiton ang puwersa sa idalom sang pila ka mga kahimtangan.

Maathag nga ang ikasarang sa paggamit sing puwersa isa ka kinahanglanon  nga elemento sa bisan anong malig-on nga katilingban. Sa masami, kon ang katawhan nagapamatok sa paggamit sing puwersa, ang matuod nga ginamulay nila amo ang pag-abuso sa puwersa.​​—⁠Manugwali 4:​1-3.

“Ang Tanan Niya nga Dalanon Katarungan”

Wala sing ebidensia ang maragtas nga nag-abuso ang Dios sa iya gahom. Indi sia mapiguson sa iya paggahom. Luyag niya nga simbahon naton sia bangod sa gugma. (1 Juan 4:​18, 19) Sa katunayan, ang Dios wala nagagamit sing puwersa kon may yara man lang makatarunganon nga paagi nga malikawan ini. (Jeremias 18:​7, 8; 26:​3, 13; Ezequiel 18:32; 33:11) Kag kon magdesisyon sia nga maggamit sing puwersa, pirme sia nagahatag sing bugana nga paandam agod matadlong sang bisan sin-o ang iya dalanon kon luyag niya. (Amos 3:⁠7; Mateo 24:14) Amo bala ini ang mga buhat sang isa ka mapiguson kag mapintas nga Dios?

Ang paggamit sang Dios sing puwersa indi gid kaangay sa di-makatarunganon nga pag-abuso sa gahom sang mga tawo. “Ang tanan niya nga dalanon katarungan,” siling ni Moises tuhoy kay Jehova, “isa ka Dios sang katutom, nga sa iya wala sing inhustisya.” (Deuteronomio 32:4) Indi kaangay sa mga panguluhan sang mapiguson nga mga tawo, ang panguluhan sang Dios wala nasandig sa kon sin-o ang may kapin nga gahom. Sa tanan nga tion, gingamit niya ang puwersa nahisanto sa iya himpit nga gugma, kaalam, kag katarungan.​​—⁠Salmo 111:​2, 3, 7; Mateo 23:37.

Halimbawa, sang ginlaglag sang Dios ang mga malauton sa Anaw, ginhimo ini pagligad sang madamong tinuig nga pagpaandam. Mahimo kuntani magsulod ang bisan sin-o sa arka kag maluwas. Walo lamang ang nagsulod. (1 Pedro 3:​19, 20; 2 Pedro 2:5) Sang adlaw ni Josue, ginhimo sang Israel ang paghukom sang Dios batok sa malaut nga mga Canaanhon, isa ka paghukom nga ginpahibalo kapin sa 400 ka tuig sa wala pa! (Genesis 15:13-​21) Sa sulod sining bug-os nga tion, indi mahimo nga wala mahibaluan sang mga Canaanhon ang mabakod nga ebidensia nga ang mga Israelinhon amo ang pinili nga katawhan sang Dios. (Josue 2:​9-​21; 9:​24-​27) Apang, wala sing Canaanhon nga pungsod luwas sa mga Gabaonhon ang nagtinguha nga magpakitluoy ukon magpakighidait. Sa baylo, ginpili sang mga Canaanhon nga patig-ahon ang ila tagipusuon batok sa Dios.​​—⁠Josue 11:​19, 20.

May Awtoridad ang Dios

Kon nagatinguha kita nga hangpon ang paggamit sang Dios sing puwersa, dapat kita magsugod sa sadsaran nga kamatuoran tuhoy sa aton kahimtangan sa atubangan sang Dios. “Kami ang daga, kag ikaw ang amon Maninihon,” amo ang mapainubuson nga pagkilala ni manalagna Isaias. (Isaias 64:8) Maathag nga subong Manunuga sang uniberso, sarang magamit sang Dios ang puwersa sa bisan anong paagi nga luyag niya. Bilang pagkilala sa awtoridad sang Dios, kaangay ni Solomon, makasiling kita: “Ang pulong sang hari amo ang gahom sa pagbuot; kag sin-o ang makasiling sa iya: ‘Ano ang ginahimo mo?’”​​—⁠Manugwali 8:⁠4; Roma 9:​20, 21.

Bangod sang posisyon sang Dios subong labing gamhanan nga Manunuga, kinamatarong niya ang maghatag kag magkuha sang dutan-on nga kabuhi. Sa pagkamatuod, wala sing kinamatarong ang tawo kag kulang ang iya ihibalo agod duhaduhaan ang paggamit sang Dios sing puwersa. Dapat magtuon ang tawo kon paano ipahisanto ang iya panghunahuna sa panghunahuna sang Dios. “Indi bala ang inyo mga dalanon ang indi husto?” pamangkot ni Jehova.​​—⁠Ezequiel 18:29; Isaias 45:9.

Ang katarungan ni Jehova kag ang iya gugma para sa katawhan amo ang magapahulag sa iya nga dulaon sa duta ang mga nagaabuso sa gahom kag masingki nga nagatapak sa mga kinamatarong sang iban. Paluntaron sini nga paggamit sing puwersa ang maayo nga mga kahimtangan sa duta para sa tanan nga mahigugmaon sa paghidait nga mga tawo nga maluyag sini. (Salmo 37:​10, 11; Nahum 1:9) Nian, ang panguluhan sang Dios mapamatud-an nga matarong kag mabindikar sing dayon.​​—⁠Bugna 22:12-​15.