“Kon Kaisa Abi Ko Nagadamgo Lang Ako!”

Nagatulok si Lourdes sa siudad halin sa bintana sang iya apartment, ang mga tudlo niya nagatabon sa iya nagakurog nga baba. Taga-Latin Amerika sia nga nagaantos sa mga kamot ni Alfredo, ang iya masingki nga bana, sa sulod sang kapin sa 20 ka tuig. Nagbag-o na si Alfredo. Apang, mabudlay gihapon para kay Lourdes nga hambalan ang pisikal kag emosyonal nga kasakit nga iya ginbatas.

“Nagsugod ini pagligad lamang sang duha ka semana nga nakasal kami,” siling ni Lourdes sa mahinay nga tingog. “Kis-a, nataktak ang duha ko ka unto sang ginsumbag niya ako. Sang isa pa ka tion nagduko ako, kag nagtupa ang iya inumol sa aparador. Apang mas masakit pa ang mga buyayaw. Gintawag niya ako nga ‘walay pulos nga sagbot’ kag gintamod ako subong nga daw wala ako sing utok. Luyag ko maglayas, pero paano ko ini mahimo upod ang tatlo ka bata?”

Mapinalanggaon nga gin-agbayan ni Alfredo si Lourdes. “Isa ako ka propesyonal nga may mataas nga ranggo,” siling niya. “Nahuy-an ako sang ginpatawag ako sang korte kag ginhatagan sing protection order. Gintinguhaan ko nga magbag-o, apang wala magdugay amo man gihapon ang akon ginahimo.”

Paano nagbag-o ang kahimtangan? “Ang babayi sa balaligyaan sa pamusod sang dalan isa ka Saksi ni Jehova,” paathag ni Lourdes, nga mas relaks na karon. “Nagtanyag sia nga buligan ako nga mahangpan ang Biblia. Natun-an ko nga ginapabaloran ni Jehova nga Dios ang mga babayi. Nagsugod ako sa pagtambong sa mga miting sang mga Saksi ni Jehova, bisan pa nga sang primero nagpaakig gid ini kay Alfredo. Bag-o lang ako makaeksperiensia nga magpakig-upod sa mga abyan sa Kingdom Hall. Nakibot ako nga matukiban nga puwede gali ako makatigayon sang akon kaugalingon nga mga pagpati, mapabutyag ini sing hilway, kag matudlo pa gani ini sa iban. Nahisayran ko nga importante ako sa Dios. Naghatag ini sa akon sing kaisog.”

“Indi ko gid malipatan ang isa ka hitabo nga nagpabag-o sang kahimtangan. Nagakadto pa sadto si Alfredo sa Katoliko nga Misa kada Domingo, kag nagpamatok sia sa ginahimo ko upod sa mga Saksi ni Jehova. Gintulok ko sia sa mata kag nagsiling sa iya sing kalmado apang sing masinaligon: ‘Alfredo, ang imo ginahunahuna wala ko ginahunahuna.’ Kag wala niya ako ginsakit! Wala madugay pagkatapos sadto, nabawtismuhan ako, kag wala na gid niya ako ginsakit sa sulod sang lima ka tuig sugod sadto.”

Apang daku pa nga mga pagbag-o ang mahanabo. Si Alfredo nagpaathag: “Mga tatlo ka tuig sa tapos mabawtismuhan si Lourdes, gin-agda ako sang isa ka kaupod sa trabaho nga isa ka Saksi ni Jehova sa iya balay, kag ginpaathag niya sa akon ang makawiwili nga mga butang halin sa Biblia. Nagsugod ako sa pagtuon sang Biblia upod sa iya nga wala ini ginasugid sa akon asawa. Sang ulihi ginaupdan ko na si Lourdes sa mga miting. Madamo nga pamulongpulong nga nabatian ko didto ang tuhoy sa kabuhi sang pamilya, kag masami nga nahuya ako bangod sini.”

Nagdayaw si Alfredo sang makita niya ang mga katapo sang kongregasyon, lakip ang mga lalaki, nga nagapanilhig sang salog sa tapos sang miting. Sang nagduaw sia sa ila puluy-an, nakita niya ang mga bana nga nagabulig sa ila asawa sa paghugas sing mga pinggan. Ginpakita sining diutay nga mga hitabo kay Alfredo kon paano nagapanghikot ang matuod nga gugma.

Wala madugay pagkatapos sadto, nabawtismuhan si Alfredo, kag karon nagaalagad sila sang iya asawa subong bug-os tion nga mga ministro. “Pirme niya ako ginabuligan sa paghimos sang kinan-an kag hiligdaan,” siling ni Lourdes. “Ginadayaw niya ang akon linuto, kag ginatugutan niya ako nga magpili​—⁠subong sang kon ano nga musika ang luyag ko pamatian ukon kon ano nga mga butang ang amon baklon para sa balay. Mga butang ini nga wala gid anay ginahimo ni Alfredo! Sining karon lang, sa nahauna nga tion, gindalhan niya ako sing mga bulak. Kon kaisa abi ko nagadamgo lang ako!”

 [Kapsion sa pahina 10]

“Nahisayran ko nga importante ako sa Dios. Naghatag ini sa akon sing kaisog”

[Kapsion sa pahina 10]

Nagdayaw si Alfredo sang makita niya ang mga katapo sang kongregasyon, lakip ang mga lalaki, nga nagapanilhig sang salog sa tapos sang miting

[Kapsion sa pahina 10]

Nakita niya ang mga bana nga nagabulig sa ila asawa sa paghugas sing mga pinggan

[Kapsion sa pahina 10]

“Sining karon lang, sa nahauna nga tion, gindalhan niya ako sing mga bulak”