Sa Diin Makita ang mga Sabat?

Amo ina ang ginapamangkot sang madamo karon. Isa ka maestra sa Novosibirsk, Rusya, ang nagsiling nga mabudlay pangitaon ang mga sabat sa ginapamangkot sang iya mga estudyante tuhoy sa Dios kag relihion. Ginpaathag niya sa isa ka sulat:

“Sang nagpauli ako isa ka adlaw, may nakita ako nga isa ka magamay nga tract nga ginbilin didto nga natig-uluhan ‘Kon Ngaa Imo Masaligan ang Biblia.’ Nagatudlo ako sing maragtas sa eskwelahan, kag pirme ko ginabinagbinag sa akon mga estudyante ang mga topiko subong sang relihion, Biblia, kag Dios. Kon kaisa tuman kabudlay pangitaon ang mga sabat sa mga pamangkot sang kabataan.

“Sang una, abi ko anay ang mga tawo nagapalapit lang sa Dios kon may mga problema sila. Apang karon napat-od ko nga indi gid ini matuod. Ang isa mahimo man mamangkot: ‘Ngaa ako gid? Sin-o ako? Sa diin ako naghalin? Sa diin ako makadto kon mapatay ako?’ Importante nga makakita sing mga sabat sa sini nga mga pamangkot. Ang Biblia daw nagahatag sing makapakumbinsi nga mga argumento.”

Ang maestra naghinakop: “Nagsulat ako bangod luyag ko nga makahibalo sing dugang pa tuhoy sa Biblia kag sa Dios.”

Ginapatuhoy sang mga Saksi ni Jehova ang mga tawo sa Biblia sa pagsabat sang ila mga pamangkot. Binagbinaga ang libro nga Ang Ihibalo nga Nagadul-ong sa Kabuhi nga Walay Katapusan. Nalakip sa 19 ka kapitulo sini ang may tig-ulo: “Sin-o ang Matuod nga Dios?,” “Ngaa Nagatigulang Kita kag Nagakapatay?,” kag “Ngaa Ginatugutan Sang Dios ang Pag-antos?” Mahimo ka makapangabay sing isa ka kopya sining 192-pahina nga libro nga bulig sa pagtuon sa Biblia paagi sa pagsulat sa kaupod nga kupon kag ipadala ini sa direksion nga ginhatag ukon sa nagakaigo nga direksion nga nalista sa pahina 5 sini nga magasin.

□ Interesado ako nga makabaton sing kopya sang libro nga Ang Ihibalo nga Nagadul-ong sa Kabuhi nga Walay Katapusan.

□ Palihug pakig-anguti ako tuhoy sa walay bayad nga pagtuon sa Biblia sa puluy-an.