Suporta kag Kaawa Gikan sa Madamo nga Duog

ANG mga boluntaryo nag-inabot gikan sa iban nga mga bahin sang Estados Unidos kag gikan sa iban pa nga mga pungsod. Ang isa ka boluntaryo amo si Tom (ginapakita sa ibabaw), 29 anyos, isa ka bombero gikan sa Ottawa, Canada. Nagsiling sia sa Magmata!: “Nakita ko ang natabo sa TV kag luyag ko maghatag sing moral nga suporta sa akon mga masigkabombero sa New York. Nagmaneho ako pakadto sa New York sang Biernes kag nagkadto sa Ground Zero sang Sabado agod magbulig. Ginbutang ako sa ginatawag nga brigada sang balde, nga nagapanguha sing mga ginub-an sing binaldebalde.

“Mahalungon kami nga nangaykay sa ginub-an, sing tig-isa ka pala sa isa ka tion, nagapangita sing mga butang nga mahimo maghatag sing ideya agod makilala kon sin-o ang napatay nga mga bombero. Nakakita ako sing isa ka Halligan tool nga ginagamit sa pagbukas sa nakandaduhan nga mga puwertahan, kag sing mga coupling halin sa isa ka hose. Isa yadto ka mauti nga trabaho. Duha ka oras ang ginhinguyang sang mga 50 ka boluntaryo agod mapuno ang isa ka dump truck.

“Sang Lunes, Septiembre 17, nakuha namon ang mga bangkay sang pila ka bombero nga nagdalidali sa pagsulod sa tinukod sang nagligad nga Martes. Indi ko gid malipatan yadto nga hitabo​—⁠ang tanan nga trabahador nga nagtabang nag-untat sa pagtrabaho, ginhukas ang ila mga kalo kag helmet, kag nagtindog​—⁠bilang pagtahod sa nagkalamatay nga mga masigkabombero.

“Samtang nagatindog ako kag ginatan-aw ang kahimtangan sa Ground Zero, nakita ko kon daw ano kahuyang ang kabuhi karon. Nagpahunahuna ini sa akon sang akon kabuhi, sang akon trabaho, sang akon pamilya. Walay sapayan sang mga risgo, ang akon trabaho makapaladya gid​—⁠bangod makabulig ako sa mga tawo kag makaluwas pa gani sing mga kabuhi.”

Ang mga Saksi Naghatag sing Mapuslanon nga Bulig

Sa nahaunang duha ka adlaw sang kalamidad, mga 70 ka tawo ang nagdangop sa bug-os kalibutan nga ulong-talatapan sang mga Saksi ni Jehova. Ang iban nga nadulaan sing mga hulot kag bagahe sa otel ginhatagan sing dalayunan kag ilislan nga mga panapton. Ginpakaon sila. Ayhan sing labi pa ka importante, ginhatagan sila sing emosyonal nga suporta sang eksperiensiado nga Cristianong mga gulang.

Nagpadala man ang mga Saksi ni Jehova sing kinahanglanon nga pang-emerhensia nga mga kagamitan kag mga suplay para sa nagapangita-kag-nagatabang nga mga grupo nga nagatrabaho sa gintawag nga Ground Zero. Ginpagamit man ang mga salakyan sa departamento sang sunog sa pagdul-ong sa mga bombero sa duog nga talabangan. Si Ricardo (sa tuo, sa ibabaw), isa ka 39 anyos nga Saksi kag isa ka basurero, nagbulig, upod sa ginatos pa nga iban, sa pagpanguha  sing tonelada nga mga ginub-an adlaw-adlaw. Nagsiling sia sa Magmata!: “Ang talan-awon makapahuol gid, ilabi na para sa mga bombero, nga nagapangita sang ila nadula nga mga kaupod. Nakita ko sila sang nakuha nila nga buhi ang isa ka bombero. Ang isa pa ka bombero napatay bangod natup-an sia sang lawas sang tawo. Madamo nga bombero ang naghibi. Naghibi man ako. Sadto nga adlaw wala na sing mas maisog pa sa ila.”

“Tion kag Wala Ginapaabot nga Hitabo”

Linibo ka tawo ang napatay sa kalamidad. Lakip sa ila amo ang di-magkubos 14 ka Saksi, nga natabuan nga yara ukon malapit sa duog sang trahedya. Si Joyce Cummings, 65 anyos kag orihinal nga taga-Trinidad, nagpadentista malapit sa World Trade Center. Sing makapasubo, amo yadto ang tion sang kalamidad. Napuot sia sa aso kag gindala sa malapit nga ospital. Wala na nila sia matabangi. Ang natabo sa iya isa sang madamo nga kaso sang mga tawo nga nakaeksperiensia sang mga epekto sang “tion kag wala ginapaabot nga hitabo.” (Manugwali 9:11) Kilala sia subong isa ka makugi gid nga ebanghelisador.

Si Calvin Dawson (tan-awa ang kahon) nagatrabaho sa isa ka brokerage firm sa ika-84 nga panalgan sang south tower. Yara sia sa iya opisina kag kitaon gid sa iya ang north tower sa tapos lang gid ini ginbungguan sang eroplano. Ang iya amo, nga wala sa opisina, nagtawag sa telepono agod hibaluon kon ano ang natabo. Sia nagsiling: “Ginasugiran ako ni Calvin sang iya nakita. Sia nagsiling, ‘Ang mga tawo nagalinumpat!’ Ginsilingan ko sia nga magguwa kag pati na ang iban pa sa opisina.” Wala makaguwa si Calvin. Ang amo nagpadayon: “Si Calvin isa gid ka mabuot nga tawo kag ginadayaw namon tanan, bisan sang iban sa amon nga indi mga relihioso. Ginadayaw namon ang iya pagkadiosnon kag ang iya pagkatawo.”

Ang isa pa ka Saksi nga biktima amo si James Amato (natuo sa ubos sa pahina 10), amay sang apat ka kabataan kag kapitan sa departamento sang sunog sa New York. Ang mga nakakilala sa iya nagsiling nga maisog gid sia amo nga “magasaka sia sa nasunog nga tinukod bisan pa ang mga tawo nagapinalagyo.” Bisan patay na sia, ginpataasan ang  ranggo ni James kag ginhimo sia nga hepe sang isa ka batalyon sang departamento sang sunog.

Ang isa pa ka bombero nga Saksi, nga may pito ka tuig nga eksperiensia, amo si George DiPasquale. Asawa niya si Melissa kag may duha-ka-tuig nga anak nga babayi, si Georgia Rose. Isa sia ka gulang sa Staten Island nga kongregasyon sang mga Saksi ni Jehova kag didto sia sa ikanapulo nga panalgan sang south tower sang narumpag ini. Napatay man sia samtang nagatinguha sia sa pagluwas sa iban.

Duha lamang sila sa ginatos ka bombero, pulis, kag pang-emerhensia nga trabahador nga napatay samtang maisog nga gintinguhaan nila nga salbahon ang mga tawo. Ang kaisog sining mga manugtabang daku gid. Ang alkalde sang New York City nga si Rudolph Giuliani nagsiling sang ulihi sa isa ka grupo sang mga bombero nga ginpataasan ang ranggo: “Ang inyo kahanda sa pag-abante sing maisog sa labing mabudlay nga mga kahimtangan isa ka inspirasyon sa amon tanan. . . . Kag . . . ang kaisog sang Departamento sa Sunog sang Siudad sang New York amo ang pinakamaayo nga halimbawa.”

Ministeryo sa Paglugpay

Mga inadlaw pagkatapos sang trahedya, mga 900,000 ka Saksi ni Jehova sa Estados Unidos ang nagpanikasog gid nga lugpayan ang mga nagakalisod sa bug-os nga pungsod. Ang gugma sa isigkatawo amo ang nagpahulag sa ila nga lugpayan ang mga nagalalaw. (Mateo 22:39) Sa ila ministeryo ginpanikasugan man nila nga ipatalupangod ang lamang matuod nga paglaum para sa nasit-an nga katawhan.​—⁠2 Pedro 3:13.

Ang mga Saksi maawaon sa ila pagpalapit sa mga tawo. Ang ila tuyo amo ang paghatag sing lugpay gikan sa Kasulatan kag pag-ilog sa makapaumpaw nga huwaran ni Cristo, nga nagsiling: “Kari sa akon, kamo tanan nga ginabudlayan kag ginabug-atan, kag paumpawan ko kamo. Itakud ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo mga kalag. Kay ang akon gota mahulas kag ang akon lulan mamag-an.”​—⁠Mateo 11:28-30.

Ang mga grupo sang mga gulang gikan sa mga kongregasyon sang mga Saksi ni Jehova sa Manhattan gintugutan sa pagsulod sa Ground Zero agod masugilanon kag malugpayan ang mga manugtabang didto. Ang reaksion paborable gid. Ining mga ministro nagkomento: “Ang mga lalaki nagahibi samtang ginapaambit namon ang mga kasulatan sa ila.” Ang mga manugtabang nagapahuwayhuway sa isa ka sakayan sa pantalan. “Ang mga lalaki desperado na kon tan-awon, nga ang mga ulo nagadungok, kag daw indi na mabatas ang ila nakita. Naglingkod kami upod sa ila kag nagpaambit sing mga teksto gikan sa Biblia. Ginpasalamatan gid nila kami nga nagkari kami, nagasiling nga kinahanglan gid nila ini nga lugpay.”

Ang mga tawo nga napakig-angutan pagkatapos sang trahedya masami nga luyag nga may mabasa, kag linibo ka brosyur ang ginpanghatag sa ila nga wala sing bayad. Ang pila sini amo ang Kon ang Isa nga Ginahigugma Mo Mapatay, Will There Ever Be a World Without War?, kag Nagaulikid Gid Bala ang Dios sa Aton? Ginhatagan man sing pinasahi nga igtalupangod ang panghapin nga serye sa duha ka guwa sang Awake!: “The New Look of Terrorism” (Mayo 22, 2001) kag ‘Paglandas sa “Post-traumatic Stress” ’ (Septiembre 8, 2001, nga Magmata!). Sa madamo nga kaso ginpaathag sang mga Saksi ang paglaum sa Biblia tuhoy sa pagkabanhaw. (Juan 5:​28, 29; Binuhatan 24:15) Ayhan minilyon ka tawo ang napalab-utan sining makalulugpay nga mensahe.

Dapat Ini Magpahunahuna sa Aton

Ang mga trahedya kaangay sining natabo sa New York City dapat magpahulag sa aton tanan nga magpamalandong kon ano ang ginahimo naton sa aton kabuhi. Nagakabuhi bala kita tungod lamang sa makagod nga mga tulumuron, ukon nagatinguha bala kita nga makadugang sa kalipay sang iban? Si manalagna Miqueas namangkot: “Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?” (Miqueas 6:8) Ang kaugdang dapat magtiklod sa aton nga magdangop sa Pulong sang Dios agod masapwan ang matuod nga paglaum para sa mga patay kag agod matukiban kon ano ang himuon sang Dios sa indi madugay sa pagpasag-uli sing Paraiso nga mga kahimtangan sa sini nga duta. Kon luyag ninyo makahibalo sing dugang pa tuhoy sa mga saad sang Biblia, ginapalig-on namon kamo nga kontakon ang mga Saksi ni Jehova sa inyo duog.​—⁠Isaias 65:​17, 21-​25; Bugna 21:​1-4.

[Kahon/Mga retrato sa pahina 11]

ANG PANGAMUYO NI TATIANA

Ang balo ni Calvin Dawson, si Lena, nagsugid sa Magmata! tuhoy sa ginpangamuyo sang iya siete-anyos nga anak nga babayi pila lamang ka adlaw sa tapos niya mahibaluan nga ang iya amay indi na magpauli. Nagpangamuyo si Lena, kag namangkot si Tatiana, “Mahimo bala ako makapangamuyo, Mommy?” Nagpasugot ang iloy. Si Tatiana nangamuyo: “Jehova, amon langitnon nga Amay, ginapasalamatan ka namon tungod sining pagkaon kag tungod sa kabuhi sini nga adlaw. Kag nagapangabay kami nga ang imo espiritu mangin sa amon ni Mommy agod mangin mabakod kami. Kag ginapangabay man namon nga ang imo espiritu mangin kay Daddy, agod mangin mabakod sia sa iya pagbalik. Kag sa iya pagbalik, kabay nga mangin mabuot sia, mabakod, kag malipayon kag mapagros, kag makita namon sia liwat. Sa ngalan ni Jesus . . . ay, kag indi gali pagkalimti nga pabakuron si Mommy. Amen.”

Si Lena, nga indi sigurado kon bala nakahangop si Tatiana, nagsiling: “Tiana, katahom gid sang imo pangamuyo. Apang, Palangga, nahibaluan mo bala nga indi na magabalik si Daddy?” Hinali nga nakita sa pangguyahon ni Tatiana ang kakibot. “Indi na sia magbalik?” siling niya. “Indi na,” siling sang iya iloy. “Abi ko anay ginsiling ko na ini sa imo. Abi ko nahangpan mo nga indi na magbalik si Daddy.” Si Tatiana nagsiling: “Apang pirme mo ginasiling sa akon nga magabalik sia sa bag-ong kalibutan!” Sang ulihi, bangod narealisar kon ano ang buot silingon sang iya anak, si Lena nagsiling: “Pasensiaha ako, Tatiana. Wala ko lang ikaw mahangpan. Abi ko anay ang buot mo silingon nga mabalik si Daddy buwas.” Si Lena nagsiling: “Nalipay ako sa paghibalo nga ang bag-ong kalibutan matuod gid sa iya.”