Ang Pagtamod sang Biblia

Ang Pagbatyag nga Nakasala—Malain Bala Ini Pirme?

GINATAMOD sang madamo nga tawo sa karon ang pagbatyag nga nakasala subong isa ka di-maayo nga balatyagon. Ang ila balatyagon kaangay sing ginabatyag sang pilosopo nga Aleman nga si Friedrich Nietzsche, nga nagsiling: “Ang pagbatyag nga nakasala amo ang pinakamalala nga balatian nga naghalit sa tawo.”

Apang may tuhay na karon nga konklusion ang pila ka eksperto. “Ang pagbatyag nga nakasala isa ka importante nga bahin agod ang isa ka tawo mangin sensitibo kag responsable,” siling ni Susan Forward, Ph.D., isa ka terapista kag awtor nga kilala sa bug-os nga kalibutan. “Nangin bahin ini sang konsiensia.” Kon amo, malain bala ang magbatyag nga nakasala? May mga kahimtangan bala nga ang pagbatyag nga nakasala mahimo nga mapuslanon?

Ano ang Pagbatyag nga Nakasala?

Ang pagbatyag nga nakasala nagasugod kon marealisar naton nga may ginsaklaw kita nga suod sa aton ukon kon wala naton malab-ot ang mga talaksan nga luyag naton sundon. Subong sang ginasiling sang isa ka reperensia, ang pagbatyag nga nakasala nagapatuhoy sa “igbalatyag nga nakautang bangod sang kapaslawan, sayop, krimen, ukon sala sang isa.”

Sa Hebreong Kasulatan, ang pagbatyag nga nakasala naangot sa kapaslawan sang isa ka Israelinhon nga magkabuhi suno sa Kasuguan sang Dios​—ang kalabanan nga mga reperensia sini yara sa Biblia sa mga tulun-an sang Levitico kag Numeros. Sa Cristianong Griegong Kasulatan, ang ideya nga nakasala nagapatuhoy man sa serioso nga mga sala batok sa Dios.​—Marcos 3:​29; 1 Corinto 11:27.

Sing makapasubo, mahimo kita magbatyag nga nakasala bisan pa nga wala gid man kita sing may nahimo nga sala. Halimbawa, kon ang isa ka tawo perpeksionista kag luyag niya magpahamtang sang iya di-makatarunganon nga mga talaksan para sa iya kaugalingon, ang tagsa ka kapaslawan mahimo tunaan sang indi nagakabagay nga pagbatyag nga nakasala. (Manugwali 7:​16) Ukon basi pabay-an naton nga magsobra na ang aton kasubo bangod sang isa ka sayop nga magbatyag sing kahuya kag magaresulta sa indi kinahanglanon nga pagpaantos sa aton kaugalingon. Ano nian ang kaayuhan nga sarang mahatag sing pagbatyag nga nakasala?

 Ang Pagbatyag nga Nakasala Mahimo Mangin Maayo

Ang pagbatyag nga nakasala mahimo mangin maayo sa di-magkubos tatlo ka paagi. Una, nagapatimaan ini nga nakahibalo kita sang kalahamut-an nga mga talaksan. Ginapakita sini nga may yara kita nagapanghikot nga konsiensia. (Roma 2:​15) Sa pagkamatuod, ang isa ka libro nga ginbalhag sang American Psychiatric Association nagtamod sang indi pagbatyag nga nakasala subong makahalalit nga panimuot sa katilingban. Ang mga tawo nga may nadagtaan ukon nakibulan nga konsiensia nabudlayan sa paghantop sang husto kag sayop, kag mahimo makatalagam ini.​—Tito 1:​15, 16.

Ikaduha, ang natublag nga konsiensia makabulig man sa aton nga malikawan ang di-maayo nga mga buhat. Subong nga ang pisikal nga kasakit nagapaandam sa aton nga may problema kita sa panglawas, ang kasakit sa emosyon bangod sang pagbatyag nga nakasala nagapaandam man sa aton sang isa ka problema sa moral ukon espirituwal nga nagakinahanglan sang aton igtalupangod. Kon nahibaluan na naton ang kaluyahon, mas nagahalong kita nga likawan nga mahalitan ang aton kaugalingon, ang aton mga hinigugma, ukon masaklaw liwat ang iban sa palaabuton.​—Mateo 7:​12.

Ikatlo, ang pagtuad sang sala mahimo man makabulig sa nakasala kag sa biktima. Halimbawa, ang sala ni Hari David nagresulta sing lakas nga kasakit sa emosyon. “Sang naghipos ako, nahagas ang akon mga tul-an tungod sang akon pag-ugayong sa bilog nga adlaw,” sulat niya. Apang, sang nagtuad sia sang ulihi sang iya sala sa Dios, si David malipayon nga nagtuaw: “Libutan mo ako sing mga ambahanon sang kaluwasan.” (Salmo 32:​3, 7) Ang pagtuad mahimo gani makapaayo sang pamatyag sang biktima bangod ang pag-aku sang sala nagapasalig sa biktima nga ginapalangga sia kay nagpahulag ini sa nakasala nga hinulsulan ang gindulot nga kasakit sa iya.—2 Samuel 11:2-15.

Ang Timbang nga Pagtamod sa Pagbatyag nga Nakasala

Para sa timbang nga pagtamod sa pagbatyag nga nakasala, talupangda ang daku nga kinatuhayan sa paagi nga gintamod ni Jesus kag sang mga Fariseo ang mga makasasala kag ang sala. Sa Lucas 7:​36-​50, mabasa naton ang tuhoy sa imoral nga babayi nga nagsulod sa balay sang isa ka Fariseo diin si Jesus nagakaon didto. Nagpalapit sia kay Jesus, ginhugasan ang tiil ni Jesus sang iya mga luha, kag ginpahumutan sang malahalon nga lana.

Gintamod sining relihioso nga Fariseo ining babayi subong indi nagakadapat sang iya tion kag igtalupangod. Naghunahuna sia: “Ini nga tawo [si Jesus], kon sia isa ka manalagna, makahibalo kon sin-o kag kon ano nga sahi sang babayi ang nagatandog sa iya, nga sia isa ka makasasala.” (Lucas 7:39) Insigida gintadlong ni Jesus ang iya panghunahuna. “Wala mo paghisui sing lana ang akon ulo,” siling ni Jesus. “Apang ining babayi naghaplas sang akon mga tiil sing ihalaplas. Bangod sini, ginasiling ko sa imo, ang iya mga sala, bisan pa madamo, ginpatawad, bangod naghigugma sia sing daku.” Walay duhaduha nga ining maayong mga pulong nagpalig-on sa babayi kag nagpahalipay sa iya tagipusuon.​—Lucas 7:​46, 47.

Wala gid ginakunsinti ni Jesus ang imoralidad. Sa baylo, ginatudluan niya ining bugalon nga Fariseo sang pagkasuperior sang gugma subong amo ang dapat nga motibo sa pag-alagad sa Dios. (Mateo 22:36-​40) Siempre, nagakaigo lang nga ang babayi magbatyag nga nakasala bangod sang iya imoral nga nagligad. Maathag nga mahinulsulon sia, kay naghibi sia, wala magpakamatarong sang iya nagligad nga paggawi, kag naghimo sing positibo nga mga tikang sa pagpadungog kay Jesus sing dayag. Sang makita ini, si Jesus nagsiling sa iya: “Ang imo pagtuo nagluwas sa imo; lakat ka sa paghidait.”​—Lucas 7:​50.

Sa pihak nga bahin, ang Fariseo padayon nga nagpakanubo sa iya subong isa ka makasasala. Ayhan nagalaum sia nga ‘ipatudok sa iya nga manabat sia sa Dios’ kag pakahuy-an sia. Apang ang padayon nga pagpabatyag sa iban nga nakasala sila bangod wala nila pirme ginahimo ang mga butang suno sa aton panglantaw, indi gid mahigugmaon, kag sa ulihi, wala sing matigayon nga kaayuhan. (2 Corinto 9:7) Ang pinakamaayo nga mga resulta nagahalin sa pag-ilog kay Jesus​—paagi sa pagpahamtang sing maayong halimbawa, pagdayaw sa iban sing bunayag, kag pagpabutyag sing pagsalig sa ila bisan pa kon kaisa ang pagsabdong kag laygay mahimo nga ginakinahanglan.​—Mateo 11:28-30; Roma 12:10; Efeso 4:​29.

Kon amo, ang pagbatyag nga nakasala mahimo mangin maayo, kinahanglanon pa gani kon nakahimo kita sing sala. Ang Hulubaton 14:9 (Knox) nagsiling: “Ang buangbuang nagapakadiutay sa balatyagon nga nakasala nga nagakinahanglan sing katumbasan.” Ang natublag nga konsiensia mahimo kag dapat magapahulag sa aton sa pagtuad kag sa paghimo sang iban pa nga kinahanglanon nga aksion. Apang, ang panguna nga rason sa pag-alagad kay Jehova dapat indi pirme ang pagbayad sang nahimo nga sala, kundi gugma. (Job 1:​9-​11; 2:​4, 5) Ang Biblia nagapasalig sa aton nga kon ang maayo nga mga tawo napalig-on kag napaumpawan bangod sining panghunahuna, himuon nila ang ila bug-os nga masarangan. Labing importante, malipay sila sa paghimo sini.