Magpamati kag Magtuon
Magpamati kag Magtuon
“OTSENTAY-SINGKO porsiento sang aton nahibaluan ang natun-an naton paagi sa pagpamati,” siling sang report sa pamantalaan nga Toronto Star. Bisan pa nagapamati kita sa daku nga bahin sang aton tion, nagakatublag ukon nagakawili kita sa iban nga butang ukon malipatan naton ang 75 porsiento sang aton mabatian. Ginapadaku sining talalupangdon nga mga estadistika nga dapat naton pauswagon ang aton ikasarang sa pagpamati.
“Ang di-maayo nga pagpamati isa ka kabangdanan sang madamo nga problema sa katilingban,” suno sa report. Si Rebecca Shafir, isa ka espesyalista sa mga diperensia sa paghambal kag eksperto sa patag sang pagkomunikar, nagapati nga masami ini nga ginabangdan sang paghikog, kasingki sa eskwelahan, pagkaguba sang pamilya, kag pag-abuso sa droga.
Ang mga nagatuon tuhoy sa tawhanon nga katilingban nagsiling nga ang mga tawo may lainlain nga estilo sa pagpamati. Ang iban mga tagpalamati nga interesado sa mga tawo kag luyag nila pamatian ang tanan makawiwili nga detalye sang isa ka sugilanon. Ang iban naman mga tagpalamati nga interesado sa mga hitabo sa sugilanon kag luyag nila nga mangin direkta sa punto ang humalambal. “Gani, sa paghambalanay sa ulot sang tagpalamati nga interesado sa mga tawo kag sang tagpalamati nga interesado sa mga hitabo, may posibilidad nga madula ang komunikasyon,” siling sang Star.
Sa maayong rason, ginpadaku ni Jesus nga dapat ‘maghatag sing igtalupangod kon paano ikaw nagapamati.’ (Lucas 8:18) Maayo nga pamatasan ang maayo nga pagpamati. Importante ini nga bahin sang maayo nga paghambalanay. Nalakip sa praktikal nga mga panugda kon paano mamati sa tion sang paghambalanay amo ang indi pagsapak sa mga tublag, pagpalapit diutay sa nagahambal, kag pagpakita sing reaksion upod ang pagtulok sing direkta sa mata kag pagtango. Bangod ang daku nga bahin sang aton matun-an nagadepende sa maayo nga pagpamati, dapat naton tanan padayon nga pangabudlayan ang paghatag sing igtalupangod.