Pamangkot sang mga Pamatan-on . . .

Paano Ako Makabantala sa Akon mga Kaeskwela?

“Nagabantala ako sang hinali lang nga nasumalang ko ang isa ka kakilala. Nagpalangluya ako! Nagsal-ot na lang ang upod ko kag sia ang nagpadayon sang akon ginahambal.”—Alberto.

 “Nahibaluan ko nga may kaklase ako nga nagaistar sa sini nga kalye, gani ang akon magulang nga lalaki ang akon ginpahambal sa tanan nga balay. Sang madugaydugay na daw kinapoy na sia kag ginpangabay ako nga maghambal sa masunod nga balay. Nanuktok ako, kag—ay abaw—ang kaklase ko pa! Kinulbaan gid ako!”—James.

PARA sa mga pamatan-on daw indi “normal” nga hambalan ang relihion. Apang, sa tunga sang matuod nga mga Cristiano, ginapabaloran sang mga pamatan-on ang ila hatag-Dios nga pribilehiyo nga ipaambit ang ila pagtuo sa iban. Sa amo linibo ka pamatan-on nga mga Saksi ni Jehova ang nagapakigbahin sa pamalaybalay nga pagbantala. Apang nagabantala ang iban nga nahadlok nga basi masumalang nila ang ila kaeskwela. “Ginakulbaan ako gihapon kon makita ko ang akon mga kaeskwela anay,” siling ni Jennifer, bisan pa nga madugay na sia nga nakagradwar sa hayskul.

Kon ikaw isa ka pamatan-on nga Cristiano, mahimo nga amo man sina ang ginabatyag mo kon kaisa. Sa pagkamatuod, nahadlok kita tanan nga sikwayon, gani normal gid lang ang pagbatyag sing kahangawa kon hambalan ang relihion upod sa isa ka kaeskwela. * Apang wala sing rason nga magpalangluya sa kahadlok. Nadumduman mo bala ang tawo nga gintawag sang Biblia nga “Jose nga taga-Arimatea”? Nagtuo sia sa mga natun-an niya kay Jesus. Apang, ginlaragway sang Biblia si Jose subong “disipulo ni Jesus apang sa tago tungod sa kahadlok niya sa mga Judiyo.” (Juan 19:38) Ano ang batyagon mo sa isa ka abyan nga luyag itago ang inyo pag-abyanay? (Lucas 12:8, 9) Gani, indi makapakibot nga nagapaabot ang Dios nga ang tanan nga Cristiano ‘magpahayag sing dayag’ sang ila pagtuo. (Roma 10:10) Lakip sa sini ang pagpakigsugilanon sa mga pamatan-on sa inyo eskwelahan.

Nalandas ni Jose nga taga-Arimatea ang iya kahadlok, ayhan tubtob sa pagpangabay sing pahanugot nga ilubong ang bangkay ni Jesus. Paano mo malandas ang imo kahadlok?

Pagpalambo sing Kakunyag sa Pagbantala

Wala gid magpangalag-ag si apostol Pablo nga ipaambit ang iya pagtuo sa iban. Sa Roma 1:15, ginlaragway niya ang iya kaugalingon nga nakunyag sa pagbantala sang mensahe sang Biblia. Ano ang kabangdanan sini nga kakunyag? Sia nagsiling, subong mabasa sa bersikulo 16: “Wala ko ginakahuya ang maayong balita; ini, sa katunayan, amo ang gahom sang Dios nga sa kaluwasan sa tagsatagsa nga may pagtuo.” Kamusta ka? Napamatud-an mo na gid bala sa imo kaugalingon ang kamatuoran? (Roma 12:⁠2) Kumbinsido gid bala ikaw nga ang mensahe sang Biblia “amo ang gahom sang Dios nga sa kaluwasan”?

Indi bastante ang pagtambong lamang sa Cristianong mga miting upod sa imo mga ginikanan. “Mahapos lang magtambong sa mga miting,” siling sang isa ka lin-ay nga si Deborah, “bangod ginasilingan ka sang imo mga ginikanan. Apang kon pamangkuton ako sang mga tawo tuhoy sa Biblia, indi ako makahibalo magsabat.” Nagsiling man ang isa pa ka lin-ay nga si Mi Young: “Dapat gid naton mapamatud-an sa aton kaugalingon nga ini amo ang kamatuoran.”

Ano ang makapahulag sa imo nga ipaambit sa iban ang imo nahibaluan sa Biblia? Ang personal nga pagtuon sa sini. Ang pamatan-on nga si Sean nagsiling: “Kon personal mo nga tun-an ang Biblia, ginapatudok mo ang kamatuoran sa imo tagipusuon. Nagatuon ka para sa imo kaugalingon.” Matuod, indi tanan palatuon. “Indi ako mahuyugon magbasa,” siling ni Shevon. “Gani sang primero nabudlayan ako magbasa sang Ang Lalantawan kag Magmata! ukon magbasa sang Biblia adlaw-adlaw. Apang samtang nagaligad ang panahon, nahimo ko ini.”

Ano ang resulta sining maukod nga pagtuon? Si apostol Pablo nagsiling: “Ang pagtuo nagasunod sa butang nga nabatian.” (Roma 10:17) Samtang nagatubo ang imo pagtuo kag kombiksion, pat-od nga magabag-o ang imo panimuot. Ang lin-ay nga taga-Brazil nga si Elisângela naghinakop: “Isa ka kadungganan ang mangin Cristiano, kag indi ini dapat ikahuya.” Sa pagkamatuod, samtang nagatubo ang imo pagtuo, mapahulag ka nga makigsugilanon sa iban—lakip sa imo mga kaklase. Si Pablo nagsiling: “Nagatuo . . . kami kag gani nagahambal kami.” (2 Corinto 4:13) Isa pa, paano ka mangin ‘matinlo sa dugo’ sang iban kon ginadingot mo ang nagahatag-kabuhi nga ihibalo sa mga pamatan-on nga makita mo kada adlaw?—Binuhatan 20:26, 27.

Apang, nagabatyag ang iban nga pamatan-on nga mga Cristiano nga indi sila sangkol sa pagpakigsugilanon sa iban tuhoy sa Biblia. “Kon indi ka makahibalo sang imo isiling,” siling sang pamatan-on nga si Joshua, “indi makalilipay ang pagbantala.” Sa liwat, ang paghangop sing madalom pa sa Biblia makabulig sa imo nga maatubang ini sing sangkol. (2 Timoteo 2:15) Sa mga kongregasyon sang mga Saksi ni Jehova, mapalapitan sang mga pamatan-on ang mga gulang kag makapangayo sing bulig sa pagpalambo sing kalantip sa pagpanudlo. Siling sang Aleman nga pamatan-on nga si Matthias: “Kon makasugilanon na gani ako sa mga tawo—indi lamang makatanyag sang mga literatura sa Biblia⁠—​nalipay na ako sa pagbantala.”

Sa katapusan, ipangamuyo sa Dios nga buligan ka nga makahambal nga may kaisog. (Binuhatan 4:29) Naeksperiensiahan ni apostol Pablo ang bulig sang Dios sa sini nga bahin. Sa 1 Tesalonica 2:⁠2,  sia nagsiling: “Nagtipon kami sing kaisog paagi sa aton Dios agod mapamulong sa inyo ang maayong balita sang Dios nga may daku nga pagpanikasog.” Suno sa isa ka reperensia, ini nga pinamulong mahimo ibadbad nga, “Gindula sang Dios ang kahadlok sa amon tagipusuon.” Gani ngaa indi magpangamuyo kag magpangabay sa Dios nga dulaon ang kahadlok sa imo tagipusuon?

Pagpakilala nga Isa ka Saksi

Nahisanto sa sina nga pangamuyo, makahimo ka sang isa ka maisugon nga tikang. Ang taga-Britanya nga lin-ay nga si Chic nagpanugda: “Sugiri ang imo mga kaeskwela nga Saksi ka.” Indi ka dapat mangin ‘tago nga disipulo.’ Ang lin-ay nga si Rebecca nagsiling nga nahadlok sia anay nga masumalang sa pagbantala ang isa nga kilala niya. Apang nagsiling sia nga natukiban niya nga “kon sugiran mo sila nga isa ikaw ka Saksi kag nagapamalaybalay ka, nagapamangkot sila kon kaisa, ‘Ti, makakadto ka bala sa amon balay?’ ”

Apang ngaa hulaton mo pa ang wala ginapaabot nga pagkit-anay? Magpangita sing mga kahigayunan nga masugid mo ang imo pagtuluuhan sa eskwelahan. Dumduma ang mga ginpamangkot ni apostol Pablo: “Paano . . . sila magatuo sa iya nga wala nila mabatian? Paano naman sila makabati kon wala sing magbantala?” (Roma 10:14) Yara ka sa pinakamaayo nga posisyon sa pagbulig nga makabati ang imo mga kaklase. Ang lin-ay nga si Iraida nagsiling: “Ang eskwelahan isa ka teritoryo nga kami lamang ang makakadto.” Gani madamong pamatan-on ang nagahimulos sang ila kahimtangan paagi sa pagbantala sing di-pormal.

Apang, kon kaisa may mga asaynment sa klase nga nagahatag sa imo sing kahigayunan nga mapaambit ang mga kamatuoran sang Biblia. Ang taga-Britanya nga lin-ay nga si Jaimie nagsiling: “Ginhambalan namon ang ebolusyon sa amon klase sa siensia, kag ginsugid ko ang akon ginapatihan. Gin-uligyat ako sang isa ka kaklase nga lalaki kag nagsiling nga ang mga Saksi ni Jehova mapigaw sing ulo kag indi dapat mag-eskwela. Apang, sa gilayon gin-apinan ako sang iban ko nga kaklase.” Maathag nga ang pagkakilala sa iya subong isa ka huwaran nga Saksi may maayo nga resulta. Nagsiling pa si Jaimie: “Subong resulta, nakapahamtang ako sa akon kaklase sang libro nga Is There a Creator Who Cares About You?” *

Ang 14-anyos nga lin-ay sa Romania nga si Roxana nagsaysay man sang kaanggid nga eksperiensia: “Ginpahibalo sang amon maestra nga hambalan namon sa klase ang alkoholiko nga ilimnon, tabako, kag droga. Gani gindala ko ang Marso 22, 2000, nga guwa sang Awake! (Abril 8, 2000, nga Magmata!) sa tema nga ‘Kon Paano Mo Mauntat ang Pagpanigarilyo.’ Nakita sang isa ko ka kaklase ang magasin, ginkuha ini, kag wala na gin-uli sa akon. Sa tapos mabasa ini, nagsiling sia nga determinado sia sa pag-untat sa pagpanigarilyo.”

Mahimo nga indi amo sina pirme kaayo ang mabaton mo nga reaksion. Apang ang Manugwali 11:⁠6 nagapalig-on sa aton: “Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot; kay wala ka makahibalo kon diin ini magauswag.” Bisan kon indi maayo ang reaksion, ang pagpaambit mo sang imo pagtuluuhan sa eskwelahan magapasad sang mas maayo nga paghambalanay kon makasumalang ka sing kaeskwela sa pamalaybalay nga ministeryo. Ang taga-Britanya nga lin-ay nga si Jessica nagsiling: “Ang pagpanaksi sa imo mga kaeskwela mas mahapos bangod kilala mo na sila.” Mahimo nga makibot ka nga luyag gali mahibaluan sang iban sang imo mga kaeskwela ang imo mga ginapatihan.

Matuod, indi tanan mainayuhon nga magabaton sa imo. Apang ginhatag ni Jesus ining praktikal nga laygay: “Bisan diin nga ang bisan sin-o man indi magbaton sa inyo ukon magpamati sang inyo mga pulong, sa pagguwa ninyo sadto nga balay . . . itaktak ninyo ang yab-ok sa inyo mga tiil.” (Mateo 10:14) Buot silingon, indi mo pagkabigon nga ikaw ang ginsikway nila. Mahidaiton lang nga maghalin kag magpangita sang luyag magpamati. Sa ulihi makakita ka sang mga bunayag sing tagipusuon nga ginagutom sa kamatuoran kag luyag magpamati. Indi bala makapaladya kon isa sa ila kaklase mo? Kon amo, malipay ka nga nalandas mo ang imo kahadlok sa pagpaambit sang imo pagtuo sa imo mga kaklase.

[Mga nota]

[Blurb sa pahina 12]

“Kon personal mo nga tun-an ang Biblia, ginapatudok mo ang kamatuoran sa imo tagipusuon.”—Sean.

[Retrato sa pahina 10]

Indi mahadlok nga magpakilala nga isa ka Saksi

[Retrato sa pahina 10]

Ang mga asaynment sa klase masami nga nagahatag sing kahigayunan nga mapaambit ang mga kamatuoran sang Biblia