Ang Bug-os Kalibutan nga Paghidait Indi Damgo Lamang!

KON mabalikan lamang ni Alfred Nobel ang nagligad nga siglo, magalaum ayhan sia sa bug-os kalibutan nga paghidait? Walay duhaduha nga malipay sia sa paghibalo nga madamo ang nagpanikasog gid nga dulaon ang inaway. Apang, makita niya ang malain nga katunayan. Ginsumaryo ini ni Propesor Hugh Thomas: “Ang ikabeinte nga siglo​—⁠bisan pa nakilala bangod sang pag-uswag sa katilingban kag sang daku nga kabalaka sang mga panguluhan sa kabuhi sang mga imol⁠​—⁠​ginpangibabawan sang machine gun, tangke de guerra, B-52, bomba nuklear kag, sang ulihi, sang misil. Kilala ini bangod sang mga inaway nga mas madugo kag malaglagon sangsa bisan ano nga dag-on.” Nagsiling pa si Thomas nga “gani isa lamang ka opinyon kon bala ini nga dag-on matawag gid nga mainuswagon ukon indi.”

Mas malauman bala naton karon ang bug-os kalibutan nga paghidait bangod yari na kita sa ika-21 nga siglo? Indi gid! Ginapatuhuyan ang mga pagsalakay sang mga terorista sang Septiembre 11, 2001, sa New York City kag sa Washington, D.C., ang Newsweek nga magasin nagsiling: “Sa kalibutan nga ang Boeing-767 nga mga eroplano mahimo mangin mga misil, daw wala na sing imposible, di-makatarunganon​—⁠ukon, ang pinakamalain, daw wala na sing mapunggan pa nga hitabo.”

Ang iban nagasiling nga agod mahanabo ang bug-os kalibutan nga paghidait, duha ka butang ang dapat matabo: Una, dapat bag-uhon gid sang mga tawo ang ila pagtamod kag paggawi; kag ikaduha, dapat mahiusa ang tanan nga pungsod sa idalom sang isa ka panguluhan. Ginatagna sang Biblia ang tion nga matigayon ang paghidait​—⁠apang indi paagi sa pagpanikasog sang mga tawo. Ang Salmo 46:⁠9 nagasiling tuhoy sa Manunuga, si Jehova nga Dios: “Ginapatunong niya ang mga inaway tubtob sa ukbong sang duta.” Paano ini himuon sang Dios? Paagi sa iya Ginharian, nga sulitsulit nga ginapangamuyo sang madamong sinsero nga mga tawo. Ini nga Ginharian indi isa ka di-mahangpan nga kahimtangan sang tagipusuon, kundi isa ka matuod nga panguluhan nga paagi sa sini paluntaron sang Dios ang paghidait sa bug-os nga duta. Ang gin-inspirar nga si manalagna Isaias nagtagna nga ang mga sakop sini nga panguluhan indi na “magtuon sing inaway.” (Isaias 2:⁠4) Paagi sa bug-os kalibutan nga programa sa pagpanudlo, matun-an sang mga tao nga magkabuhi sa paghidait kag sa amo “salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas.”

Bisan karon, ginahimo na ini sang mga Saksi ni Jehova. Wala sila nagagamit sing mga hinganiban batok sa ila isigkatawo, bisan pa lainlain ang ila etniko nga mga grupo kag nagapuyo sa kapin sa 200 ka pungsod. Ang ila neutral nga posisyon sa puno sing inaway nga kalibutan nagapamatuod nga ang paghidait indi isa ka damgo kundi matuod gid nga mahanabo.

Luyag mo bala makatuon sing dugang pa tuhoy sa sining pasad sa Biblia nga paglaum para sa matuod nga paghidait? Magsulat palihug sa mga manugbalhag sini nga magasin, nga ginagamit ang direksion nga nalista sa pahina 5 nga malapit sa imo, ukon kontaka ang mga Saksi ni Jehova sa inyo lugar.