Pamangkot sang mga Pamatan-on . . .

Ano ang Akon Himuon Agod Mangin Mas Makabilihag?

“Indi madali ukon komportable makigsugilanon sa mga babayi. Indi ko nahibal-an ang ila ginahunahuna, ang ila ginabatyag, ukon ang ila pagtamod.”​​—⁠Tyler.

ANO nga mga kinaiya ang naluyagan gid sang mga babayi sa mga lalaki? “Ang kompiansa,” siling ni Emily, nga isa ka tin-edyer. Ang pagkapalalahog amo ang una sa listahan ni Robyn, nga isa pa ka tin-edyer. Kag ano gid nga kinaiya ang naluyagan sang mga lalaki sa mga babayi? Sing di-makapakibot, ang nagapanguna sa listahan sang isa ka surbe amo ang katahom. Ang magkapareho sing mga luyag kag mga prinsipio sa kabuhi amo ang ikan-om sa listahan.

Ang mga artikulo kag mga surbe tuhoy sa relasyon sang lalaki kag babayi masunson nga makita sa pangtin-edyer nga mga magasin. Maathag nga madamo nga pamatan-on ang pirme nagahunahuna​—⁠ukon ayhan nagakabalaka pa gani​—⁠kon paano sila ginatamod sang tuhay nga sekso. Mahimo nga nabalaka ka sa sini kon kaisa. Indi buot sini silingon nga handa ka na sa pagminyo. Ang rason amo nga wala sing isa ang luyag nga mangin di-makabilihag ukon di-maluyagan! Si Tyler nagsiling: “Kon ikaw isa ka tin-edyer, luyag mo nga mangin makabilihag sa tanan. Luyag mo nga batunon ka sang imo mga katubotubo, lalaki man kag babayi.” Subong man, mahimo nga luyag mo nga sa pila ka adlaw makakita ka sing isa ka nagakaigo nga tiayon. Kon mag-abot ina nga tion, natural lang nga luyag mo nga mabihag sia.

Apang, subong isa ka Cristianong pamatan-on, mahimo nga wala ka sing madamo nga eksperiensia tuhoy sa pagpakig-angot sa tuhay nga sekso. Yara man ang pag-ipit nga luyag mo nga mangin makabilihag sa imo mga katubotubo. Bangod sang madamong matahom nga mga modelo kag maskulado nga mga artista nga makita mo sa TV kag sa mga magasin, indi katingalahan nga mahimo ka magbatyag nga wala sing kompiansa sa kaugalingon kag indi nagakabagay! Ano, kon amo, ang kinahanglan agod mangin makagalanyat sa iban​—⁠pati na sa tuhay nga sekso⁠—​sa maayo kag timbang nga paagi?

Ang Kabuangan sang Pagtinguha nga Makatigayon sing “Himpit” nga Lawas

Ang clinical psychologist nga si William S. Pollack nagsiling nga bangod sang impluwensia sang industriya sang kalingawan, madamong pamatan-on ang “nagahinguyang sing di-maisip nga oras sa pagdieta, sa pagbarbel, kag sa pag-aerobic, ang tanan sa panikasog nga mapabag-o ang kadakuon kag bayhon sang ila lawas.” Ang iban makatalagam pa gani nga nagahimo sing sobra, subong sang halos indi na pagkaon, agod maangkon ining “himpit” nga lawas. Apang, ang Social Issues Research Centre nagsiling: “Ang karon nga talaksan sang media sa katahom para sa mga babayi mahimo lamang maangkon sang kubos sa 5% sang mga kababayin-an​—⁠kag tuhoy lamang ini sa kabug-aton kag kadakuon. Kon luyag mo ang himpit nga bayhon, nawong, kbp., ayhan mga 1% lamang ang makaangkon sini.”

Sa amo, ang laygay sang Biblia sa Roma 12:2 praktikal: “Indi pagtuguti ang kalibutan sa palibot mo nga idasok ka sa molde sini.” (Phillips) Apang, wala ini nagakahulugan nga indi ka na dapat magkabalaka sa imo hitsura. Nagakaigo lamang nga atipanon mo ang imo lawas paagi sa haganhagan nga ehersisyo kag  timbang nga dieta. (Roma 12:⁠1; 1 Timoteo 4:8) Ang nagakaigo nga pahuway kag tulog makabulig man sa imo agod mangin maayo gid ang imo hitsura kag pamatyag. Subong man, talupangda ang imo pamatasan sa katinlo kag pagpahinar. Si David, nga isa ka Britaniko nga pamatan-on, nagsiling: “May isa ka babayi nga medyo matahom, apang may angsod sia. Ginalikawan sia sang mga tawo bangod sini.” Gani maligo pirme. Ang matinlo nga mga kamot, buhok, kag mga kuko nagapatahom sa imo.

Walay sapayan nga wala ginapalig-on sang Biblia ang paghatag sing daku nga igtalupangod sa kon ano ang imo ginasuksok, nagalaygay ini sa mga Cristiano nga “magpamuni sing panapton nga nagakaigo, nga may kaugdang kag kaligdong.” (1 Timoteo 2:9) Magsuksok sing panapton nga nagapatahom sa imo apang indi sobra ukon di-maugdang.⁠ * Ang nagakaigo nga pagtalupangod sa imo hitsura makapauswag sang imo kompiansa sa kaugalingon. Amo sini ang ginsiling sang pamatan-on nga si Paul: “Mahimo nga indi ikaw ang pinakamatahom ukon pinakamaambong, apang mapauswag mo ini.”

Nasulod nga mga Kinaiya

Walay sapayan nga ang matahom nga nawong kag lawas makaganyat sang igtalupangod, sa ulihi “ang katahom isa ka bukal.” (Hulubaton 31: 30, Byington) Ang katahom wala nagadugay, kag indi sini mabuslan ang matahom nga mga kinaiya. (Hulubaton 11:22) Dumduma man nga “ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.” (1 Samuel 16:7) Gani sa baylo nga ituon ang imo bug-os nga igtalupangod sa pagpatahom sang imo lawas ukon kon daw ano ikaw ka maskulado, pauswaga ang imo pagpuni sing “tinago nga pagkatawo sang tagipusuon sa di-madinulunton nga panapton sang malinong kag malulo nga espiritu, nga may daku gid nga bili sa mga mata sang Dios.” (1 Pedro 3:​3, 4; Efeso 4:24) Matuod, sa kalibutan sa karon madamo nga pamatan-on ang haluson nagasapak sa dalayawon nga mga kinaiya sang personalidad​—⁠ilabi na gid sa espirituwal nga mga kinaiya.⁠ * Apang ginaapresyar kag nagaganyat ini sa mga may diosnon nga mga prinsipio!

Kon amo, ang labing maayo nga paagi agod mangin makabilihag sa mahunahunaon-sa-espirituwal nga mga Cristianong lalaki kag babayi amo ang mangin mahunahunaon mismo sa espirituwal. Pauswaga ang imo espirituwalidad paagi sa pangamuyo, personal nga pagtuon sa Biblia, kag pagtambong sa Cristianong mga miting. (Salmo 1:1-3) Walay sapayan, may iban pa nga mapuslanon nga mga ikasarang kag mga kinaiya nga sarang mo mapalambo. Indi kinahanglan nga makig-date ka ukon magnobyonobyo agod mapalambo ining mga kinaiya. Sa baylo, mapakita mo ini sa imo adlaw-adlaw nga pagpakig-angot sa iban.

Halimbawa, ikaw bala di-komportable kag mahuluy-on sa atubangan sang tuhay nga sekso? Ang pamatan-on nga si Paul nagbaton: “Kon kaisa nasaw-ahan ako​—⁠bangod mga babayi sila kag indi ko mahangpan ang mga babayi kasubong sa paghangop ko sa mga lalaki. Kag indi ko luyag nga mahuy-an.” Paano mo mapauswag ang kompiansa kag kakalma nga magaparelaks sa iban? Ang isa ka paagi amo ang paghimulos sa nagkalainlain nga kaupdanan sa Cristianong kongregasyon. Sa mga miting, magpakita sing personal nga interes sa iban​—⁠indi lamang sa mga katapo sang tuhay nga sekso nga kaedad mo kundi subong man sa mga kabataan, mga hamtong, kag mga tigulang. (Filipos 2:4) Ang pagtuon nga mangin hanas sa pagpakig-angot sa sining lainlain nga tawo magabulig sa imo nga mapauswag ang kompiansa sa kaugalingon.

Apang, maghalong ka. Si Jesus nagsiling: “Higugmaa ang imo isigkatawo subong sang imo kaugalingon.” (Mateo 19:19) Kon may kompiansa ka sa imo kaugalingon, indi ka masaw-ahan kag di-komportable sa iban.⁠ * Apang, walay sapayan nga kinahanglan ang diutay nga pagtahod sa kaugalingon, indi magpasobra. “Ginasugiran ko ang kada isa sa inyo dira,” siling ni apostol Pablo, “nga indi maghunahuna sing labaw sa dapat niya hunahunaon sa iya kaugalingon.”​—⁠Roma 12:3.

Usisaa man ang imo mga paggawi kag kalantip sa pagpakig-angot sa iban. Si Lydia, nga taga-Britanya, nagsiling: “May isa ka lalaki sa amon eskwelahan nga medyo popular sa madamo nga babayi. Apang sa tapos nila makilala sia, nagakadula ang ila luyag sa iya bangod di-matinahuron sia kag di-mataktika.” Ang mga tawo nagakaganyat sa isa nga mainayuhon kag mataktika kon maghambal kag mapatugsilingon sa iban. (Efeso 4:​29, 32; 5:​3, 4) “Ang maayo nga pamatasan kaangay sa pasaporte, amo nga hilway kag mahapos palapitan sang mga tawo,” komento ni Dr. T. Berry Brazelton. Ang mga pamatasan “kinahanglanon agod batunon sang iban.”

 Lainlain ang mga kustombre kag mga pagsulundan sang maayo nga pamatasan sa bug-os nga kalibutan. Gani mahimo obserbahan mo kon paano ginapakig-angutan sang hamtong nga Cristianong mga lalaki kag mga babayi ang isa kag isa. Halimbawa, kustombre bala sa inyo pungsod nga buksan sang lalaki ang ganhaan para sa babayi? Nian ang pagtuon nga ipakita ining matinahuron nga paggawi magapauswag sang imo reputasyon subong isa ka tawo nga may maayo nga pamatasan.

Sa katapusan, ayhan nabudlayan ka sa pagpalambo sing balanse nga pagkamasinadyahon. Ang Biblia nagasiling nga may yara “tion sa pagkadlaw,” kag ang isa nga masinadyahon masunson nga madali makig-abyan.​—⁠Manugwali 3:​1, 4.

Pagkamainabyanon Kontra Pagkiat

Ang isa ka nagapangangkon nga “giya sa pagpakigdate sing madinalag-on” nagalaygay nga ang sekreto agod maganyat ang tuhay nga sekso amo ang pagkiat. Ang mga bumalasa ginsilingan nga mag-ensayo sa pagyuhom kag sa pagtulok sa mata-sa-mata kag sa paghimpit sang ‘una nga ihambal.’ Ini nga laygay supak sa ginlaygay ni Pablo kay Timoteo nga pakig-angutan ang tuhay nga sekso nga “may bug-os nga kaputli.”​—⁠1 Timoteo 5:2.

Walay sapayan nga ang pagkiat magapabakod sang bugal sang isa, ini di-sinsero kag di-tampad. Indi kinahanglan nga magkiat ukon magpakunokuno ka nga mahinhin agod mangin makawiwili ang paghambalanay. Indi man kinahanglan nga magpakiana ka sing makahuluya ukon sing di-nagakaigo nga mga pamangkot agod mahibaluan ang ginabatyag kag ginahunahuna sang tuhay nga sekso. Makighambal tuhoy sa mga butang nga ‘matarong, putli, kag mahigugmaon,’ kag magauswag ka nga mangin isa ka hamtong, mahunahunaon-sa-espirituwal nga lalaki ukon babayi. (Filipos 4:8) Ang pagsunod mo sa diosnon nga mga prinsipio magahimo sa imo nga makabilihag indi lamang sa tuhay nga sekso kundi sa Dios mismo.⁠ *​​—⁠Hulubaton 1:7-9.

[Mga nota]

[Mga retrato sa pahina 15]

Sa baylo nga magkonsentrar sa imo hitsura, pauswaga ang espirituwal nga mga kinaiya

[Retrato sa pahina 15]

Tun-i nga mangin komportable upod sa lainlain nga mga tawo