Pamangkot sang mga Pamatan-on . . .

Dapat Bala Ako Magparetoki?

“Antes ako magparetoki sang ilong, pirme ako anay ginasunlog. Indi ko luyag ang isa ka pinasahi nga ilong kundi kon ano lang ang bagay sa akon. Nalipay gid ako sa resulta sang operasyon, kag himuon ko ini liwat kon kinahanglanon.”​—⁠Eleni.⁠ *

“Ngaa dapat ko sundon ang ginakabig sang tanan nga matahom? Sa naretoki nga mga bahin sang lawas, pamatyag ko daw subong ako sa bugos nga kuwarta. Indi matuod.”​—⁠Mathias.

“Ang tagsatagsa dapat mamat-od para sa iya kaugalingon. Mabudlay gid kon iban ang mamat-od.”​—⁠Manuela.

“ANG bisan sin-o nga mas matahom pa sa akon pat-od gid nga nagapangoloreti.” Sa Alemanya, ining makahalam-ot nga hulubaton amo ang ginagamit nga depensa sang mga tawo nga nagakabalaka nga indi himpit ang ila hitsura. Apang, sa pila ka kadutaan karon, sarang mabag-o ang hulubaton: “Ang bisan sin-o nga mas matahom pa sa akon nagparetoki.” Sa pagkamatuod, kinaandan na lang ang magparetoki sing hitsura.

“Nagligad na ang panahon nga ang pagparetoki  sang hitsura para lamang sa manggaranon,” report sang Swiss nga pamantalaan nga Neue Zürcher Zeitung, nga nagadugang: “Duha ka uso ang nagtuhaw: Nagadamo ang mga lalaki nga nagaparetoki sang hitsura sa mga doktor . . . , kag mas bataon na gid ang mga kliyente nga babayi.” Suno sa isa ka surbe sa Alemanya, halos 20 porsiento sang ginsurbe nga nagapangidaron sa ulot sang 14 kag 29 anyos ang nakaagi na paretoki sang hitsura, nagaplano pa lang nga magparetoki, ukon nakahunahuna na sini.⁠ * Ayhan ang pila sang imo mga abyan, mga kabutho, ukon mga himata nagparetoki sang hitsura agod magtahom sila.

Kamusta ka? Nahunahuna mo na bala nga patahumon ang imo hitsura paagi sa isa ka operasyon? Nagabatyag ka bala nga daw palong ang imo mga dulunggan, nga ang imo titi tuman ka daku ukon tuman ka gamay, nga ang imo tiyan may buy-on ukon daku katama ang imo mga hita, ukon nga ang imo ilong dapa? Kon amo, indi lang ikaw ang nagabatyag sina. Ang isa ka grupo sang hayskul nga mga dalagita nagsulat sing isa ka artikulo sa Aleman nga pamantalaan nga nagasiling: “Halos tanan nga katubotubo namon di-kontento sa ila lawas.” Normal ang handum nga mangin makabibihag kag maluyagan. Apang ang pagparetoki bala ang solusyon?

Solusyon Bala Ini sa Imo mga Problema?

Binagbinaga ang imo kilala nga mga pamatan-on. Makibot ka bala kon mahibaluan mo nga madamo sa ila​—⁠ayhan bisan yadtong imo natahuman⁠—​ang indi malipayon sa ila hitsura? Apang mahimo gid nga amo sini ang nagakatabo. Ang pamangkot amo, Sa banta mo dapat bala sila tanan magparetoki? Ukon sa banta mo mas maayo bala kon tun-an nila nga mangin kontento sila sa kon ano ang matahom sa ila? Maaplikar man bala ini nga prinsipio sa imo bahin?

Subong sang ginapakita sang komento ni Eleni, ang pagparetoki sang hitsura sa pila ka kahimtangan makadula sang pagyaoyao kag pagtublag. Sa pihak nga bahin, ang pagparetoki sa hitsura indi solusyon. Indi gid ini tal-us sa isa ka mapagros nga estilo sang pagkabuhi, nga daku gid ang mabulig agod mag-uswag ang panagway sang isa. Kag bisan pa mabag-o sang isa ka manugbusbos ang imo hitsura, indi niya mabag-o ang imo personalidad, ukon madula niya ang imo mga kabalaka ukon madugangan ang imo pagtahod sa kaugalingon.

Dumduma man nga ang pila ka klinika ukon mga doktor nagasiling sing pila ka butang nga indi nila matuman. Daw ginapangakuan ka nila sing kalipay. Apang ang matuod, mas interesado sila sa imo kuwarta sangsa imo kalipay. Sing makapasubo, may pila ka mahingaliton nga mga manugbusbos nga nagaopera bisan indi kinahanglanon, diutay lang ang tsansa nga magmadinalag-on, ukon makatalagam​—⁠basta may bayad.

May madugay man nga mga epekto nga dapat binagbinagon. Halimbawa, ang tuman kalaw-ay sa imo sang 16 anyos ka mahimo nga indi na malaw-ay kon 21 ka na. Si Dr. Urs Bösch, nga isa ka aesthetic surgeon, nagsiling: “Sa kabug-usan, ang pagparetoki sang hitsura indi dapat himuon sa mga pamatan-on. Ang bayhon sang lawas sang isa ka tin-edyer kag ang pagtamod niya sa iya lawas nagabag-o sa sini nga pangidaron.” Dugang pa, mahimo kinahanglan sang mga pamatan-on ang dugang pa nga mga operasyon agod matadlong ang mga problema. Samtang nagatubo ang imo lawas, magadaku man ang mga pinalian sa operasyon.

Bulubantaa ang Kabilihanan

Ginalaygayan kita sang Biblia nga bulubantaon ang kabilihanan antes naton sugdan ang isa ka importante nga proyekto. (Lucas 14:28) Para sa kalabanan nga pamatan-on, ang pagparetoki sang hitsura indi posible bangod mahal ini. Kag ini nga presyo mahimo nga wala nagalakip sang pagpakonsulta liwat​—⁠ukon sang pagpatahom pa gid nga mahimo kinahanglanon.

Madamo nga tawo ang nagbayad indi lamang sing kuwarta kundi sang ila man panglawas bangod sang malain nga resulta. Suno sa American Society for Aesthetic Plastic Surgery, ang mga katalagman sa panglawas nagalakip sang temporaryo nga pagpalamanog, indi mapanas nga pinalian, pagkadula sang igbalatyag kag mga ikasarang sa pagpatiti, kag bisan sang sobra nga pagdugo.  Halimbawa, diutayan lang mapatay si Anna sang magpa-liposuction sia (nagpakuha sing tambok paagi sa pagbusbos). Sia nagreklamo: “May malaw-ay na ako karon nga mga pinalian kag yupok sa akon tiyan.” Tuhoy sa mga operasyon sa pagpakuha sing tambok, ang isa ka Aleman nga pamantalaan nagsiling: “Ang mga report tuhoy sa serioso nga mga komplikasyon, bisan sang kamatayon, nagadamo.” Indi pagkalimti: “Ang pagparetoki isa gihapon ka operasyon, kag bangod sini, delikado ini,” siling sang pamantalaan tuhoy sa ikaayong lawas nga Apotheken Umschau. Busa, binagbinaga sing maayo ang mga katalagman antes ka magpaopera​—⁠ilabi na yadtong wala sing kaangtanan sa pagpabulong.

Sarang mo man mapamangkot ang imo kaugalingon: ‘Ano nga mensahe ang akon mahatag sa mga tawo tuhoy sa akon kaugalingon? Ang mensahe bala nga ang akon panagway amo ang importante gid sa akon? Ano ang epekto sang akon desisyon sa akon mga katubotubo ukon mga manghod?’⁠ *

Ang Imo mga Motibo

Ang imo mga motibo takus man nga binagbinagon sing maayo. Kag mahimo indi mahapos nga mahangpan ang imo mga motibo. Halimbawa, mapamangkot mo ang imo kaugalingon: ‘Luyag ko bala nga mag-untat na ang pirme nga pagsunlog sa makahuluya nga bahin sang akon lawas? Ukon luyag ko lang bala magpadayaw? Ang akon bala handum nga bag-uhon ang akon panagway naimpluwensiahan sang pag-ipit sang katubotubo, sang makabuluyok nga mga pasayod, ukon sang bantog nga mga artista? Ginatinguhaan ko bala nga sundon ang sobra katahom nga talaksan nga ginapasanyog gid sang media karon?’

Ang pila nagahunahuna nga magadaku ang ila tsansa nga makakita sing tiayon ukon sing maayo nga trabaho kon magparetoki sila. Apang, matahom gid bala ang tanan nga nakilala mo nga minyo na? Kamusta naman ang mga tawo nga may trabaho? Maathag gid nga wala lamang ini nasandig sa panagway. Luwas pa, ang isa ka posible nga tiayon ukon isa ka amo nga mas nagapadaku sang imo panagway sangsa imo mga kinaiya takus gid bala sa gastos kag sa risgo sang pagpaopera?

Samtang ginaanalisar mo sing maayo ang imo mga motibo, ipakighambal ang imo ginabatyag sa imo mga ginikanan ukon sa isa ka hamtong nga abyan. Kon ginabatyag mo nga problema gid ang isa ka bahin sang imo lawas, pangayua ang ila bunayag nga opinyon. Indi lamang magsalig sa salaming. Tuhoy sa aton paglantaw sa aton mga diperensia sa lawas, si Nana nagsiling: “Mas nabalaka ka sa imo pisikal nga mga diperensia sangsa iban bangod ginatan-aw mo ang imo kaugalingon sa tuhay nga pagtamod.” Ang mga manugpanalawsaw sa Landau University, sa Alemanya, nagpaathag nga sa madamo nga kaso ang pagparetoki sang hitsura ginahunahuna, “indi bangod ang isa ka bahin sang lawas may diperensia gid, kundi bangod daw may diperensia ini sa tawo nga natungdan.”

Indi magpadasudaso sa pagdesisyon, kundi binagbinaga sing maayo ang tanan nga butang. Tamda ang tagsa ka operasyon nga indi na mabag-o. Sa bisan ano man nga operasyon, dapat mo antuson ang mga resulta sini sa sulod sang pila ka tion.

Ang Imo Labing Importante nga Katahom

Ang kalipay wala nagahalin sa imo panagway. Samtang mahimo makadugang ukon makabuhin ang maayong panagway sa pagsalig sa kaugalingon, ang importante amo ang imo personalidad kag panimuot. Pagkatapos nga diutayan lang mapatay, si Anna naghinakop: “Ang katahom, subong sang natun-an ko, wala sing labot sa imo naguwa nga panagway.”

Bisan nagadayaw sang pisikal nga katahom, ginapakita sang Biblia nga ikaduha lamang ini kon ipaanggid sa espirituwal nga katahom: “Ang kaalikaya mahimo nga malimbungon, kag ang katahom mahimo nga wala sing pulos; apang ang babayi nga nagakahadlok kay Jehova amo ang isa nga nagaagom sing kadayawan para sa iya kaugalingon.” (Hulubaton 31:30; 1 Samuel 16:7) Ini nga pagtamod magabulig sa imo nga makatigayon sing nasulod nga paghidait, bisan pa nga wala mo maluyagan ang pila ka bahin sang imo lawas.

Bisan ano man ang imo pamat-od, dumduma nga ang himpit nga panagway kag himpit nga kalipay indi gid matigayon sa karon. Ang tanan di-himpit sa pila ka bahin. (Roma 3:23) Indi mo ini ma⁠bag-o. Ang imo sarang mabag-o amo ang imo pagkatawo​—⁠ang ginatawag sang Biblia nga “ang tinago nga pagkatawo sang tagipusuon.” (1 Pedro 3:​3, 4) Mag-uswag ka paagi sa pagtukod sing mga kinaiya nga matahom sa panulok sang Dios. Wala ini sing katalagman kag gasto, kag ang mga padya indi maisip!

[Mga nota]

[Blurb sa pahina 21]

Ang imo “nalaw-ayan” nga bahin malaw-ay gid bala, ukon kinahanglan nga bag-uhon mo ang imo pagtamod sa imo kaugalingon?