BANGOD nagasalig sing bug-os sa mga pulong ni Jesucristo nga ginbalikwat sa ibabaw, madamong Cristiano ang nagapangamuyo sa Dios tuhoy sa ila mga problema kag mga ginakabalak-an, nga nakapat-od nga ginahigugma kag ginaulikdan niya sila. Apang, ang iban nalugaw-an samtang ginahulat nila nga sabton ang ila mga pangamuyo. Nagabatyag ka bala nga wala sing mahimo ang imo mga pangamuyo? Nagapamati bala ang Dios kon mangamuyo ka?

Bisan pa kon daw wala masabat ang aton mga pangamuyo, wala ini nagakahulugan nga wala ini ginpamatian sang Dios. Ang Biblia nagapasalig sa aton: “Ang mga mata ni Jehova nagatamod sa mga matarong, kag ang iya mga dulunggan bukas sa ila pangamuyo.” (1 Pedro 3:12) Gani ginapamatian ni Jehova nga Dios ang mga pangamuyo sang mga matarong, ginamitlang man ini ukon ginahutik lang sa tagipusuon. (Jeremias 17:10) Ginausisa man ni Jehova ang mga hunahuna kag balatyagon sa tagsa ka pangamuyo, nga indi gani mahangpan sing bug-os ukon nahibaluan sang isa nga nagapangamuyo.​—⁠Roma 8:​26, 27.

Apang, agod pamatian sang Dios ang mga pangamuyo, dapat malab-ot sini ang pila ka kinahanglanon. Una, dapat nga ginapatuhoy lamang ini sa Dios​—⁠indi kay Jesus, sa isa ka “santos,” ukon sa isa ka idolo. (Exodo 20:​4, 5) Dapat man nga mangamuyo sa ngalan sang Anak sang Dios, si Jesucristo. (Juan 14:⁠6) Nagakahulugan bala ini nga pamatian anay ni Jesus ang aton mga pangamuyo kag ipaalinton niya ang mensahe  sa Dios? Indi. Sa baylo, paagi sa pagpangamuyo kay Jehova sa ngalan ni Jesus, nagapakilala kita nga mga disipulo ni Cristo kag ginakilala naton nga makapalapit kita sa Dios bangod lamang sa iya gawad.​—⁠Hebreo 4:14-16.

Dapat mangamuyo upod ang pagtuo. Si apostol Pablo nagpatalupangod: “Kon wala sing pagtuo imposible nga mapahamut-an [ang Dios] sing maayo, kay sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.” (Hebreo 11:⁠6) Paano mahibaluan sang isa kon may amo sia sini nga sahi sang pagtuo? Ang manunulat sang Biblia nga si Santiago nagasabat: “Ipakita ko sa imo ang akon pagtuo paagi sa akon mga binuhatan.” (Santiago 2:18) Huo, ang pagtuo nagapatubas sing mga buhat, kag ginapakita naman sini nga mga buhat nga ginahigugma naton ang Dios kag ginatinguhaan naton nga mapahamut-an sia.

Dapat man mangin mapinadayunon sa pagpangamuyo ang mga sumilimba sang Dios. Gin-athag ini ni Jesus sa Lucas 11:​9, 10, nga ginbalikwat sa umpisa. Kay man, kon kis-a lang magpangamuyo ang isa tuhoy sa isa ka butang, wala bala sini ginapakita nga indi sia serioso sa iya ginapangabay?

Bisan ano man kasunson kag kahanuot kita nga nagapangamuyo, nagakabuhi kita gihapon sa “makahalanguyos nga mga tion nga mabudlay pakigbagayan.” (2 Timoteo 3:⁠1) Bisan pa ginsiling ni Jesus nga mangin malipayon ang iya mga sumulunod, wala sia magsiling nga wala na sila sing problema sa kabuhi. (Mateo 5:3-11) Apang, ginsiling niya nga mahimo mangin malipayon ang iya mga disipulo walay sapayan sang paglalaw, gutom, kauhaw, ukon paghingabot.

Ang ginsiling ni Jesus nga kalipay wala nagadepende sa pagtigayon naton sing maayo gid nga mga kahimtangan. Sa baylo, isa ini ka nasulod nga pagkakontento bangod nagaalagad kita sa Dios. Gani, matigayon naton ang kalipay bisan sa tion sang kagamo.​—⁠2 Corinto 12:7-10.

Kon amo, wala bala sing pulos ang pagpangamuyo sa Dios tuhoy sa personal nga mga butang subong sang pagpangita sing nagakabagay nga bana ukon asawa, ukon pag-atubang sa mga problema sa pamilya, panglawas, ukon trabaho? Indi, bangod bisan pa wala nagasaad ang Dios nga bag-uhon sing milagruso ang mga kahimtangan naton sa kabuhi, hatagan niya kita sing kaalam nga malandas ini. Si Santiago nagsulat tuhoy sa mga pagtilaw: “Kon ang bisan sin-o sa inyo nakulangan sing kaalam, padayon sia nga papangayua sa Dios, kay maalwan sia nga nagahatag sa tanan kag wala nagabasol; kag ihatag ini sa iya.” (Santiago 1:⁠5) Gani tuytuyan kita ni Jehova paagi sa iya balaan nga espiritu. Buligan kita sini nga mahangpan kag maaplikar ang mga prinsipio sa Biblia sa paghimo sing mga desisyon.

Siempre pa, indi ang espiritu sang Dios ang nagadesisyon para sa aton. Sa kabaliskaran, kinahanglan ang pagpanikasog sang isa. Halimbawa, kon may problema kita, nagpanalawsaw bala kita tuhoy sa sini kag gin-usisa ang nanuhaytuhay nga mga bahin sang sitwasyon? Buhat ini nga nagapakita sa Dios nga may pagtuo kita. (Santiago 2:18) Mapinadayunon bala kita sa pagpanikasog nga malubad ang aton problema, padayon nga nagapangayo sang panuytoy sang Dios? (Mateo 7:​7, 8) Gin-usisa bala naton sing maayo ang mga prinsipio sang Biblia nga naaplikar sa amo nga sitwasyon? Ang Pulong sang Dios magahimo sa aton nga “may lubos nga ikasarang, nga nasangkapan sing bug-os para sa tagsa ka maayong buhat.”​—⁠2 Timoteo 3:​16, 17.

Bisan pa matuod nga makapasilabot ang Dios sa kahimtangan sang tawo kag mahimo niya dulaon ang tanan naton nga problema, gintugutan niya kita nga ipabutyag ang aton hilway nga pagbuot. Sing makapasubo, gingamit sang madamo ang ila hilway nga pagbuot sa kahalitan sang iban. Gani, ang iban nga mga problema nga ginapangamuyo naton mahimo magpadayon tubtob mag-abot ang bag-ong kalibutan sang Dios. (Binuhatan 17:​30, 31) Mahimo nga isa ini ka kahimtangan sa aton ginapuy-an, subong sang krimen ukon inaway; ukon mahimo magdalahig ini sa pagbatas naton sang kabudlayan bangod sang mga nagapamatok. (1 Pedro 4:⁠4) Dapat naton batunon nga sa sining di-diosnon nga kalibutan, indi magaayo ang iban nga mga kahimtangan.

Apang, ginahigugma sang Dios ang mga nagasimba sa iya kag luyag niya sila buligan. Kon maggahom na ang iya Ginharian sa bug-os nga duta, dulaon niya sing bug-os ang makasiligni nga mga problema sa sini nga kalibutan. (Bugna 21:​3, 4) Samtang wala pa ina nga tion, dapat naton pangayuon sing mapinadayunon ang iya panuytoy sa pag-atubang sa mga problema sa kabuhi. Kon himuon naton ini, mapat-od naton nga tumanon ni Jehova ang iya saad nga nasulat sa Biblia sa Isaias 41:10: “Dili ka mahadlok, kay ako nagaupod sa imo. Dili ka manghulonghulong, kay ako ang imo Dios. Palig-unon ko ikaw. Buligan ko gid ikaw. Alay-ayon ko gid ikaw sang akon tuo nga kamot sang pagkamatarong.”