Ang Pagtamod sang Biblia

Ginapalampas Bala sang Dios ang Aton mga Kaluyahon?

‘Indi ako malaut! Gintinguhaan ko gid nga isikway ang akon malaut nga mga dalanon, apang maluya gid ako!’

AMO man bala sini ang ginabatyag mo ukon sang isa nga kilala mo? Madamo ang nagahinakop nga imposible nga daugon ang nakapanggamot na gid nga mga kaluyahon sa moral. Ang pila ka tawo nagiyan na sa alkohol, tabako, ukon mga droga. Ang kakagod amo ang nagadominar sa kabuhi sang iban. Kag may mga nagpadala man sa sayop nga paggawi sa sekso, nagapangatarungan nga nagiyan na gid sila sa sekso.

Subong sang ginpakita sa Mateo 26:​41, ginpabutyag sing mahinuklugon ni Jesus ang iya paghangop sa tawhanon nga mga kaluyahon.⁠ * Sa katunayan, ginpakita sing maathag sang bug-os nga rekord sa Biblia nga si Jehova nga Dios kag si Jesus maluluy-on gid sa mga tawo. (Salmo 103:​8, 9) Apang mapaabot bala naton nga pasapayanan na lang sang Dios ang aton tanan nga depekto?

Si Moises kag si David

Binagbinaga ang natabo kay Moises. Nakilala sia nga “labing mahagop sa tanan nga tawo nga yara sa kadaygan sang duta,” kag nagtinguha sia nga padayunon ining maayo nga kinaiya. (Numeros 12:3) Samtang nagapanglakaton ang mga Israelinhon sa kahanayakan, pirme sila nagapanghikot sing di-makatarunganon kag wala nagatahod sa Dios kag sa iya mga tiglawas. Walay sapayan sini, mapainubuson nga nagapangayo si Moises sang panuytoy sang Dios.​—⁠Numeros 16:​12-​14, 28-​30.

Apang, samtang nagahingapos ang malawig kag makakalapoy nga paglakbay, naakig sia sa atubangan sang bug-os nga pungsod kag wala nagtuman sa mga instruksion sang Dios. Ginpatawad sia sang Dios, apang ginpalampas lang bala Niya ang hitabo? Wala. Ginsilingan niya si Moises: “Bangod wala ka magpakita sing pagtuo sa akon . . . , indi mo madala ining kadam-an sa duta nga ihatag ko sa ila.” Indi makasulod si Moises sa Ginsaad nga Duta. Pagkatapos sang 40 ka tuig nga pagpanikasog para sa sining pinasahi nga pribilehiyo, ang isa ka serioso nga kaluyahon amo ang nangin kabangdanan nga wala niya mabaton ini.​​—⁠Numeros 20:​7-​12.

 Si Hari David isa man ka diosnon nga tawo nga may kaluyahon. Sang isa ka okasyon, nagpadala sia sa kailigbon kag naghulid sa asawa sang iban. Gintinguhaan niya dayon nga tabunan ang iya sala paagi sa pagpapatay sa bana sang babayi. (2 Samuel 11:​2-​27) Pagkatapos, ginhinulsulan gid niya ang iya mga krimen, kag ginpatawad sia sang Dios. Apang ginguba ni David ang isa ka pamilya, kag wala sia gin-amligan ni Jehova gikan sa makahalalit nga mga kalamidad nga nagsunod. Nagbalatian sing malubha ang bata nga lalaki ni David, kag wala magpasilabot si Jehova, bisan pa nagpangamuyo si David para sa iya bata. Napatay ang bata, kag nagsunodsunod dayon ang mga trahedya sa panimalay ni David. (2 Samuel 12:13-​18; 18:33) Daku gid ang ginbayad ni David bangod sang pagpadaug niya sa kaluyahon sa moral.

Ining mga halimbawa nagapakita nga may salabton ang mga tawo sa Dios sa ila pagginawi. Ang mga luyag mag-alagad sa iya dapat magpabakod sang maluya nga mga bahin sang ila espirituwalidad kag mangin mas maayo nga mga Cristiano. Sang unang siglo, madamo ang naghimo sini.

Ang Pagpakig-away nga Mahilway sa Pagpakasala

Si apostol Pablo masiling gid nga isa ka modelo sa Cristianong pagkabuhi. Apang nahibaluan mo bala nga pirme sia nagpakig-away batok sa iya mga kaluyahon? Ginalaragway sing maathag sang Roma 7:​18-​25 ini nga pagsumpakilay, ukon, suno sa bersikulo 23, ining ‘pag-ilinaway.’ Padayon ang pagpakig-away ni Pablo, kay nahibaluan niya nga wala nagauntat ang sala.​—⁠1 Corinto 9:​26, 27.

Ang pila ka katapo sang Cristianong kongregasyon sang dumaan nga Corinto mga makasasala gid anay. Ang Biblia nagasiling nga sila anay ‘mga makihilawason, mga makihilahion, mga lalaki nga nagahulid sa mga lalaki, mga makawat, mga tawo nga sakon, mga palahubog.’ Apang nagasiling man ini nga ‘natinluan na’ sila. (1 Corinto 6:​9-​11) Paano? Ginpalig-on sila sang sibu nga ihibalo, sang Cristianong pagpakig-upod, kag sang espiritu sang Dios nga untaton ang ila malaut nga mga buhat. Sang ulihi, ginpahayag sila nga matarong sang Dios sa ngalan ni Cristo. Huo, ginpatawad sila sang Dios, sa amo ginhatagan sila sang isa ka matinlo nga konsiensia.​—⁠Binuhatan 2:​38; 3:⁠19.

Wala ginpakadiutay ni Pablo kag sang mga Cristiano sa Corinto ang ila makasasala nga mga huyog. Sa baylo, ginpakigbatuan nila ini, kag paagi sa bulig sang Dios nagmadinalag-on sila. Yadtong unang siglo nga mga sumilimba nangin matinlo sa moral, walay sapayan sang ila mga palibot kag di-himpit nga mga huyog. Kamusta naman kita?

Ginapaabot sang Dios nga Pakigbatuan Naton ang Aton mga Kaluyahon

Ang pagpakig-away sa isa ka kaluyahon wala nagakahulugan nga madula ini sing bug-os. Bisan pa wala kita nagapangampo sa aton pagkadihimpit, indi naton ini madula. Nagapatubas ini sing mga kaluyahon nga mahimo tuman kabaskog. Apang, indi kita dapat magpadaug sa aton mga kaluyahon. (Salmo 119:11) Ngaa importante gid ini?

Bangod wala ginatugutan sang Dios nga ang kaluyahon amo ang pirme nga balibad sa malaut nga paggawi. (Judas 4) Luyag ni Jehova nga mangin matinlo ang mga tawo, nga mangin maayo ang ila pagkabuhi sa moral. Ang Biblia nagasiling: “Kangil-ari ang malaut.” (Roma 12:9) Ngaa amo sini kalig-on ang panindugan sang Dios?

Ang isa ka rason amo nga ang pagpadaug sa kaluyahon makahalalit. “Bisan ano ang ginasab-ug sang tawo, ini man ang iya anihon,” siling sang Biblia sa Galacia 6:7. Ang mga nagapadala sa mga pagkagiyan, kakagod, kag pagkasalamwanan masami nagaani sing tuman kadaku nga kahalitan sa ila kabuhi. Apang may mas importante pa nga rason.

Ang sala nagapaakig sa Dios. Nagaresulta ini sing “pagbulagay” sa ulot naton kag ni Jehova. (Isaias 59:2) Bangod yadtong nagahimo sing sala indi makatigayon sang iya kahamuot, ginapalig-on niya sila: “Panghugas kamo; paninlo kamo; . . . mag-untat sa paghimo sing malain.”​—⁠Isaias 1:16.

Mahigugmaon kag maluluy-on ang aton Manunuga. “Indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) Ang padayon nga pagpadala sa kaluyahon nagapugong sa aton nga matigayon ang kahamuot sang Dios. Bangod wala ginapasapayanan sang Dios ang aton mga kaluyahon, indi man naton ini dapat pagpasapayanan.

[Nota]