Tumalagsahon nga pagkit-anay liwat Pagligad sang 30 ka Tuig

SANG 1967 duha ka pamatan-on nga lalaki ang natabuan nga nag-updanay. Gin-asayn sila nga mag-upod sa kuwarto sa Michigan Technical University sa Estados Unidos. Si Dennis Sheets, nga taga-Lima, Ohio, 18 anyos sadto nga nagatuon sing forestry sa nahauna niya nga tuig. Ang 20-anyos nga si Mark Ruge naghalin sa Buffalo, New York. Nagatuon sia sing civil engineering kag ikatlo na niya nga tuig.

Ang ila pag-abyanay sadto wala magdugay. Wala nila nga duha matapos ang pagtuon sa unibersidad; nagsipakay ang ila mga banas. Nagligad ang kapin sa tatlo ka dekada. Nian, isa ka adlaw sa Dominican Republic, nagkit-anay liwat ining duha ka lalaki. Natabuan lamang ining makapakibot nga pagkit-anay nila liwat. Apang lain naman ang kabangdanan. Ano ini? Agod masabat ini, usisaon naton ang pagkabuhi sang kada isa.

Si Dennis Nagpakigbahin sa Inaway

Nagpauli si Dennis pagkatapos sang iya una nga tuig sa kolehiyo. Nian, sang Disiembre 1967, nagsoldado sia sa Armada sang Estados Unidos, kag sang Hunyo 1968, ginpadala sia sa Vietnam. Nasaksihan niya didto ang kakugmat sang inaway. Sang natapos ang iya serbisyo sang 1969, nagbalik sia sa Estados Unidos, kag sang ulihi nagtrabaho sa isa ka daku nga kompanya sa Ohio. Apang, indi sia kontento.

“Handum ko sang bata pa ako nga magsaylo sa Alaska kag magpanguma (homestead),” paathag ni Dennis. Gani sang 1971, gintuman niya ini nga handum upod sa iya abyan sang sa hayskul sia. Apang sa baylo nga magpanguma, nag-obra sia sa pila ka manubo sing sweldo nga mga trabaho. Sa pila ka tion nagpuyo sia sa tolda kag nangin manugbantay sing sunog sa kagulangan. Nagpatubo sia sing burangos kag nagpalaba sing buhok kag nagpanigarilyo sing marijuana.

Sang 1972, naghalin si Dennis sa Anchorage agod magtan-aw sing Mardi Gras sa New Orleans, Louisiana. Pagkatapos sadto, nagpatindog sia sing payag sa kakahuyan sa Arkansas. Nag-obra sia didto sing pagbalay sa mga balay kag pagbasyada sa mga konkreta. Sang Hunyo 1973, naglibot si Dennis sa pungsod nga nagaangkas lamang sa mga salakyan agod tan-awon kon makakita sia sing katuyuan sa kabuhi.

Si Mark sa Kahublagan Kontra sa Inaway

Si Mark nagpabilin pa sa unibersidad sa sulod sang pila ka semestre pagkatapos nga naghalin si Dennis apang namat-od nga indi niya luyag nga mangin bahin sang sistema nga nagasakdag sa inaway. Gani nagpauli sia sa Buffalo, diin nangin kabo sia sa pila ka tion sa isa ka planta sang asero. Bangod wala niya maluyagan ang mga panikasog sa inaway, nag-untat sia sa pagtrabaho, nagbakal sing motorsiklo, kag naglakbay pakadto sa San Francisco, California. Bisan wala pa nila mahibaluan sadto, sanday Dennis kag Mark pareho nga didto sa San Francisco sa sulod sang pila ka tion.

Kaangay ni Dennis, nagpatubo man sing burangos si Mark kag nagpalaba sing buhok kag naggamit sing marijuana. Apang nadalahig gid si Mark sa kahublagan kontra sa inaway, nga nagapakigbahin sa mga protesta kag mga rally. Ginpangita sia sang FBI bangod nangindi sia nga magsoldado, gani sa sulod sang pila ka tuig naggamit sia sing mga hayo agod indi sia madakpan. Nagkabuhi sia subong isa ka hippie sa San Francisco. Sang  1970, ginduaw sia didto sang duha ka Saksi ni Jehova.

Si Mark nagpaathag: “Ayhan nabatyagan nila nga interesado ako, gani nagbalik sila. Wala ako sa balay, apang nagbilin sila sing isa ka berde nga Biblia kag tatlo ka libro.” Apang, masako kaayo si Mark sa pagkaaktibista sa politika kag nawili sa sini amo nga wala niya mabasa ang mga publikasyon. Subong man, ginapangita gid sia sang FBI. Gani naggamit sing lain naman nga hayo, nagsaylo sia sa Washington, D.C. Nag-upod sa iya didto ang iya nobya nga si Kathi Yaniskivis, nga nakilala niya sa unibersidad.

Sang ulihi, sang 1971, nadakpan sang FBI si Mark. Gin-updan sia sang duha ka ahente sang FBI sa pagsakay sa eroplano halin sa Washington, D.C., pakadto sa New York kag ginpat-od nga magpadayon sia tubtob sa Toronto Canada. Maathag nga wala sia ginkabig sang FBI nga makatalagam sa publiko nga kahim-ong; luyag lang nila nga maghalin sia sa pungsod. Pagkadason nga tuig nagpakasal sila ni Kathi, kag nagsaylo sila sa Gabriola Island, British Columbia, sa Canada. Luyag nila magpalayo sa katilingban, apang nabatyagan nila nga indi lamang subong sini ang kabuhi.

Nangin mga Saksi Sila

Madumduman mo nga si Dennis naglibot sa pungsod nga nagapangita sing katuyuan sa kabuhi. Nakalab-ot sia sa Montana, diin nakatrabaho sia sa guwa sang Chinook nga nagabulig sa isa ka mangunguma sa tion sang tig-alani. Ang asawa sang mangunguma kag ang iya anak nga babayi mga Saksi ni Jehova. Ginhatagan si Dennis sing Magmata! nga magasin agod basahon. Wala madugayi, nakumbinsi sia nga ang mga Saksi amo ang matuod nga relihion.

Dala ang Biblia, naghalin si Dennis sa uma kag nagkadto sa Kalispell, Montana. Nagtambong sia didto sang iya una nga miting sang mga Saksi ni Jehova. Nangabay sia sing isa ka pagtuon sa Biblia sa amo nga miting. Wala magdugay pagkatapos sadto, ginpaguntingan niya ang iya buhok kag nagpamarbas. Sang Enero 1974 nagguwa sia sa pagbantala sa nahauna nga tion, kag nagpabawtismo sia sa may tubig nga pasungan sa Polson, Montana, sang Marso 3, 1974.

Samtang sanday Mark kag Kathi, nga nagapuyo sa Gabriola Island, namat-od nga bangod may panahon sila, tilawan nila nga usisaon ang Biblia. Ginsugdan nila nga basahon ang King James Version apang nasapwan nila nga ang sinadto nga Ingles medyo mabudlay hangpon. Nian nadumduman ni Mark nga yara gihapon sa iya ang Biblia kag ang mga libro nga ginhatag sa iya sang mga Saksi sang nagligad nga mga tuig. Ginbasa nila ang Biblia pati na ang mga libro nga Ang Kamatuoran nga Nagadul-ong sa Kabuhi nga Dayon kag Is the Bible Really the Word of God? Nagdayaw gid sanday Mark kag Kathi sa ila natun-an.

Si Mark nagpaathag: “Nagdayaw gid ako sa katunayan nga ang Kamatuoran nga libro nagasambit tuhoy sa isa ka grupo sang mga Cristiano nga indi magpakigbahin sa inaway sa bisan ano nga mga kahimtangan. Nabatyagan ko nga sila ang nagahimo sing matuod nga Cristianismo.” Wala magdugay pagkatapos sadto, sanday Mark kag Kathi nagbalik sa Houghton, Michigan, agod duawon ang pamilya ni Kathi​—⁠walay sapayan sang risgo nga dakpon sila. Daw mga hippie gihapon ang dagway, nagtambong sila didto sa miting sang mga Saksi. Ginbaton nila ang pagtuon sa Biblia sang bulan nga didto sila sa Michigan.

Sang nagpauli na sila sa Gabriola Island, nakasugata sila sing isa ka Saksi sa kalye sa Nanaimo, British Columbia, kag ginpaathag nga luyag nila magtuon sa Biblia. Sadto man nga adlaw nag-abot ang puno sing mga Saksi nga awto nga nagsakay pa sa ferry agod kontakon sila, kag nasugdan ang pagtuon sa Biblia. Pagligad sang tatlo ka bulan, nagsugod sanday Mark kag Kathi sa pagbantala. Tatlo ka bulan pagkatapos sadto, sang Marso 10, 1974, nabawtismuhan sila nga duha. Isa ka semana ini sa tapos nga nabawtismuhan si Dennis!

Si Dennis sa Bug-os Tion nga Ministeryo

Si Dennis nangin isa ka payunir, ukon bug-os tion nga ministro, sang Septiembre 1974. Sia nagsiling: “Malipayon ako sa pagpayunir, apang luyag ko pasangkaron ang akon ministeryo; gani sang Hulyo 1975, nag-aplay ako agod mag-alagad sa bug-os kalibutan nga ulong talatapan sang mga Saksi ni Jehova sa Brooklyn, New York. Pagka-Disiembre sadto gin-agda ako didto.”

Ang una nga asaynment nga ginhatag kay Dennis amo ang pagbulig sa paghimo sa anay Towers Hotel nga mangin puluy-an sang talapuanan sang ulong talatapan. Nagtrabaho sia sa sulod sang pila ka tuig didto, nga nagadumala sa mga nagaobra sa tiles. Nian, bangod sang handum nga magpangasawa, nagsaylo sia sa California. Sang 1984, samtang nagaalagad subong isa ka gulang sa kongregasyon  sa Cathedral City, ginpangasawa niya ang isa ka payunir nga si Kathy Enz.

Determinado sanday Dennis kag Kathy nga huptan nga simple ang ila pagkabuhi agod mapauswag ang mga intereses sang Ginharian sang Dios. Gani masunson nga ginapangindian ni Dennis ang mga kahigayunan nga makaganar sing madamo nga kuwarta sa nagauswag nga konstruksion nga industriya sa nabagatnan nga California. Sang 1988, nag-aplay sila ni Kathy nga magbulig sa internasyonal nga konstruksion nga hilikuton sang mga Saksi ni Jehova. Sang Disiembre sadto nga tuig, nakabaton sila sing asaynment nga magtrabaho sa konstruksion sang sanga nga proyekto sa Buenos Aires, Argentina.

Sang 1989, sanday Dennis kag Kathy gin-agda nga mag-alagad sa konstruksion nga hilikuton sang mga Saksi ni Jehova sing permanente. Sa sining pinasahi nga porma sang bug-os tion nga ministeryo, nakaalagad sila sing duha ka beses sa Suriname kag Colombia. Nakatrabaho man sila sa konstruksion sang sanga sa Ecuador kag Mexico, kag sa amo man nga proyekto sa Dominican Republic.

Si Mark sa Bug-os Tion nga Ministeryo

Sang 1976, si Mark, upod sa linibo ka iban pa nga pamatan-on nga Amerikano nga lalaki nga nagpalagyo sa Canada agod makalikaw sa pagsoldado, ginhatagan sing amnestiya sang gobierno sang Estados Unidos. Sila sang iya asawa nga si Kathi, naghandum man nga pasimplehon ang ila kabuhi agod makahinguyang sing kapin nga tion sa ila ministeryo. Gani nagtrabaho si Mark sing part-time subong surbeyor, kag amat-amat nga nabayaran nila ni Kathi ang ila mga balayran nga nasupot antes sang ila bawtismo.

Sang 1978, sang ang mga Saksi sa Canada nagplano sa pagpatindog sing bag-o nga sanga malapit sa Toronto, Ontario, mahimo gid makaserbisyo sanday Mark kag Kathi. Bangod eksperiensiado si Mark sa pagsurbey, gin-agda sila nga magbulig sa konstruksion. Nagtrabaho sila sa proyekto sa Georgetown tubtob natapos ini sang Hunyo 1981. Pagkatapos sadto, nagbalik sila sa British Columbia kag nagbulig sa pagpatindog sing isa ka Assembly Hall sang mga Saksi ni Jehova didto sa sulod sang apat ka tuig. Sang natapos ini, gin-agda sila liwat nga magtrabaho sa pagpasangkad sang sanga sa Canada.

Sang 1986, pagligad sang pila ka bulan sa Georgetown, gin-agda sanday Mark kag Kathi nga magpabilin subong regular nga mga katapo sang talapuanan sang sanga sa Canada. Kutob sadto nag-alagad sila sa talapuanan kag may madamo man sila nga kahigayunan sa pagpakigbahin sa konstruksion nga hilikuton sa madamo iban pa nga pungsod. Bangod sang eksperiensia ni Mark sa pagsurbey, gingamit sia sa pagsurbey para sa mga bilding sang mga sanga kag sang mga Assembly Hall sang mga Saksi ni Jehova sa Bagatnan kag Sentral nga Amerika kag sa mga isla sang Caribbean.

Sa sulod sang mga tuig, nakaalagad sila ni Kathi sa Venezuela, Nicaragua, Haiti, Guyana, Barbados, Bahamas, Dominica, Estados Unidos (Florida), kag sa Dominican Republic. Bangod sining pinasahi nga porma sang bug-os tion nga ministeryo, nagkit-anay liwat si Mark kag si Dennis.

Pagkit-anay Liwat sa Dominican Republic

Wala sing hinalung-ong ang kada isa, si Mark kag si Dennis nagatrabaho sa pareho nga mga proyekto sa Dominican Republic. Isa ka adlaw natabuan nga nagkit-anay sila sa mga pasilidad sang sanga sang mga Saksi ni Jehova sa Santo Domingo. Mahanduraw mo gid ang ila kalipay sa pagkit-anay liwat. Kay man, 33 anyos na ang nadugang sa ila edad kag madamo gid sila sing maistoryahan. Upod ang nagadugang nga kakunyag, kalabanan nga gin-istoryahan nila ang nabasa mo sa ibabaw. Apang  ang talalupangdon gid para sa ila​—⁠kag sa tanan nga ginsugiran nila sang ila mga eksperiensia⁠​—⁠amo ang madamo nga magkapareho sa ila kabuhi.

Pareho sila nga nagkabuhi subong hippie kag nagsaylo sa baw-ing nga mga duog agod makapalayo sa materyalistiko nga modernong pagkabuhi upod ang kahuol sini. Ang ngalan sang asawa ni Dennis, Kathy; ang kay Mark, Kathi. Pareho sila nga nagbaton sing pagtuon sa Biblia sa ila una nga pagtambong sa miting sang mga Saksi ni Jehova. Pareho sila nga nabawtismuhan sang Marso 1974. Pareho sila nga nangin mga katapo sang mga pamilya sang sanga sang mga Saksi ni Jehova​—⁠si Dennis sa Estados Unidos kag si Mark sa Canada. Pareho sila nga nagpanikasog nga pasimplehon ang ila kabuhi agod malab-ot ang espirituwal nga mga tulumuron. (Mateo 6:22) Pareho sila nga nakigbahin sa internasyonal nga konstruksion kag nakabaton sing mga asaynment sa madamo nga pungsod. Tubtob natabuan nga nagkit-anay sila sa Dominican Republic, wala sing isa sa ila ang nakasugata sang mga abyan anay nga nagbaton sing mga kamatuoran sang Biblia.

Ginapatungod bala nanday Mark kag Dennis ining talalupangdon nga pagkit-anay liwat sa kapalaran? Indi gid. Nahibaluan nila nga, suno sa ginasiling sang Biblia, “ang tion kag wala ginapaabot nga hitabo nagakahanabo sa [aton] tanan”​—⁠kon kaisa sa makawiwili gid nga mga paagi. (Manugwali 9:11) Apang, nahisayran man nila nga may isa pa ka butang nga gintunaan sang ila pagkit-anay liwat: ang ila pagpangita kon ano ang katuyuan sang kabuhi kag ang ila gugma kay Jehova nga Dios.

Ang inagihan nanday Dennis kag Mark nagapadaku man sang pila ka butang nga kinaandan sa tanan nga bunayag sing tagipusuon nga nagatuon sing kamatuoran sang Biblia. Si Dennis nagsiling: “Ang naeksperiensiahan namon ni Mark nagapakita nga nahibaluan ni Jehova ang mga kahimtangan sang kabuhi sang mga tawo, kag kon ang ila tagipusuon husto nga napahamtang, ginabuyok niya sila sa iya.”​—⁠2 Cronica 16:⁠9; Juan 6:​44; Binuhatan 13:48.

Si Mark nagsiling pa: “Ang amon eksperiensia nagtudlo man sa amon nga mahangpan nga kon ang isa magpasibu sa mga talaksan ni Jehova, magdedikar sang iya kabuhi kay Jehova, kag handa nga gamiton ang iya kaugalingon, sarang magamit ni Jehova ang iya mga kinaadman kag ikasarang sa pagpauswag sa matuod nga pagsimba para sa kaayuhan sang iya katawhan.”​—⁠Efeso 4:8.

Ginapakita man sang ila eksperiensia nga ginapakamaayo ni Jehova nga Dios ang bug-os kalag nga pag-alagad sang iya katawhan. Nagbatyag gid sanday Dennis kag Mark nga ginpakamaayo. Si Dennis nagsiling: “Isa gid ka pribilehiyo nga makaalagad para sa intereses sang Ginharian sa pinasahi nga bug-os tion nga pag-alagad. Nagatugot ini sa amon nga makabayluhanay sing pagpalig-on samtang nagatrabaho upod sa Cristianong mga kauturan sa nagkalainlain nga bahin sang kalibutan.”

Nagsiling pa si Mark: “Ginapakamaayo gid ni Jehova ang mga nagauna sang iya Ginharian. Ginakabig ko nga isa ka pinasahi nga pagpakamaayo nga makaalagad subong katapo sang pamilya sang sanga sa Canada kag makapakigbahin sa internasyonal nga konstruksion.”

Isa bala ka tumalagsahon nga pagkit-anay liwat? Huo, bangod suno kay Mark: “Ang rason gid kon ngaa ang pagkit-anay namon makakulunyag katama amo nga nakilala namon, ginahigugma, kag ginaalagad ang tumalagsahon nga Dios, si Jehova.”

[Retrato sa pahina 25]

Si Dennis, 1966

[Retrato sa pahina 25]

Si Mark, 1964

[Retrato sa pahina 27]

Si Dennis sa South Dakota, 1974

[Retrato sa pahina 27]

Si Mark sa Ontario, 1971

[Retrato sa pahina 28]

Si Dennis kag si Mark, upod sa ila asawa, wala madugay sa tapos nga natabuan nga nagkit-anay sila liwat, 2001