Gikan sa Makamamatay nga Misyon Padulong sa Mahidaiton nga Paghimud-os

PANUGIRON NI TOSHIAKI NIWA

Ang isa anay ka Hapon nga piloto nga ginhanas para sa kamikaze nga pag-atake sa bapor-de-guerra sang Amerika sadtong Bug-os Kalibutan nga Inaway II nagasaysay sang iya ginbatyag samtang nagahulat sang makamamatay nga misyon.

BANGOD sang malaglagon nga pagkalutos sa Inaway sa Midway sang Hunyo 1942, ang pagpanakop sang mga Hapon sa Pasipiko nauntat. Sugod sadto nga tion padayon, ang Japan nalutos sa pagpakig-away sini kontra sa Estados Unidos kag sa mga kaalyado sini samtang ginabawi nila ang mga teritoryo nga gin-agaw sang Japan.

Sang Septiembre 1943 ang gobierno sang Japan nag-anunsio nga ang mga estudyante sa unibersidad obligado na karon nga magsoldado. Sang Disiembre, sa edad nga 20 anyos, nagbuylog ako sa navy halin sa kampus sang unibersidad. Pagligad sang isa ka bulan nangin estudyante ako sang naval aviation. Sang Disiembre 1944, naghanas ako nga mangin piloto sang isa ka sahi sang eroplano sa guerra nga gintawag Zero.

“Kamikaze Special Attack Corps”

Ang Japan malapit na malutos sadto. Sang Pebrero 1945, ang pagpamomba sang mga B-29 bomber sa Japan nagbaskog. Sadto man nga tion, ang mga naval task force sang Estados Unidos nagapadulong sa Japan, kag nangin target ini sang nagapamomba nga mga eroplano.

Pila ka bulan antes, ang mga lider sang militar sang Japan nagdesisyon sa pagpakig-away sa katapusan nga tion nga nagagamit sing mahikugon nga mga taktika. Bisan pa maathag na nga malutos ang Japan, yadto nga desisyon nagpalawig sang inaway kag wala duhaduha nga nagkutol sing linibo pa ka kabuhi.

Gani, nagsugod ang Kamikaze Special Attack Force. Ginhingadlan ini sunod sa balaan nga hangin, ang kamikaze, ang isa ka bagyo nga suno sa tradisyon nagpalid palayo sang mga barko sang mga manugsalakay gikan sa Mongolia sang ika-13 nga siglo. Para sa una nga kamikaze nga pag-atake, ang kada isa sang lima ka Zero fighter plane ginsangkapan sing 250-kilos nga bomba para sa isa ka mahikugon nga pagsurip padulong sa ginatarget nga barko.

Natungod ako sa Yatabe Naval Flying Corps kag ginmanduan ini sa pag-organisar sing isa ka pinasahi nga eskuadron ukon dibisyon nga handa  manginmatay. Nakabaton kami tanan sing pormas nga dapat sabtan, nga nagapakita kon bala magaboluntaryo kami nga mangin miembro sang suicide attack corps.

Ginbatyag ko nga dapat ko ihalad ang akon kabuhi para sa akon pungsod. Apang bisan pa nagboluntaryo ako nga manginmatay paagi sa paglupad nga may mahikugon nga misyon, mahimo nga palukpan ako kag mahulog antes ko maigo ang target, kag sa amo mapatay sa walay pulos. Malipay bala ang akon iloy kon mapatay ako nga wala matuman ang akon mga katungdanan sa pamilya? Daw indi ko gid makumbinsi ang akon kaugalingon nga ang pagboluntaryo para sa isa ka mahikugon nga misyon amo ang labing maayo nga paagi sa paggamit sang akon kabuhi. Walay sapayan sini, nagboluntaryo ako.

Sang Marso 1945 ang nahauna nga grupo sang Yatabe Special Attack Corps gin-organisar. Bisan pa 29 ka kaupod ko ang napili, wala ako mapilian. Sa tapos makabaton sing pinasahi nga paghanas, gin-iskedyul sila nga maglupad para sa makamamatay nga misyon halin sa Kanoya air base sa Kagoshima prefecture sang Abril. Antes sila ginsaylo sa Kanoya, ginduaw ko ang akon mga abyan nga napilian agod hibaluon ang ila balatyagon samtang ginahulat nila ang isa ka mahikugon nga misyon.

“Mapatay kami,” kalmado nga ginsiling sang isa sa ila, “apang indi ka gid magdali nga mapatay. Kon may isa nga makalampuwas sa aton, dapat sugiran niya ang iban kon daw ano ka hamili ang paghidait kag himud-usan nga matigayon ini.”

Sang Abril 14, 1945, ang akon mga kaupod naglupad. Pagligad sang pila ka oras, namati kami tanan sa isa ka pagwaragwag agod makabalita kon ano ang natabo. Ang manugwaragwag nagsiling: “Gin-atake sang Nahauna nga Showa nga Grupo sang Kamikaze Special Attack Force ang mga kaaway sa dagat, sa sidlangan sang Kikai Shima. Tanan sila napatay sa inaway.”

Ohka​​—⁠Isa ka Tawo nga Bomba

Pagligad sang duha ka bulan, ginsaylo ako sa Konoike Naval Flying Corps subong miembro sang Jinrai Special Attack Squadron sini. Ang Jinrai nagakahulugan sing “balaan nga daguob.” Ang eskuadron ginahuman sang nakabase-sa-duta nga mga eroplano (nga ginatawag Attacker), guardia nga mga fighter, kag mga carrier-borne bomber.

Gikan sa tagsa ka “iloy” nga eroplano​—⁠nga amo, ang duha-sing-makina nga Attacker​—⁠nagakabit ang Ohka, nga nagakahulugan sing “cherry blossom.” Nagasimbulo ini sa lamharon nga mga piloto nga handa sa pagsakripisyo sang ila kabuhi. Ang Ohka isa-sing-pulungkuan nga glider (eroplano nga wala sing makina) nga may pakpak nga nagalapad sing 5 metros kag nagabug-at sing 440 kilos. Nasangkapan ini sing mga isa-ka-tonelada nga bomba sa atubangan nga bahin sini.

Samtang ang iloy nga eroplano nagapadulong sa target, ang piloto nagasakay sa Ohka, nga nian nagabulag gikan sa iloy nga eroplano. Sa tapos maglupad sing manubo sa bulig sang tatlo ka rocket, nga ang tagsa nagalawig sing napulo ka segundo, nagasurip ini padulong sa target. Nagakaigo ini tawgon nga isa ka tawo nga bomba. Sa tion nga mapalupad, indi na ini mapabalik!

 Sa mga ensayo ang isa ka piloto sang Ohka nagasakay sa Zero fighter kag nagasurip padulong sa target halin sa kataason nga mga 6,000 metros. Nasaksihan ko ang pagkapatay sang pila ka piloto sa sining mga ensayo.

Antes ako gintangdo sa eskuadron, ang una nga grupo bag-o lang maglupad. Ginahuman ini sang 18 ka Attacker nga may mga Ohka, nga guardiado sang 19 ka fighter. Ang mga Attacker mabug-at kag mahinay. Wala bisan isa sa ila ang nakalab-ot sa ila mga target. Ang tanan nga mga Attacker kag ang ila mga guardia naigo sang mga fighter sang Estados Unidos kag nahulog.

Bangod naubos ang guardia nga mga fighter plane, ang Jinrai Squadron dapat magpalupad sang masunod nga mga misyon sini nga wala sing guardia. Ang mga naglupad wala na makabalik. Sila tanan napatay, naalimunaw sa patag-awayan sang Okinawa.

Ulihi nga Inadlaw sang Inaway

Sang Agosto 1945, ginsaylo ako sa Otsu Naval Flying Corps. Ang base nga ginpadalhan sa akon nahamtang sa tiilan sang Hiei-zan malapit sa siudad sang Kyoto. Sa pagsigahom nga magadungka ang mga puwersa sang Estados Unidos sa kadak-an sang Japan, ginhimo ang mga plano nga paluparon ang mga Ohka halin sa bukid agod mahikugon nga mag-atake sa mga bapor-de-guerra sang Estados Unidos. Ginpahamtang ang lugar nga paluparan sang eroplano sa putukputukan sang bukid.

Naghulat kami sa sugo nga maglupad. Apang wala na ini mag-abot. Sang ginhulog ang mga bomba atomika sa Hiroshima kag Nagasaki sang Agosto 6 kag 9, ang Japan nag-ampo sa Estados Unidos kag sa iya mga kaalyado sang Agosto 15. Natapos gid man ang inaway. Diutayan lang nga wala ako makalampuwas.

Sang talipuspusan sang Agosto, nagpauli ako sa amon banwa nga Yokohama, apang ang akon balay nasunog bangod sang pagpamomba sang mga B-29 bomber. Ang akon pamilya nadulaan na sing paglaum. Ang akon magulang nga babayi kag ang iya anak nga lalaki napatay sa sunog. Apang, nalugpayan kami sang nagpauli nga buhi ang akon manghod nga lalaki gikan sa inaway.

Sa tunga sang mga kagulub-an kag grabe nga kaiwaton sang pagkaon, ginpadayon ko ang akon pag-eskwela sa unibersidad. Pagkatapos sang isa ka tuig, nakatapos ako sa pag-eskwela kag nagtrabaho. Sang 1953, napangasawa ko si Michiko kag sang ulihi nangin amay sang duha ka anak nga lalaki.

Ang Akon Paghimud-os sa Paghidait

Sang 1974, si Michiko nagtuon sa Biblia upod sa isa sang mga Saksi ni Jehova. Wala madugay nagsugod sia sa pagtambong sa ila mga miting kag sa pagpakigbahin sa ila hilikuton sa pagbantala. Namatok ako sa pirme niya nga paglakat. Ginpaathag niya nga ang Cristianong ministeryo nagapauswag sang matuod nga paghidait kag kalipay. Kon amo sina, hunahuna ko, indi ko sia dapat pamatukan. Sa baylo dapat magkooperar ako.

Sadto man nga tion, ginpatrabaho ko ang pila ka lamharon nga mga Saksi subong panggab-i nga mga guardia. Sang mag-abot ang pamatan-on nga mga Saksi, ginpamangkot ko sila tuhoy sa ila organisasyon kag ministeryo. Nakibot ako sang mahibaluan ko nga may direksion sila kag may espiritu sa pagboluntaryo, indi kaangay sang iban nga mga pamatan-on nga kasubong nila sing edad. Natun-an nila ining mga kinaiya sa Biblia. Ginpaathag nila nga ang mga Saksi sa bug-os nga kalibutan wala sing ginaihig-ihig nga rasa kag ginasunod gid nila ang sugo sang Biblia nga higugmaon ang Dios kag ang ila mga isigkatawo. (Mateo 22:36-40) Mga utod ang pagtamod nila sa ila mga kaupod, bisan diin man sila nagapuyo.​—⁠Juan 13:35; 1 Pedro 2:17.

‘Idealismo lamang ini,’ hunahuna ko. Bangod madamo nga mga relihion sang Cristiandad ang nagailinaway, indi ako makapati nga tuhay ang mga Saksi ni Jehova.

Ginpabutyag ko ang akon mga duhaduha sa ila. Ginpakita sa akon sang pamatan-on nga mga Saksi  gikan sa Yearbook of Jehovah’s Witnesses nga ang mga Saksi sa Alemanya ginbilanggo kag ginpatay pa gani bangod sang ila neutralidad sa idalom sang rehimen ni Hitler. Nakumbinsi ako nga ang mga Saksi ni Jehova matuod nga mga Cristiano.

Sini man nga tion, ginsimbuluhan sang akon asawa ang iya dedikasyon sa Dios paagi sa bawtismo sa tubig sang Disiembre 1975. Gintanyagan ako sing isa ka pagtuon sa Biblia sadto nga okasyon. Apang, sang mahunahuna ko ang akon pinansial nga mga obligasyon, subong sang mga galastuhan sa pag-eskwela sang akon mga anak nga lalaki kag sang balayran sa pagkaprenda sang amon balay, wala ako sing kaisog nga batunon ang tanyag nga magtuon sa Biblia. Ginapasibu sang minyo nga mga lalaki sa kongregasyon ang ila sekular nga mga trabaho agod may mas madamo sila nga tion para sa espirituwal nga hilikuton sang pamilya. Nagdumdom ako nga amo man sini ang ginapaabot sa akon. Apang sa tapos mapaathagan kon paano ang Cristianong kabuhi sarang mabalanse sa sekular nga trabaho, namat-od ako sang ulihi nga magtuon sing Biblia upod sa mga Saksi ni Jehova.

Desisyon sa Pag-alagad sa Dios sang Paghidait

Pagkatapos sang duha ka tuig nga pagtuon, ginpamangkot ako sang nagatuon sa akon kon napamensaran ko na nga idedikar ang akon kabuhi sa Dios. Apang, indi pa ako handa sa paghimo sini nga tikang, kag nabalaka ako sa sini.

Isa ka adlaw, nagadalidali ako sa pagpanaug sa hagdan sa akon ulubrahan. Nasandad ako, nahulog, nalampos ang akon tangkugo, kag nalipong. Sang maulian ako, masakit gid ang akon ulo amo nga gindala ako sang ambulansia sa ospital. Bisan pa nagbanog ang akon tangkugo, wala ini maglitik ukon magdugo sa sulod.

Nagapasalamat gid ako kay Jehova nga buhi ako! Kutob sadto, namat-od ako nga gamiton ini sa paghimo sang kabubut-on ni Jehova, kag gindedikar ko ang akon kabuhi sa iya. Sang Hulyo 1977, ginbawtismuhan ako sa edad nga 53. Ang akon subang nga lalaki, nga si Yasuyuki, nagtuon man sa Biblia kag ginbawtismuhan pagligad sang duha ka tuig.

Mga napulo ka tuig sa tapos ako mabawtismuhan, nagretiro ako sa akon obra. Sa sulod sini nga mga tinuig, naglakat ako sa Cristianong dalanon, nga ginabalanse ini sa akon sekular nga trabaho. Sa karon, nagaalagad ako subong isa ka gulang sa Yokohama, nga nagahinguyang sing madamo nga tion sa Cristianong ministeryo. Ang akon subang nga lalaki isa man ka gulang kag bug-os tion nga ministro sa kaiping nga kongregasyon.

Bangod nalampuwasan ko ang pinasahi nga eskuadron sa pag-atake kag ang makamamatay nga misyon sini, nagapasalamat ako nga buhi ako kag ginakabig ko nga isa ka kadungganan nga makapakigbahin sa pagbantala sing “maayong balita sang ginharian.” (Mateo 24:14) Kumbinsido gid ako nga ang labing maayo nga dalanon sang kabuhi amo ang paglakat subong isa sang katawhan sang Dios. (Salmo 144:15) Sa bag-ong kalibutan nga malapit na mag-abot, ang mga tawo indi na liwat makaeksperiensia sing inaway, kay “ang pungsod indi magabayaw sing espada batok sa pungsod, kag indi na sila magtuon sing inaway.”​—⁠Isaias 2:4.

Kon kabubut-on sang Dios, luyag ko liwat makita ang mabanhaw nga mga kakilala ko nga napatay sa inaway. Makunyag ako nga isugid sa ila ang tuhoy sa mahidaiton nga kabuhi nga sarang nila maagom sa paraiso nga duta sa idalom sang matarong nga paggahom sang langitnon nga Ginharian sang Dios!​—⁠Mateo 6:​9, 10; Binuhatan 24:15; 1 Timoteo 6:⁠19.

[Retrato sa pahina 21]

Sang miembro pa ako sang “naval air force”

[Retrato sa pahina 20, 21]

“Ohka”​​—⁠Isa ka tawo nga bomba

[Credit Line]

© CORBIS

[Retrato sa pahina 22]

Upod sang akon mga kaupod antes sang makamamatay nga misyon. Ikaduha ako halin sa wala, ang lamang nga nabuhi

[Retrato sa pahina 23]

Upod sa akon asawa, nga si Michiko, kag sa akon subang, si Yasuyuki

[Picture Credit Line sa pahina 20]

U.⁠S. National Archives photo