Pagkamahalungon

ANG pagsakay sa eroplano nga 11 kilometros ang kataason sa duta mahimo nga isa ka makahaladlok nga eksperiensia para sa iban. Daw ginalapas sini ang kasuguan sang kinaugali. Bangod ginpauswag pa ang mga talaksan sang seguridad kag ang pagkamasaligan sang pagsakay sa eroplano, diutay na lang ang peligro sang nagasibad nga eroplano sa atmospera. Apang, kon kaisa, ginapahanumdom kita sang mapintas nga realidad nga ang mga aksidente mahimo matabo.

Paglandas sa Kahadlok

Walay sapayan sini nga realidad, halin pa sang una, ginpabutyag na sang tawo ang iya handum sa paglupad. Napulo ka siglo sang wala pa si Cristo, si Hari David nagsulat: “O kon may mga pakpak lamang kuntani ako nga subong sang salampati! Malupad ako.” (Salmo 55:⁠6) Subong sang nasambit na, ginhimo sang modernong teknolohiya ang pagsakay sa eroplano nga isa sang labing segurado nga mga paagi sang paglakbay. Indi, indi ini himpit. Wala sing butang sa kalibutan karon ang himpit nga segurado ukon mahibaluan sing abanse.

Importante nga dumdumon ini kon daw nabudlayan kita sa pagpakita sing makatarunganon nga reaksion sa isa ka kahimtangan nga kontrolado sang iban. Ang iban nga mga tawo mahimo  mahuyog sa paghunahuna, ‘Kon kontrolado ko ang kahimtangan, indi ini mangin makahaladlok.’ Mahimo nga nabudlayan ini nga mga tawo sa mga kahimtangan nga halos wala sila sing mahimo ukon indi nila kontrolado. Ang pagsakay sa eroplano isa sini nga mga kahimtangan.

Walay sapayan sang mga panikasog nga pauswagon ang seguridad sa kahanginan, indi dapat mangin kampante ang isa ka tawo. Ang tanan nga nadalahig sa paglakbay sa kahanginan sarang makabuligay agod mabuhinan ang posible nga mga katalagman. Apang, padayon nga nagapaandam ang mga awtoridad batok sa posible nga mga peligro. Ang isa ka maalamon nga hulubaton sa Biblia nagasiling: “Abanse nga ginatan-aw sang isa ka maalamon nga tawo ang katalagman kag nagahimo sia sing mga tikang sa paghalong.” (Hulubaton 22:⁠3, New Living Translation) Maalamon nga kilalahon  naton nga may risgo ang halos tanan nga ginahimo naton. Agod mabalanse ang imo pagtamod, dumduma nga kon nagahalong ka sa iban nga mga kahimtangan amo man nga paghalong ang himuon mo kon magsakay ka sa eroplano.

Mahimo nga ang mga masunson magsakay sa eroplano mas nakahibalo kon ano ang himuon sa sining mabudlay nga mga tion. Amo sini bangod ang masunson nga mga nagalakbay masami nga sunado na sa mga erport kag sa eroplano sangsa iban nga mga pasahero. Mangin sunado ka man kag kalmado kon sundon mo ang simple lamang nga mga tikang nga ginalaragway sa kaupod nga mga kahon.

Paglakbay nga Wala Nagakabalaka

Samtang ang mga security checkpoint nagahatag sing kinahanglanon nga serbisyo, nasabaran sa sini ang iban nga mga nagalakbay labi na kon nagadali sila. Bangod sang ginpaestrikto pa nga seguridad sa kalabanan nga mga erport, mahimo luyag mo nga sundon ang masunod nga mga panugda agod mahapos ang imo pag-agi sa mga checkpoint.

▪ Mag-abot sing temprano. Paagi sa pagtigana sing ekstra nga tion sa erport, sarang ikaw makahinayhinay, makarelaks, kag malikawan mo ang kahuol kon mag-utwas ang wala ginapaabot nga kahimtangan ukon kabudlayan.

▪ Kon nagapili sing eroplano, pilia ang ginasakyan sang mga negosyante. Eksperiensiado sila sa paglakbay, diutay sing dala, kag madasig maghulag.

▪ Antes mag-agi sa metal detector nga alagyan, kuhaa na nga daan ang mga butang nga sa banta mo magapatunog sa alarma. Lakip sa sini amo ang mga yabi, mga sensilyo, alahas, kag mga cell phone. Idaho ini dayon sa nagabantay samtang nagahanda ka sa pag-agi sa alagyan.

▪ Pahigdaa sing maayo ang imo mga bag kag iban pa nga dala sa conveyor belt; kon makita sang nagabantay sa X-ray monitor ang buron nga laragway, mahimo nga ipahaw-as niya sa imo ang unod sang imo bag ukon ipasulit sa imo ang proseso.

▪ Sambita nga daan sa manugbantay ang bisan anong tumalagsahon nga mga butang nga sa banta mo magatawag sing igtalupangod, subong sang duag-pilak nga karaan nga mandolina gikan sa imo lola. Bangod sang isa ka rasonable nga paathag tuhoy sa tumalagsahon nga korte nga magguwa sa monitor, mahimo gid nga indi na mag-insister ang manugbantay nga usisaon ini. Kon nagadali ka, haw-asa nga daan ang isa ka butang kag ipausisa ini.

▪ Kon magtunog ang alarma, mangin mabuligon kag magpaathag gilayon. Kon mahibaluan sang manugbantay nga ang pagtunog sang alarma gintuga sang isa lang ka butang kag may kaupod sia nga nagauyat sing scanning wand, senyasan ka niya nga magkadto sa iya.

▪ Ang isa ka sigurado gid nga paagi agod indi ka makasakay amo kon maglahog ka tuhoy sa hijacking ukon bomba. Wala labot nga usisaon ka sing maayo sang mga tinawo sang erport para sa seguridad, mahimo nga kasuhan pa ikaw sing isa ka krimen.

Kabay nga Maayo ang Imo Pagsakay sa Eroplano!

Posible bala nga pilion ang isa ka maayo nga pagsakay sa eroplano? Ti, huo. Bisan ano man nga  eroplano ang pilion mo, maayo gid ang imo tsansa nga makalab-ot ka sa imo kaladtuan nga wala sing disgrasya. Kon nagaduhaduha ka, usisaa ang rekord sang kompanya sang eroplano nga imo ginaplano nga pilion. Dumduma nga walay sapayan sang mga aksidente sa eroplano, ang eroplano amo gihapon ang ginakabig nga isa sang pinakawalay peligro nga mga paagi sa paglakbay.

Samtang, mapaabot naton tanan ang tion​​—⁠sa idalom sang paggahom sang Dios sa ibabaw sang duta⁠​—⁠nga walay peligro, may seguridad, kag pagsalig. Ang bisan sin-o nga magabutang sa peligro sang kabuhi sang tawo wala sing duog sa sulod sang mahinadlukon sa Dios, mahidaiton nga pamilya sang tawo. Ang katawhan mangin “walay peligro kag may seguridad nga wala sing kahadlok sa kalamidad.”​​—⁠Hulubaton 1:​33, Holy Bible​​—⁠Contemporary English Version.⁠ *

[Nota]

[Kahon/Retrato sa pahina 10, 11]

PILA KA PANUGDA PARA SA SEGURIDAD

Pilia ang diretso nga biyahe. Ang kalabanan nga mga aksidente nagakatabo sa tion sang paglupad, pagpaibabaw, pagpanubo, ukon paghugpa sang eroplano. Paagi sa pagpili sang diretso nga biyahe, mabuhinan ang mga bahin sang pagbiyahe nga masami may nagakatabo nga aksidente.

Pilia ang mas daku nga eroplano. Ang eroplano nga may kapin sa 30 ka pasahero masami nga pasado sa talaksan sang mas estrikto nga mga regulasyon sangsa gamay nga eroplano. Subong man, en kaso may isa ka serioso nga aksidente, mas daku ang posibilidad nga makalampuwas ang pasahero kon daku ang eroplano.

Talupangda ang mga instruksion antes sang paglupad. Bisan pa daw sulit-sulit lamang ang impormasyon, ang mga lokasyon sang pinakamalapit nga guluwaan kon may emerhensia mahimo nga yara sa tuhay nga lugar depende sa eroplano kag sa imo ginapungkuan.

Indi pagbutangi sing mabug-at nga mga butang ang bulutangan sa ibabaw sang imo ulo. Ang bulutangan sa ibabaw sang imo ulo mahimo nga indi makasarang sa tuman kabug-at nga mga butang kon mag-undag todo ang eroplano, gani kon nabudlayan ka sa paghakwat sang imo dala, i-⁠check in na lang ini.

Itakod pirme ang seat belt samtang nagapungko ka. Ang pagtakod pirme sing seat belt samtang nagapungko ka magahatag sa imo sing dugang nga proteksion kon hinali mag-undag ang eroplano.

Mamati sa mga flight attendant. Ang una nga rason kon ngaa may mga flight attendant sa eroplano amo ang seguridad, gani kon ang isa sa ila may ipahimo sa imo, himua ini anay, dayon ka mamangkot.

Indi magdala sing makatalagam nga butang. Medyo malaba ang listahan sang makatalagam nga mga butang nga wala ginatugutan, apang ang sentido komon dapat magsugid sa imo nga indi ka dapat magdala sing gasolina, maasido nga mga kemikal, makahililo nga mga gas, kag iban pa nga kasubong sini nga mga butang sa eroplano luwas kon ginatugutan ini kag nabutang sa nagakaigo nga suludlan subong bagahe.

Indi mag-inom sing sobra nga alkohol. Ang bisan sig-ano nga alkohol nga mainom mo may mas mabaskog nga epekto sa imo sa kahanginan sangsa yara ka sa duta. Ang pagkahaganhagan amo ang maalamon nga himuon sa bisan ano nga kataason.

Mangin alisto pirme. Kon mag-utwas ang emerhensia nga kahimtangan, subong sang emerhensia nga pagguwa sa eroplano, dapat mo sundon ang ginapahimo sang mga flight attendant kag sang mga piloto kag magguwa gilayon sa eroplano kon mahimo.

[Credit Line]

Ginkuhaan: AirSafe.com

[Kahon/Retrato sa pahina 12]

PAGPAKALMA SA IMO PAMILYA

Kon maglakbay ka, amo sini ang himua agod indi magkabalaka ang imo pamilya.

Hambala ang imo pamilya. Antes ka maglakat, hambali upod sa imo mga hinigugma ang imo seguridad kag ang ila man. Ipaathag ang bag-o nga mga tikang para sa seguridad nga nahimo na kag kon ano ang kahulugan sini para sa imo seguridad samtang nagalakbay ka.

Tuguti sila nga ipabutyag ang ila mga kabalaka. Tuguti ang imo pamilya nga ipabutyag ang ila kabalaka. Ginahigugma nila ikaw kag luyag lamang nila nga mahilway ka sa katalagman. Mamati sing maayo kag indi sila pagmulaya kundi binagbinaga sing serioso ang ila ginakahadlukan kag ginakabalak-an.

Paathagi sila sing maayo. Sugiri sila kon paano ang nanuhaytuhay nga mga ahensia nagatinguha nga mapunggan ang dugang pa nga pag-atake sang mga terorista. Ini nga mga panikasog nagalakip sang estrikto pa gid nga mga tikang para sa seguridad sa mga erport subong man sa eroplano mismo. Diutay lamang ang posibilidad nga may matabo nga malain samtang yara ka sa eroplano.

Magkomunikar. Manaad nga magtawag ka kon mag-abot ka sa imo destinasyon. Tawgi sila pirme sa balay samtang yara ka sa malayo. Importante man nga mahibaluan sang imo pamilya kon paano ka makontak en kaso may mga emerhensia nga matabo.

[Credit Line]

Ginkuha gikan sa United Behavioral Health Web site

[Retrato sa pahina 10]

Mangin handa sa pagkooperar sa mga “security checkpoint”