Peligruso na Bala ang Pagsakay sa Eroplano?

APAT ka jetliner nga gin-hijack. Nagwasaag ini tanan. Narusdak nga bantog kag mataas nga mga bilding. Laragway sang 767 jetliner nga nagwasaag sang ginbunggo ini sa isa sang Twin Towers, nga ginpakita sing sulit-sulit sa telebisyon.

Ang pag-atake sang Septiembre 11, 2001, nagdala sa aton sa isa ka makakulugmat nga bag-o nga dag-on sang kaakig kag pag-atake sang mga terorista. Gingamit ang mga eroplano sa pagpatay, kag ginpalupok nga daw mga bomba.

Subong resulta, isa ka bag-o nga sahi sang mahinadlukon nga mga manuglakbay ang nagtuhaw: Mga tawo nga kalmado anay apang ginakulbaan na karon nga basi mag-atake ang mga terorista. Dugang pa, labi pa nga hinadlukan ang madamo bangod sang naaksidente nga mga eroplano pagkatapos sang Septiembre 11.

Matuod, ang pagsakay sa eroplano isa ka maluho nga paglakbay nga indi masarangan sang minilyon sa bug-os nga kalibutan. Apang, para sa iban, isa ini ka kinahanglanon nga rutina. Para sa mga negosyante nga kinahanglan magbiyahe, ang pagsakay sa eroplano indi malikawan. Ang Cristianong mga misyonero kag mga ministro masami nga nagasakay sa eroplano pakadto-pakari sa ila teritoryo. Bisan gani para sa imol nga mga tawo, ang pagsakay sa eroplano kon kaisa amo lamang ang nagakaigo nga transportasyon sa tion sang medikal nga emerhensia. Kag linibo ka piloto kag tripulante ang nagatrabaho sa sulod sang eroplano.

Madamo sining mga manuglakbay sa kahanginan, nga mahimo ginanerbios man, ang nagapakalma sa ila nagakabalaka nga mga tiayon kag ginakulbaan nga mga anak antes sila maglakat. Kag bangod sang mga kabudlayan karon sa erport, madamo nga mga manuglakbay ang nagapalibog kon bala ang pagsakay sa eroplano amo gihapon ang mas maayo nga paagi sa paglakbay.

Agod mabinagbinag ini nga mga kabalaka, ginkonsulta sang Magmata! ang mga eksperto sa seguridad, ang mga tinawo sang erport, ang mga opisyales sang kompanya sang eroplano, kag ang mga trabahador nga nagamentinar sang mga eroplano. Daw nagaugyon sila tanan sa sini: Bisan pa ang pagsakay sa eroplano amo gihapon ang isa sang indi peligruso nga mga paagi sa paglakbay, kinahanglan nga dugangan pa ang seguridad sang mga tawo nga nagasakay sa eroplano bangod sang bag-o maglutaw nga mga katalagman.

Binagbinagon sang masunod nga mga artikulo ang mga hangkat nga nadalahig kag kon ano ang imo personal nga mahimo agod madugangan ang imo seguridad kag kasulhay samtang nagasakay ka sa eroplano.