Ang Pagtamod sang Biblia

Dapat Mangin Imol Lang Bala ang mga Cristiano?

GINSILINGAN anay ni Jesus ang isa ka manggaranon nga pamatan-on nga manuggahom nga dapat sia maglakat kag ibaligya ang tanan niya nga mga pagkabutang kag ihatag sa mga imol. Ang rekord nagasiling nga nahanusbo gid ang tawo sa ginsiling ni Jesus kag naglakat nga masinulub-on, “kay may madamo sia nga pagkabutang.” Nagsiling dayon si Jesus sa iya mga disipulo: “Mabudlay gid para sa mga may kuwarta ang magsulod sa ginharian sang Dios!” Si Jesus nagdugang: “Mas mahapos pa sa kamelyo nga maglapos sa buho sang dagom sangsa isa ka manggaranon nga magsulod sa ginharian sang Dios.”​​—⁠Marcos 10:21-23; Mateo 19:⁠24.

Ano ang buot silingon ni Jesus? Indi bala maghisantuanay ang manggad kag ang matuod nga pagsimba? Dapat bala makonsiensia ang mga Cristiano kon manggaranon sila? Ginapatuman bala sang Dios nga mangin imol sila sa materyal?

Ginaabiabi ang Dios ang “Tanan nga Sahi sang Tawo”

Sang una nga panahon wala magsugo ang Dios nga dapat mangin imol ang mga Israelinhon. Binagbinaga: Sang nagapuyo na sa duta nga ginbahinbahin sa ila, nanguma kag nagnegosyo ang katawhan sa pag-aman sang ila mga kinahanglanon kag para sa ila mga hinigugma. Maapektuhan sang mga butang subong sang kahimtangan sa ekonomiya, paniempo, kapagros, ukon kalantip sa pagnegosyo ang kadalag-an sang ila mga panikasog. Ang Kasuguan ni Moises nagsugo sa mga Israelinhon nga mangin mainawaon kon may namigado kag nag-imol. (Levitico 25:​35-​40) Sa pihak nga bahin, ang iban nagmanggaranon. Si Boaz, ang tawo nga may pagtuo kag integridad nga nangin katigulangan ni Jesucristo, ginlaragway subong “lalaki nga gamhanan sa manggad.”​​—⁠Rut 2:⁠1.

 Amo sini gihapon ang kahimtangan sang panahon ni Jesus. Sa pagpakighambal sa manggaranon nga tawo nga ginsambit sa umpisa, wala sing tuyo si Jesus nga palig-unon ang asetisismo. Sa kabaliskaran, nagtudlo sia sing isa ka importante nga leksion. Sa pagtamod sang tawo, daw imposible nga mangin mapainubuson ang mga manggaranon kag batunon ang paagi sang Dios sa pagluwas. Apang, si Jesus nagsiling: “Sa mga tawo imposible ini, apang sa Dios ang tanan nga butang posible.”​​—⁠Mateo 19:26.

Gin-abiabi sang unang-siglo nga Cristianong kongregasyon ang “tanan nga sahi sang tawo.” (1 Timoteo 2:⁠4) Naglakip ini sa pila ka manggaranon, sa iban nga may madawadawa nga pangabuhi, kag sa madamo nga mga imol. Mahimo nga ang pila ka indibiduwal nakapundar sing manggad antes nangin mga Cristiano. Sa iban nga mga kaso ang maayo nga mga kahimtangan kag maalamon nga mga desisyon sa negosyo mahimo amo ang nagpamanggad sa iban sang ulihi.

Sing kaanggid, ang Cristianong paghiliutod sa karon nagalakip man sa katawhan nga may nagkalainlain nga kahimtangan sa pangabuhi. Ginapanikasugan nila tanan nga sundon ang panuytoy sang Biblia may kaangtanan sa kuwarta, bangod ang materyalismo mahimo makaapektar kay bisan sin-⁠o. Ang leksion nga gintudlo ni Jesus may kaangtanan sa manggaranon nga pamatan-on nga manuggahom nagapaandam sa tagsa ka Cristiano batok sa mabaskog nga impluwensia sang kuwarta kag mga pagkabutang sa isa ka tawo.​​—⁠Marcos 4:⁠19.

Isa ka Paandam Para sa mga Manggaranon

Ginapakamalaut sa Biblia ang gugma sa kuwarta, indi ang manggad mismo. Ang manunulat sang Biblia nga si Pablo nagsiling: “Ang gugma sa kuwarta amo ang gamot sang tanan makahalalit nga mga butang.” Nagsiling sia nga paagi sa pagdula sa espirituwal nga mga interes bangod sa handum nga magmanggaranon, “ang iban nagtalang gikan sa pagtuo kag nagbuno sang ila mga kaugalingon sing madamong kasakitan.”​​—⁠1 Timoteo 6:⁠10.

Sing makawiwili, naghatag si Pablo sing espesipiko nga mga instruksion para sa mga manggaranon. Sia nagsiling: “Tulini ang mga manggaranon sa karon nga sistema sang mga butang nga indi sila magmatinaastaason, kag ipahamtang nila ang ila paglaum, indi sa walay kapat-uran nga mga manggad, kundi sa Dios, nga nagahatag sa aton sing tanan nga butang sing bugana para sa aton ikalipay.” (1 Timoteo 6:17) Maathag nga may yara katalagman nga ang manggaranon nga mga tawo mangin bugalon kag magbatyag nga mas maayo sangsa iban. Subong man, mahimo sila masulay sa paghunahuna nga ang manggad makahatag sing matuod nga kalig-unan​​—⁠butang nga Dios lamang ang bug-os nga makahatag.

Ang manggaranon nga mga Cristiano makapangandam batok sa sining mga katalagman paagi sa ‘pagmanggaranon sa maayong mga buhat.’ Nagalakip ining mga buhat sa pagkamangin “maalwan, handa sa pagpaambit,” nga nagahatag sing bugana nga bulig sa mga nagakinahanglan. (1 Timoteo 6:18) Ang mga Cristiano​​—⁠manggaranon kag imol⁠—​makagamit man sang ila mga pagkabutang agod ipalapnag ang maayong balita sang Ginharian sang Dios, ang panguna nga interes sang matuod nga mga Cristiano karon. Ining pagkaalwan nagapakita sing nagakaigo nga panimuot tuhoy sa materyal nga mga manggad kag nagahimo sa isa ka tawo nga kahamut-an ni Jehova nga Dios kag ni Jesucristo, nga nagahigugma sa malipayon nga mga manughatag.​​—⁠Mateo 24:14; Lucas 16:⁠9; 2 Corinto 9:⁠7.

Ang Mas Importante nga mga Butang

Maathag nga wala ginapatuman nga dapat mangin imol ang mga Cristiano. Indi man sila dapat mangin “determinado nga magmanggaranon.” (1 Timoteo 6:⁠9) Dapat lamang sila mangabudlay sing lakas agod makatigayon sang maayo nga palangabuhian. Depende sa nanuhaytuhay nga mga kabangdanan kag sa sistema sang ekonomiya, indi mangin pareho ang kadakuon sang ila kadalag-an.​​—⁠Manugwali 11:⁠6.

Ano man ang ila pinansial nga mga kahimtangan, dapat tinguhaan sang mga Cristiano nga ‘pat-uron ang mas importante nga mga butang.’ (Filipos 1:10) Paagi sa pag-una sa espirituwal nga mga butang, “mahalungon [sila] nga nagatipon para sa ila kaugalingon sing maayo nga sadsaran para sa palaabuton, agod makapanguyapot sila sing hugot sa matuod nga kabuhi.”​​—⁠1 Timoteo 6:⁠19.