‘Tumanon Namon ang Dios sa Baylo sang mga Tawo’

Sang 17 anyos sia, si Adam isa sa tatlo nga nagdaug sa paindis-indis nga ginpatigayon sang U.⁠S. Holocaust Memorial Museum. Ang mga nagpasakop​​—⁠nga halos mga 500 tanan⁠​—⁠naggamit sing mga larawan ukon nagsulat agod ilaragway ang kaisog sa idalom sang pagpamigos sang mga Nazi. Si Adam isa sang mga Saksi ni Jehova, kag ginpakamaayo niya nga maghimo sing collage ukon mga larawan nga nahuman sa sari-sari nga mga materyales nga magalaragway sa pag-antos nga gin-atubang sang mga miembro sang iya relihion sa idalom sang paggahom sang mga Nazi. Suno kay Adam, ang collage wala nagapakita sing kalutusan ukon paghinakit, kundi sing kalipay nga nagmadinalag-on ang mga Saksi ni Jehova batok sa pag-atake sadtong mapintas nga manugpigos. Ginpakita sa collage ang isa ka bata. Ngaa? “Agod ipakita nga bisan ang mga kabataan nagpabilin nga malig-on batok sa paghingabot sang mga Nazi,” siling ni Adam.

Madamo ang nakahibalo nga sang panahon sang mga Nazi, ang mga Saksi ni Jehova wala nagsaludo kay Hitler ukon nagsuporta sa iya politikal nga partido. Ginpakita ang ila panindugan sa naibabaw tuo nga pamusod sang collage ni Adam. Ginkutlo diri ang isa ka sulat nga ginpadala sang tanan nga mga kongregasyon sang mga Saksi ni Jehova sa gobierno sang Alemanya sang Oktubre 7, 1934. Nagsiling ang isa ka bahin sang sulat: “May direkta nga pagsumpakilay sa inyo kasuguan kag sa kasuguan sang Dios, kag, bilang pagsunod sa halimbawa sang matutom nga mga apostoles, ‘dapat namon tumanon ang Dios sa baylo sang mga tawo,’ kag ini himuon namon. (Binuhatan 5:29) . . . Bangod ang inyo gobierno kag ang mga opisyales sini padayon nga nagatinguha sa pagpilit sa amon nga lapason ang pinakamataas nga kasuguan sang uniberso, kinahanglan pahibaluon namon kamo karon nga, paagi sa iya bugay, tumanon namon si Jehova nga Dios kag bug-os nga magsalig sa iya agod luwason kami sa tanan nga mga pagpamigos kag mga manugpigos.”

Ginapabugal ni Adam ang iya espirituwal nga palanublion. “Ang indi paghalit sa ila isigkatawo kag pagsimba lamang sa Dios kag indi sa bisan sin-o pa, mabakod nga ginapatihan sang mga Saksi ni Jehova, bisan pa nagakahulugan ini sing kamatayon,” siling niya. Ginapakita sa titulo sang collage ni Adam ang malig-on nga panindugan sang mga Saksi ni Jehova: “Tumanon Gid Namon ang Dios sa Baylo Sang mga Tawo!”