Ginpalid Ini sang Hangin

Isa ka tawo ang nagalakat sa kalye sang Mumbai, India, sang ang polyeto nga ginpalid sang mamadlos nga hangin nagtupa sa iya tiilan. Kingdom News Num. 36 yadto, nga natig-uluhan “Ang Bag-ong Milenyo​—⁠Ano ang Imo Palaabuton?” Naganyat sia sa topiko. Ginpulot niya ini gilayon kag ginbasa ang bug-os nga polyeto. Napukaw ang iya interes, kag bangod luyag niya makahibalo sing dugang pa, nagpangabay sia sing isa ka Biblia kag sing iban pa nga mga publikasyon.

Ang polyeto, nga ginbalhag sang mga Saksi ni Jehova, nagaunod sang makapalig-on sing pagtuo nga mga panghunahuna. Ginapaathag sini nga ang kabangdanan sang mga problema nga aton ginaatubang, pati na ang balatian, kaimulon, kag inaway, amo ang “kakagod, walay pagsalig, kag kadalok​—⁠mga kinaiya nga indi madula paagi lamang sa pagpanalawsaw sang siensia, teknolohiya, ukon politika.” Ginapakita man sang polyeto nga sa indi madugay, dulaon sang Dios ang tanan nga kalautan sa duta.

Luyag mo bala makahibalo sing dugang pa tuhoy sa mga saad sang Biblia para sa palaabuton? Ang mga Saksi ni Jehova nagatudlo sing Biblia sa mga puluy-an sang minilyon nga tawo, nga nagagamit sing pasad-sa-Biblia nga mga publikasyon, pati na ang brosyur nga Ano ang Ginapatuman Sang Dios sa Aton? Ini nga brosyur nagasabat sang mga pamangkot subong sang: Sin-o ang Dios? Ano ang katuyuan sang Dios para sa duta? Ano ang Ginharian sang Dios? Paano mapauswag sang Biblia ang pagkabuhi sang inyo pamilya?

Kon luyag mo nga duawon ka sang mga Saksi ni Jehova agod buligan ka nga mahangpan kon ano ang himuon sang Dios sa indi madugay, malipay sila sa paghimo sini kag hatagan ka sing dugang nga impormasyon tuhoy sa Ginharian sang Dios. Palihug sulati ang kupon sa ubos agod mabuligan ka nila.

□ Interesado ako nga makabaton sing isa ka kopya sang brosyur nga Ano ang Ginapatuman Sang Dios sa Aton?

□ Palihug kontaka ako may kaangtanan sa isa ka wala sing bayad nga pagtuon sa Biblia sa puluy-an.