“Isa ka Mapintas Gid nga Krimen”

SI Maria⁠ * nangin pampam sang 14 anyos sia. Ginbaton niya ining makangilil-ad nga kabuhi sa pagpamilit sang iya mismo iloy, nga nagsiling sa iya nga matahom sia kag maluyagan gid sang mga lalaki. Luwas pa, daku ang iya kitaon. Kon gab-⁠i, ginadala sia sang iya iloy sa isa ka motel diin ginabugaw sia sa mga lalaki. Ang iya iloy yara lang sa malapit agod magbaton sang bayad. Kada gab-⁠i, tatlo ukon apat ka lalaki ang nagagamit kay Maria.

Indi malayo sa balay ni Maria, ang 13 anyos nga si Carina napilitan man nga mangin pampam. Kaangay sang madamo pa nga mga pamilya sa ila komunidad nga nagaobra sa tubuhan, ginbaligya sang pamilya ni Carina ang iya lawas agod makapiyanpiyan sa ila diutay nga kita. Sa isa pa ka duog nag-untat si Estela sa pag-eskwela sang bata pa sia, nga indi gani makahibalo magbasa kag magsulat, kag nagsugod sa pagtrabaho subong isa ka pampam sa kalye. Kag si Daisy mga seis anyos sang ginhimuslan sia sang isa sa iya mga magulang nga lalaki​​—⁠ang una sa madamo nga paghimulos sa iya sang iya mga paryente. Nangin pampam sia sa edad nga 14.

Sa madamo nga mga bahin sang kalibutan, ang problema tuhoy sa prostitusyon sang mga bata isa ka makahaladlok nga kamatuoran.  Makapasubo ang mga resulta. Sa masami, ang mga bata nga pampam, panalagsa lang ukon bug-os tion, nagakadalahig man sa krimen kag sa pag-abuso sa droga. Madamo sa ila ang nagakadulaan sing paglaum kag nagabatyag nga walay pulos, bangod diutay lamang ukon wala sila sing makita nga paglaum nga makapalagyo sila sa ila miserable nga kabuhi.

Ginakilala sang impluwensiado nga mga personalidad ang makahalapay nga mga epekto sang prostitusyon sang mga bata. Ang presidente anay sang Brazil nga si Fernando Henrique Cardoso husto sa pagsiling: “Ang prostitusyon sang mga bata isa ka mapintas gid nga krimen.” Ang isa ka pamantalaan sa Brazil nagbalhag sining makapahunahuna nga komento tuhoy sa prostitusyon sang mga bata: “Ang mga pungsod diin ini nga buhat kinaandan lamang, ginakunsinte, ginabaton, kag ginasakdag pa gani bangod sang [kuwarta] nga masaplid sa sini, nagaeksperiensia kada adlaw sang kahapayan nga ginatuga sini. Ang bisan ano nga kantidad sang kuwarta nga masaplid sa sini ginabaliwala sang kalainan nga ginatuga sini nga buhat sa indibiduwal, sa pamilya, kag sa katilingban.”

Apang, walay sapayan sang dungganon nga mga katuyuan sang mga nagahandum nga untaton ang prostitusyon sang mga bata, ang problema nagadaku. Ano ang nagadul-ong sa sining makangilil-ad nga kahimtangan? Ngaa madamo ang nagakunsinte ukon nagasakdag pa gani sa sini nga mga krimen?

[Nota]

[Blurb sa pahina 3]

“Ang prostitusyon sang mga bata isa ka mapintas gid nga krimen.”​—⁠ANAY-PRESIDENTE FERNANDO HENRIQUE CARDOSO SANG BRAZIL

[Blurb sa pahina 4]

“Ang tanan nga porma sang seksuwal nga paghingalit wala nagahisanto sa dignidad sang tawo, kag busa nagalapas sa sadsaran nga mga kinamatarong sang tawo, bisan ano man ang edad, sekso, rasa, liwat ukon klase sang biktima.”—⁠UNESCO SOURCES