Kinahanglan Mo ang Bastante nga Tulog!

May magabais bala sa ginasiling nga ang mahamuok nga tulog sa gab-i kinahanglanon gid agod huptan nga maayo ang panglawas? Ayhan wala. Apang, para sa madamo, ang tulog indi tanto ka importante. “Apang magaantos ka pagkadason nga adlaw kon kulang ang imo tulog,” siling ni Shawn Currie, isa ka clinical psychologist kag kabulig nga propesor sa University of Calgary, sa Canada. Kon kulang ang imo tulog, mahimo nga mas iritable ka kag kon kaisa ginapung-aw pa gani.

“Ginahaumhaum sang mga sientipiko nga ang tulog nagapapagros sang utok, kag ang pagkuha sing ihibalo nagapadayon sa tion sang pagtulog,” siling sang Calgary Herald nga pamantalaan. Si Propesor Currie nagsiling: “Ginapabakod mo ang imo memorya sa gab-i kag ang bisan ano nga natun-an sa adlaw ginatago sing nagakaigo sa gab-i. Ang indi pagtulog aktuwal nga nagasablag sang pagtuon.” Dugang pa, nagsiling sia nga “kon bastante ang imo tulog, ayhan sa bisan paano nagabulig ini sa pagpabakod sang imo mga emosyon.”

Gani, ano kalawig ang bastante nga tulog? Samtang madamo nga mga eksperto ang nagasiling nga walo ka oras, si Currie nagsiling: “Ang mga tawo may lainlain nga kinahanglanon nga tulog.” Bangod sini nga rason, ginapanugda niya ang pagpanikasog nga makatulog sing mahamuok. Apang paano ini matigayon, ilabi na sa mga may insomniya? Yari ang pila ka panugda:

▪ Magpaligo sing maalabaab nga tubig antes magtulog.

▪ Mag-ehersisyo sing haganhagan sing pila ka beses sa isa ka semana; apang indi mag-ehersisyo sing makapahago antes magtulog.

▪ Hupti ang imo kuwarto nga malinong, madulom, kag mabugnaw.

▪ Tinguhai nga magbugtaw sa pareho nga oras kada aga agod matukod ang regular nga batasan sa pagtulog.

Bangod sang maathag nga mga benepisyo sa panglawas, mangin mainandamon kag unaha ang tulog sa imo listahan sang importante gid nga mga butang.