Malapit Na Matapos ang Paghingalit sa mga Bata!

“SA Universal Declaration of Human Rights, nagpahibalo ang Nasyones Unidas nga dapat hatagan sing pinasahi nga pag-atipan kag bulig ang panahon sang pagkabata,” siling sang preambulo sang Convention on the Rights of the Child. Tuhoy sa importansia sang pamilya, nagdugang pa ini: “Agod mag-uswag sing bug-os kag balanse ang personalidad sang isa ka bata, dapat sia magdaku sa isa ka pamilya, sa isa ka palibot nga may kalipay, gugma kag paghangop.” Apang, wala gid matigayon ini nga tulumuron.

Indi matigayon ang mas maayo nga kalibutan para sa mga kabataan sa hambal lamang. Lapnag ang pagnubo sang moralidad, kag ginakabig sang madamo nga normal ang kahimtangan. Indi makontrol sang mga nagapatuman sang kasuguan ang lapnag nga kalautan kag kakagod. Bisan gani ang mga ginikanan, sa baylo nga higugmaon kag amligan ang ila kabataan, masami nga nangin mga kunsintidor man. Ano, kon amo, ang aton paglaum nga matapos ang prostitusyon sang mga bata?

Bisan pa napaslawan ining malaut nga sistema sa pagpat-od nga mahatagan ang tanan nga kabataan sing mahigugmaon nga pamilya kag isa ka malig-on nga palaabuton, sa indi madugay dulaon sang aton Manunuga ang tanan nga sahi sang kalautan kag pagkasalamwanan, lakip ang prostitusyon sang mga bata. Sa indi madugay, makibot gid ang kalibutan nga si Jehova nga Dios magapasilabot sa ginahimo sang mga tawo kag himuon niya ini paagi  sa iya Ginharian. Ang mga bugaw kag mga mahingaliton indi makalikaw sa paghukom sang Dios. Ang makalampuwas lamang agod magpuyo sa bag-ong kalibutan sang Dios amo ang mga tawo nga nagahigugma sa ila mga isigkatawo. “Ang mga matadlong amo ang magapuyo sa duta, kag ang mga wala sing kasawayan amo ang magapabilin sa sini. Kon tuhoy sa mga malauton, utdon sila gikan sa duta; kag tuhoy sa mga maluib, gabuton sila gikan sa sini.”​​—⁠Hulubaton 2:​21, 22.

Handurawa ang kaumpawan kon ang mga bata kag mga adulto magakabuhi nga wala sing kahuy-anan kag seksuwal nga pag-abuso! Bisan gani ang emosyonal kag pisikal nga halit nga tuga sang paghingalit kag kasingki mangin mga butang sang nagligad. Ang mga biktima anay sang seksuwal nga paghingalit magakabuhi nga wala ginatublag sang malain nga mga memorya. “Ang nagligad nga mga butang indi na pagdumdumon, ni mag-utwas pa ini sa tagipusuon.”​​—⁠Isaias 65:17.

Sa sina nga tion, wala na sing bata nga mabun-ag nga magaantos sing mapintas nga pagtrato ukon seksuwal nga pag-abuso. Indi na mangin damgo lamang ang kalipay, gugma, kag paghangop. Tuhoy sa mga pumuluyo sang bag-ong kalibutan sang Dios, ang Isaias 11:⁠9 nagasiling: “Indi sila magahimo sing bisan ano nga halit ukon magatuga sing bisan ano nga kagulub-an.”

Sa pagkamatuod, mangin makalilipay gid kon madula na ang kaimulon, pag-abuso sa droga, masubo nga mga pamilya, kag malain nga moralidad! Magahari ang paghidait, pagkamatarong, kag kalig-unan. “Ang akon katawhan magapuyo sa puluy-an nga mahidaiton kag sa mga puluy-an nga may bug-os nga kalig-unan kag sa malinong nga mga palahuwayan.”​​—⁠Isaias 32:⁠18.

 [Kahon/Mga retrato sa pahina 9]

Malikawan nga Mabungkag ang Pamilya Kon May Pag-ulikid ang mga Ginikanan

● “Ginpalig-on ako sang akon mga ginikanan nga mag-ukod sa pag-eskwela kag magtuon sing isa ka propesyon. Wala nila ginpilit sa akon kon ano ang luyag nila, kundi ginbuligan nila ako nga pilion ang eskwelahan nga nagatanyag sing kurso nga kinahanglanon ko.”​​—⁠Tais.

● “Ginaupdan kami ni Nanay kon may baklon kami sang akon manghod nga babayi. Wala labot nga ginbuligan niya kami sa pagkinot, ginbuligan man niya kami nga likawan ang mga bayo nga magarbo ukon seksi.”​​—⁠Bianca.

● “Kon magkadto kami sa mga party, pirme nagapamangkot ang akon mga ginikanan kon sin-⁠o ang makaladto didto, kon ano nga sahi sang musika ang patukaron, kag kon ano oras masugod kag matapos ang party. Sa kalabanan nga mga party magkaupod ang amon bug-os nga pamilya.”​​—⁠Priscila.

● “Sang bata pa ako kag sang tin-edyer na, maayo gid pirme ang komunikasyon ko sa akon mga ginikanan. Natalupangdan ini sang akon kaeskwela kag nagsiling sia: ‘Nahisa ako nga hilway ka nga makapakighambal sa imo mga ginikanan tuhoy sa bisan anong butang. Nahuya ako makighambal sa akon iloy, kag masami nga sa iban ko pa matun-an ang luyag ko mahibal-an.’ ”​​—⁠Samara.

● “Isa ako ka malipayon nga tin-edyer. Masinaligon ako kag palakadlaw. Komportable ako sa akon mga abyan kag nasadyahan ako makig-estorya sa ila tuhoy sa makahalam-ot nga mga butang. Nahangpan sang akon mga ginikanan nga amo sini ang akon personalidad, kag wala sila magtinguha nga bag-uhon ang akon mga paggawi. Apang mainayuhon nga ginpahangop nila sa akon nga dapat ako maghalong kag magpormal sa pagpakig-angot sa mga lalaki.”​​—⁠Tais.

● “Kaangay sang kalabanan nga mga pamatan-on, nangin interesado ako sa tuhay nga sekso. Maathag nga ginhambal sang akon amay kon sa ano nga edad ako puwede makignobyo. Wala ko ini ginpakalain. Sa baylo, ginhantop ko nga ginaulikdan nila ako kag indi nila luyag nga mahalitan ako.”​​—⁠Bianca.

● “Gintamod ko ang pag-asawahay nga isa ka makalilipay nga butang, ilabi na bangod sang halimbawa sang akon mga ginikanan. Maayo gid ang ila relasyon kag nahuptan nila ang maayong komunikasyon. Madumduman ko nga sang nagpakigdeyt ako, ginlaygayan ako sang akon iloy kon ano ang himuon sa idalom sang pila ka kahimtangan kag ginpaathag niya sa akon kon paano ini makaapektar sa akon pagpamana.”​​—⁠Priscila.

[Retrato sa pahina 10]

Sa bag-ong kalibutan sang Dios, wala na sing bata nga himuslan