Ang Pagtamod sang Biblia

May Sala Bala nga Indi Mapatawad?

MAY silot bala nga grabe pa sa kamatayon? Huo, ang kamatayon nga wala sing paglaum nga mabanhaw bangod nakahimo ang isa sing indi mapatawad nga sala. Si Jesus nagsiling nga may sahi sang sala nga “indi mapatawad.”​—⁠Mateo 12:31.

Apang, ginalaragway sang Biblia ang Dios nga mapinatawaron. Bisan pa huyog sang mga tawo nga maghupot sing kaakig kag indi magpatawad, ang Dios ‘nagapatawad sing bugana.’ (Isaias 55:​7-9) Sa pagkamatuod, bisan pa nga kinahanglan ang daku gid nga sakripisyo sa iya bahin, ginpadala sang Dios ang iya pinalangga nga Anak sa duta agod mangin katumbas, ukon inugtabon, nga halad nga tuman ka malahalon amo nga sarang ini makapanas sang aton mga sala.​​—⁠Juan 3:​16, 17; Binuhatan 3:​19; 1 Juan 2:​1, 2.

Sa iya gintalana nga tion pagabanhawon sang Dios ang madamo nga tawo nga may serioso nga mga sala apang wala na sing salabton sa ila anay mga buhat. (Binuhatan 24:15; Roma 6:23) Sa katunayan, si Jesus nagsiling nga magluwas sa indi mapatawad nga sala, “ang tagsa ka sari sang sala kag pagpasipala mapatawad.” (Mateo 12:31) Gani mahimo ka mamangkot, ‘Ano ang sobra gid kalaut amo nga indi ini mapatawad sang Dios?’

Kon Indi na Posible ang Paghinulsol

Ang paandam ni Jesus nagapatuhoy sa kinabubut-on kag hungod nga “pagpasipala batok sa espiritu.” Wala na sing pagpatawad sa sining sahi sang sala. “Indi, indi sa sining sistema sang mga butang ukon sa magaabot,” siling pa niya. (Mateo 12:​31, 32) Yadtong may amo sini nga sala indi na pagbanhawon.

Ano ang pagpasipala batok sa espiritu? Nagahalin ini sa tagipusuon, nagapakita sing isa ka malain nga panimuot kag katuyuan. Ang hungod nga tuyo sa pagsupak sa balaan nga espiritu sang Dios nagapabug-at pa gid sa sini nga sala. Sa pag-ilustrar: Sa pila ka bahin sang kalibutan, ginapatuhay sang kasuguan ang first degree nga pagpatay sa second degree nga pagpatay pasad sa tuyo kag sa paagi nga ginhimo ang pagpatay, kag ginahatag lamang ang pinakamabug-at nga silot (kamatayon) sa sadtong hungod ukon ginplano nga pagpatay.

Si apostol Pablo isa anay ka manugpasipala apang sia nagsiling: “Ginpakitaan ako sing kaluoy, bangod wala ako sing hinalung-ong.” (1 Timoteo 1:13) Ang pagpakasala batok sa balaan nga espiritu amo ang pagsupak sa sini sing kinabubut-on.  Nagadalahig ini sang isa ka malaut nga kahimtangan sang tagipusuon nga nakalambot sa punto nga wala na sing paghinulsol.

Maathag nga amo sini nga sahi sang sala ang ginapatuhuyan ni Pablo sang sia nagsulat: “Indi mahimo para sa mga nasanagan na, kag nakatilaw sang langitnon nga dulot nga walay bayad, kag nangin mga umalambit sang balaan nga espiritu, kag nakatilaw sing maayo nga pulong sang Dios kag sing mga gahom sang nagapakari nga sistema sang mga butang, apang nagbiya, nga papanumbalikon sila liwat sa paghinulsol.” (Hebreo 6:​4-6) Ang apostol nagsiling man: “Kon kinabubut-on kita nga maghimo sing sala sa tapos nga mabaton ang sibu nga ihibalo sang kamatuoran, wala na sing bisan ano man nga halad tungod sa mga sala nga nabilin.”​—⁠Hebreo 10:26.

Bangod sang paggawi sang pila ka relihioso nga mga lider sang panahon niya, napahulag si Jesus sa pagpaandam tuhoy sa indi mapatawad nga sala. Apang wala nila ginpamatian ang iya paandam. Sa katunayan, ginpapatay pa gani nila sia. Sang ulihi nakabati sila sang indi mapanghiwala nga pamatuod nga naghimo sing milagro ang balaan nga espiritu. Ginsugiran sila nga nabanhaw si Jesus! Maathag nga si Jesus amo ang Cristo! Apang, nagbuhat sila sing malaut batok sa balaan nga espiritu paagi sa pagbayad sa Romanong mga soldado nga magbinutig tuhoy sa pagkabanhaw ni Jesus.​​—⁠Mateo 28:11-​15.

Paandam sa Matuod nga mga Cristiano

Ngaa dapat gid talupangdon sang mga Cristiano ang paandam tuhoy sa indi mapatawad nga sala? Bangod bisan pa may sibu kita nga ihibalo tuhoy sa Dios kag sa pagpanghikot sang iya espiritu, mahimo maglambo ang isa ka malaut nga tagipusuon. (Hebreo 3:12) Dapat likawan gid naton ang paghunahuna nga indi gid ini matabo sa aton. Binagbinaga si Judas Iscariote. Matutom sia anay nga sumulunod ni Jesus. Ginpili sia nga isa sa 12 ka apostoles, gani may maayo sia nga mga kinaiya. Apang sa pila ka higayon ginpabay-an niya nga maglambo ang malaut nga mga panghunahuna kag mga handum, kag sang ulihi nadaug sia sini. Sang panahon nga nasaksihan niya ang makatilingala nga mga milagro ni Jesus, nagapangawat sia sing kuwarta. Nian, bangod sang kuwarta, hungod nga ginluiban niya ang Anak sang Dios.

Ang pila nga matutom anay nga mga Cristiano hungod nga nagpalayo gikan sa Dios, ayhan bangod sang kaakig, bugal, ukon kakagod, kag nangin apostata na karon nga mga kaaway sang espiritu sang Dios. Kinabubut-on nila nga ginapamatukan ang maathag nga ginahimo sang balaan nga espiritu. Nakahimo bala sing indi mapatawad nga sala ining mga indibiduwal? Si Jehova amo ang katapusan nga Hukom.​​—⁠Roma 14:12.

Sa baylo nga hukman ang iban, dapat kita mismo magbantay nga indi makahimo sing likom nga mga sala nga sarang makapatig-a sing amat-amat sang aton tagipusuon. (Efeso 4:30) Kag makalulugpay mahibaluan nga si Jehova magapatawad sa aton sing bugana, bisan sang mabug-at nga mga sala nga aton nahimo, kon mahinulsulon kita.​​—⁠Isaias 1:​18, 19.

[Retrato sa pahina 12, 13]

Ang pila ka Fariseo nakahimo sing indi mapatawad nga sala