Malapit Na​—Isa ka Kalibutan nga Wala sing Droga

Mahanduraw mo bala ang isa ka kalibutan nga wala sing pag-abuso sa droga?

GINPANGABAY ni Sekretaryo-Heneral Kofi Annan sang Nasyones Unidas ang tanan nga pungsod nga panikasugan ini nga sahi sang kalibutan. Nagsiling sia: “Dapat kita maghimo sing bag-⁠o kag maisog nga mga tikang agod batuan ini nga kalautan; ini nga peste nga nagsiod sa aton madamo gid nga kabataan.”

Bisan pa mahimo mag-ugyon ang mga lider nga buhinan ang pagpatubas kag pagpalapnag sa ilegal nga mga droga sa bug-os nga kalibutan, mabudlay gid ini himuon. Si Hennadiy Udovenko nga taga-Ukraine, nga nangin presidente sang isa ka pinasahi nga sesyon sang General Assembly sang Nasyones Unidas, nagsiling nga “sa ginabanta nga bili nga kapin sa $400 bilyones kada tuig, ang pagbaligya sing mga droga amo ang isa sa patago nga mga negosyo nga may daku gid nga saplid, . . . nga may ikasarang sa pagpalain ukon sa pagpaluya sang ekonomiya.” Nagdugang pa sia nga ang problema sa droga “naglapnag sa kalibutan kag wala sing pungsod ang makabatyag nga may kalig-unan gikan sa sini nga halit.”

Mabudlay handurawon ang isa ka kalibutan nga wala sing makatalagam nga mga droga. Indi gid ini mapapas sang mga gobierno sang tawo. Apang, wala sing makapugong sa Labing Gamhanan nga Dios sa pagtuman sang iya katuyuan nga magpaluntad sing isa ka dutan-on nga paraiso diin ihatag ang tanan nga emosyonal, pisikal, kag espirituwal nga kinahanglanon. (Salmo 145:16; Lucas 23:43; 2 Pedro 3:13) Suno kay manalagna Isaias, ang pulong sang Dios ‘indi magbalik sa iya nga wala sing mga resulta, kundi himuon gid sini ang iya nahamut-an, kag pat-od nga magamadinalag-on ini sa butang nga tungod sina ginpadala niya ini.’​​—⁠Isaias 55:11.

Ang paglaum sa sini nga mga saad makahatag sing daku nga mga benepisyo bisan sa karon. Halimbawa, si Edmundo nagadroga anay. Apang, sang ginbaton niya ang saad sang Biblia tuhoy sa isa ka matarong nga bag-ong kalibutan, gintimbangtimbang niya liwat ang iya kabuhi. Pagkatapos sini, si Edmundo nagsiling: “Kanugon gid nga gin-uyangan ko ang akon tion sang una.” Sa handum nga mahamut-an sang Dios, ginalikawan niya karon ang droga. Huo, ang ihibalo sa Dios kag sa iya mga saad makapahulag sa aton nga ‘isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’​​—⁠Efeso 4:⁠24.

Indi maisip nga iban pa nga nagadroga anay ang may suod man karon nga kaangtanan sa ila Manunuga. May pinasahi nga kahulugan sa ila ang ginsiling sang salmista: “Indi pagdumduma ang mga sala sang akon pagkapamatan-on kag ang akon paglalis. Dumduma ako suno sa imo mahigugmaon nga kaayo, tungod sa imo pagkaayo, O Jehova. Maayo kag matadlong si Jehova. Amo kon ngaa ginatudluan niya ang mga makasasala tuhoy sa dalanon.” (Salmo 25:​7, 8) Isa gid ka lugpay para sa mga ginikanan nga may batinggilan nga mga anak ang mahibaluan nga ang ila mga anak mahimo magbag-⁠o! Paagi sa maukod nga panikasog, mabuligan sang mga ginikanan ang ila pamatan-on nga mga anak nga pakigbatuan ang pag-abuso sa droga kag “makapanguyapot sila sing hugot sa matuod nga kabuhi,” nga matigayon sa bag-ong kalibutan sang Dios.​​—⁠1 Timoteo 6:⁠19.

[Mga retrato sa pahina 10]

Ang paglaum nga makapuyo sa bag-ong kalibutan sang Dios nagpahulag sa madamo nga nagadroga nga bag-uhon ang ila kabuhi