Gikan sa Amon mga Bumalasa

Pamangkot sang mga Pamatan-on Salamat gid sa artikulo nga “Pamangkot Sang mga Pamatan-on . . . Ngaa Indi Ako Palangga Sang Akon Ginikanan?” (Oktubre 8, 2002) Nagapangidaron ako sang 16 anyos, kag wala ko na makita pa ang akon amay sugod sang 4 anyos ako. Ini nga artikulo sibu nga nagsaysay sang akon balatyagon. Husto gid ini sa pagsiling nga wala na sing mas masakit pa sangsa sikwayon sang isa ka ginikanan. Madamo nga salamat sa sining espirituwal nga pagkaon sa sibu nga tion.

J. J., Estados Unidos

Namat-od nga magdiborsio ang akon mga ginikanan pagkatapos sang 13 anyos nila nga pagbulagay. Indi ko mahangpan kon ngaa nag-antos gid ako, kay abi ko nalandas ko na ang masakit nga balatyagon sang una pa. Ang paghangop sa kabangdanan sang akon tuman nga kasubo nakabulig sa akon nga mangin mas espesipiko sa akon mga pangamuyo kag maghaboy bisan sini nga lulan kay Jehova.

M. D., Italya

Seis anyos ako sang ginbiyaan sang akon amay ang amon pamilya. Sugod sadto talagsa lang kami nagakitaay. Ginbasol ko ang akon kaugalingon sa sulod sang mga tinuig. Subong resulta, nabudlayan ako magpabutyag sang akon balatyagon sa iban. Natandog ako sa mga eksperiensia sa inyo artikulo kag nabuligan ako nga makita nga wala ako nagaisahanon sa sini nga sitwasyon. Indi palihug paghunahunaa nga diutay lang ang benepisyo nga naagom namon nga mga bumalasa gikan sa sini nga mga artikulo kag ang pagpasalamat nga amon nabatyagan para sa sini!

A. H., Inglaterra

Nagapangidaron ako sing 16 anyos, kag bag-o lang gindiborsiohan sang akon amay ang akon iloy. Nasubuan gid kami sang akon manghod nga lalaki kag magulang nga babayi. Ini nga artikulo tumalagsahon gid. Sang ginabasa ko na ini, naghibi ako. Ginlaragway sini ang tagsa ko ka balatyagon. Malulo kag mapinalanggaon ang paagi sang pagsulat. Samtang nagabasa ako sing dugang, natandog ako sing dugang. Madamong beses nga nagapangduhaduha ako kon bala takus gid ako sa pagpalangga sang akon amay. Amo kon ngaa nakasapo ako sing daku nga lugpay sa sini nga artikulo. Maayo gid nga mahibaluan ko nga bisan indi ako palangga sang akon tawhanon nga amay, si Jehova sa gihapon magapalangga sa akon. Indi ako mahangawa nga hinali sia magbag-o kag biyaan ako.

A. M., Estados Unidos

Nagdaku kami nga may palahubog nga amay, kag nag-antos gid ang akon iloy. Ginpabay-an lang kami nga mga kabataan. Ginbatyag ko nga wala ako sing pulos kag nagpamensar gani ako nga mas maayo pa nga mapatay. Nangayo ako sing bulig sa akon mga pangamuyo. Sang nag-abot ini nga artikulo, nagpasalamat gid ako. Nalugpayan ako sa paghunahuna nga ang mga tawo bisan sa sini nga sitwasyon makapili sing isa ka malipayon, madinalag-on nga madangatan paagi sa pag-aplikar sang mga prinsipio sa Biblia. Narealisar ko nga mahimo man ako mangin malipayon!

A. I., Japan

Vanilla Daw nabalaka ako tuhoy sa artikulo nga “Vanilla​​—⁠A Spice With a Long History.” (Septiembre 22, 2002, Awake!) Nakabasa ako tinuig na ang nakalipas sang artikulo tuhoy sa makahililo nga vanilla nga halin sa Mexico. Madamo nga tawo ang nagabakal sini kag wala makahibalo nga mahimo makahililo ini.

P. D., Estados Unidos

Sabat sang “Awake!”: Ang pila ka vanilla nga ginhimo sa Mexico​​—⁠subong man sa iban nga mga pungsod​​—⁠may lakot nga “tonka beans,” nga may mataas nga konsentrasyon sang “coumarin.” Ginadumilian ini nga kemikal sang U.⁠S. Food and Drug Administration bangod posible nga makahililo ini. Bangod imposible nga matukiban kon may “coumarin” paagi lamang sa pagtan-aw ukon pagpanimaho, ginapanugyan sa mga konsumidor nga magbakal sang vanilla sa masaligan lamang nga mga balaklan. Dugang pa, sanglit mahal ang puro nga vanilla bangod sa mataas nga gasto sang paghimo sini, dapat maghalong sa “barato” nga “daw indi mapatihan ang kanubo sang presyo.”