Labaw pa sa Ginapaabot nga Hinimuan

“NAHIBALUAN ko nga indi maayo ang pagtamod sang akon maestro sa history sa mga Saksi ni Jehova, bisan wala ko mahibaluan kon ngaa,” siling sang 17-anyos nga si Rebekka nga taga-Alemanya. Gani, sang nangabay ang maestro sang mga boluntaryo agod maghambal sa tunga sang klase, nangalag-ag si Rebekka. Bisan pa sini, nangisog sia nga mangayo sang iya pahanugot nga maghambal tuhoy sa paghingabot sa mga Saksi ni Jehova sa idalom sang paggahom sang mga Nazi sang Bug-os Kalibutan nga Inaway II. Nagustuhan sang maestro ang ideya.

Nanamian ang klase sa presentasyon ni Rebekka, kag ginbaton nila ang kabilugan nga 44 ka magasin kag mga polyeto sa amo nga topiko. Pagkatapos sini, ginhatag ni Rebekka ang iya tinipon nga materyal sa maestro, upod ang pila ka mga libro kag mga video nga ginsulat ukon ginhimo sang indi mga Saksi. Ang isa ka video nagreport tuhoy sa paghingabot sa mga Saksi ni Jehova sa Sidlangan nga Alemanya sa tion sang Cold War. Nangin interesado sa sini ang maestro, bangod indi sia pamilyar sa topiko.

Nadiskobrehan nian ni Rebekka kon ngaa mabug-at ang dugo sang iya maestro sa mga Saksi ni Jehova. Ginpaathag niya nga may kaklase sia sang una nga isa sang mga Saksi ni Jehova. Wala nagpaathag ang lamharon sang iya pagtuo ukon pagkabuhi subong isa ka Saksi. Gani, naghinakop ang maestro nga ang mga Saksi daw indi kinaandan nga mga tawo, kag indi niya luyag makig-angot sa ila. Apang ginbag-o sang presentasyon ni Rebekka ang iya pagtamod. “Mas maayo na ang amon pagtamdanay sang akon maestro,” siling niya. “Natun-an ko man nga kami subong mga pamatan-on dapat makighambal sa iban tuhoy sa aton pagtuluuhan.”

Apang, indi lamang ini. Ginsugid sang maestro sa iya mga kaupdanan ang maayo gid nga presentasyon ni Rebekka. Pila ka adlaw sang ulihi, nangabay kay Rebekka ang maestro sa pamatasan nga maghambal liwat, indi lamang sa atubangan sang isa ka klase kundi sa isa gid ka pinasahi nga okasyon​​—⁠sa tuigan nga selebrasyon sang eskwelahan nga nagadumdom sa paghilway sang mga bilanggo sa kampo konsentrasyon sa Auschwitz sa hingapusan sang Bug-os Kalibutan nga Inaway II. Mga 360 ka estudyante ang nagtambong, upod ang mga napulo ka maestro kag maestra. Pagkatapos sang presentasyon, nagbaton sing 50 ka polyeto ang mga nagtambong, kag nangayo pa gid ang eskwelahan sing dugang nga 150 ka kopya agod ipanagtag sa ulihi.

Labaw pa sa ginapaabot ang nahimo ni Rebekka. Nahatag ang isa ka maayo nga panaksi tuhoy sa iya pagtuo indi lamang sa sulod sang iya klase kundi sa bug-os man nga eskwelahan. Kag nalandas sang iya maestro ang mga pangduhaduha anay niya tuhoy sa mga Saksi.

[Retrato sa pahina 14]

Si Heinrich Fundis ginpugutan sang ulo sang mga Nazi. Ginatos pa ka iban nga mga Saksi ang ginpamatay man

[Retrato sa pahina 14]

Madamo sa mga Saksi ni Jehova ang gintanyagan sang kahilwayan kon pirmahan nila ining dokumento nga nagapanghiwala sang ila pagtuo

[Credit Line]

Courtesy of United States Holocaust Memorial Museum

 [Retrato sa pahina 15]

Ang mga kabataan kaangay ni Berthold Mewes ginkuha gikan sa ila mga ginikanan

[Retrato sa pahina 15]

Ini nga video nagasaysay sa kaisog sang mga Saksi ni Jehova sa Nazi nga Alemanya

[Retrato sa pahina 15]

Gintahi sa mga uniporme sa prisuhan ang purpura nga trianggulo agod magpakilala sa mga Saksi ni Jehova