Masaligan nga Laygay Para sa mga Pamatan-on

Samtang nagatanyag sang mga magasin malapit sa isa ka hukmanan sa California, E.⁠U.⁠A., si Bill, nga isa sang mga Saksi ni Jehova, ginpalapitan sang isa ka tawo nga nangabay nga magtan-aw sang tanan nga magasin nga Magmata! nga dala ni Bill. Si Bill nagsugid: “Antes sini, ang mga manugbantala sa kongregasyon naghatag sa akon sing pila ka indi bag-o nga mga magasin, gani madamo nga mga magasin ang napakita ko sa tawo.

“Gilayon nga nagpili ang tawo sang mga magasin kag gintangkas ang mga wala pa niya mabasahan. Namangkot sia kon puwede niya mapangayo ang tinangkas nga magasin. Nagpakilala sia subong empleyado sang hukmanan kag nagsiling nga sia ang nagadumala sa pagpanglaygay sa mga pamatan-on nga may mga problema. Ginpaathag niya nga nagakuha sia sing Magmata! agod ipakopya ang mga artikulo sa ‘Pamangkot Sang mga Pamatan-on.’ Ginatago dayon niya ang mga artikulo suno sa topiko kag ginatigana ini agod ihatag sa mga pamatan-on nga iya ginalaygayan. Ang tawo nagsiling: ‘Ang mga topiko nga ginahambalan amo gid ang mga problema nga nagatublag sa mga pamatan-on karon.’ Gindayaw niya ang mga Saksi ni Jehova sa pagbalhag sang mapuslanon nga mga impormasyon agod buligan ang mga pamatan-on. Naghambal pa gid sia nga pangitaon niya ako sa palaabuton nga mga semana agod tigayunon ang mga bag-o nga Magmata! nga akon madala.”

Kalabanan sang impormasyon nga nabalhag sa serye nga “Pamangkot Sang mga Pamatan-on” makita sa libro nga Questions Young People Ask​​—⁠Answers That Work. Mahimo ka makapangabay sing kopya sining 320-pahina nga libro paagi sa pagsulat kag pagpadala sang kaupod nga kupon sa direksion nga yara sa kupon ukon sa nagakaigo nga direksion nga nalista sa pahina 5 sini nga magasin.

□ Luyag ko makabaton sing kopya sang libro nga Questions Young People Ask​—⁠Answers That Work.

□ Palihug kontaka ako may kaangtanan sa isa ka wala sing bayad nga pagtuon sa Biblia sa puluy-an.