Isa ka Realistiko nga Solusyon—Posible Bala?

ANG krimen daw isa ka duna nga bahin sang moderno nga katilingban. Walay sapayan sang maayo-sing-tinutuyo nga mga panikasog sang mga social worker, mga pulis, kag mga propesyonal nga nagabulig sa pagpabag-o sa mga kriminal, ang kalibutan nangin labi pa ka delikado nga duog. May solusyon bala?

Ginapakita sang Biblia nga magaabot ang daku nga pagbag-o. Indi ini magaabot paagi sa mga panikasog sang tawhanon nga mga gobierno. Ang tanan nga tawhanon nga mga manuggahom diutay lang ang mahimo, bisan pa daw ano man kaayo ang ila mga tulumuron. Wala gid sila sing gahom kag ikasarang sa pagdula sa kabangdanan sang krimen ukon sa pagtukod sing isa ka sistema nga malig-on gid sing permanente.

Ang pagbag-o nga ginasambit sang Biblia ipatuman sang aton Manunuga. Subong Magbubuhat sang uniberso, may gahom kag legal nga kinamatarong sia sa paghimo sang indi mahimo sang mga  tawo. Ginalaragway sia sang Biblia subong “ang Isa nga nagapakawalay pulos sang mataas nga mga opisyal, nga nagahimo sa mga hukom sang duta subong indi matuod . . . , makusog man sia sa gahom.” (Isaias 40:23-26) Ano nga mga pagbag-o ang ginasaad sang Dios, kag paano ini makahatag sa aton sing matuod nga paglaum para sa mas maayo nga kalibutan?

Ang Salmo 37:10 nagasugid sa aton sang saad sang Dios: “Sa diutay pa nga tion, kag ang malauton wala na; kag usisaon mo sing maayo ang iya duog, kag wala na [ang mga malauton] didto.” Katuyuan sang Dios nga dulaon ang indi na matadlong nga mga malauton kag wala sing handum nga magbag-o. Apang, indi niya paglaglagon ang tanan nga tawo. Para sa mga handa mangin mahagop, mapainubuson, kag mahidaiton, ang salmista nagasaad: “Maglaum kay Jehova kag bantayi ang iya dalanon, kag sia magabayaw sa imo sa pagpanag-iya sang duta. Kon ang malauton utdon, makita mo ini.” Bangod wala na ang mga malauton, ang mga mabilin magaagom sing “kabuganaan sang paghidait”—isa ka kalibutan nga wala na sing bisan ano nga sahi sang krimen.—Salmo 37:11, 34.

Kinahanglan Bag-uhon ang Hunahuna kag Tagipusuon

Indi tuman nga laglagon lang ang mga malauton kag luwason ang maayo nga mga tawo agod malubad sing bug-os ang problema sa krimen. Ang krimen masami nga resulta sang di-nagakaigo nga paghanas sa tagipusuon kag hunahuna sang mga tawo. Apang, diri sini nga ang gobierno sang Dios nagalabaw sa tanan. Ang praktikal nga instruksion kag edukasyon iaman agod hanason ang mga tawo nga higugmaon nila ang pagkamatarong. Ang Isaias 54:13 nagasiling: “Ang tanan mo nga anak mangin mga tawo nga gintudluan ni Jehova, kag ang paghidait sang imo mga anak mangin bugana.”

Ang mga resulta mangin makaalayaw gid! Ginalaragway sang Biblia ang mga pagbag-o sa mga tawo nga sang una may sapatsapaton nga mga kinaiya. Ini nagasiling: “Ang lobo magapuyo kaupod sang lalaki nga kordero sa makadali, kag ang leopardo magaluko kaupod sang kanding nga tinday, kag ang tinday nga baka kag ang may bungay-bungay nga bataon nga leon kag ang pinatambok nga sapat magatingob.” Ngaa? “Bangod ang duta pat-od gid nga matugob sang ihibalo ni Jehova subong sang tubig nga nagatabon sa dagat.” (Isaias 11:6, 9) Apang, indi na kinahanglan nga maghulat pa ikaw kag ang imo pamilya para sa palaabuton agod magbag-o. Ngaa?

Makabenepisyo Ka Karon

May mga tawo nga nagahimo karon sing kinahanglanon nga mga pagbag-o bilang paghanda sa kalibutan nga wala na sing krimen. Ginasuklob na nila ang bag-ong personalidad, ang personalidad nga luyag sang Dios sa mga tawo nga magapuyo sa iya bag-ong kalibutan. (2 Pedro 3:13) Ginahimo nila ini paagi sa pag-aplikar sa mga prinsipio sang Biblia sa ila kabuhi. Talupangda ang makawiwili nga paglaragway nga ginahatag sang Biblia: “Magbag-o kamo sa puwersa nga nagapahikot sa inyo hunahuna, kag magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.”—Efeso 4:23, 24.

Ginalaragway sing dugang sang Colosas 3:12-14 ang positibo nga mga kinaiya nga ginapalambo karon sang madamong bunayag-sing-tagipusuon nga mga indibiduwal. Ini nagasiling: “Subong mga pinili sang Dios, balaan kag hinigugma, panapti ang inyo kaugalingon sing mapinalanggaon nga gugma nga may kaawa, kaayo, nagapaubos nga panghunahuna, kalulo, kag pagkamainantuson. Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa. Subong nga si Jehova hilway nga nagapatawad sa inyo, amo man ang himuon ninyo. Apang, luwas sa sining tanan nga butang, panapti ninyo ang inyo kaugalingon sang gugma, kay amo ini ang himpit nga higot sang paghiusa.”

Luyag mo bala buligan agod masuklob ang bag-ong Cristiano nga personalidad? Minilyon na ka tawo sa bug-os nga kalibutan ang nagapabulig sa mga Saksi ni Jehova. Sa mga miting nga ginahiwat sing regular sa mga Kingdom Hall, kag sa dalagku nga mga kombension, bisan ang masingki anay nga mga kriminal nakatuon sa pagsuklob sing mahidaiton nga personalidad. * Kon luyag mo makabenepisyo gikan sa sining maayo gid nga programa sa pagtuon sa Biblia, indi magpangalag-ag sa pagsulat sa mga manugbalhag sini nga magasin. Malipay sila sa pagbulig sa imo agod malakip ka sa mga tawo nga nagahanda na karon sa pagpuyo sa bag-ong kalibutan sang Dios nga wala na sing krimen.

[Nota]

[Mga retrato sa pahina 10]

Minilyon ang nagabaton sing edukasyon para sa kabuhi sa kalibutan nga wala na sing krimen